A Lawhcing Makai Hoih I Cih Kuate Hiam ?

Thumasa:  Kipawlna  khat peuhpeuh , Biakna ahizongin gam leh minam vai ahizongin aom ciangin athupi  penpen amakai te ahihi. Makai hoih leh kipawlna hong hoih to a, kipawlna hong hoih  takciangin amakai dangte adingin thu hoih hongki zom toto thei hi. Makai ahoih loh ciangin kipawlna  ahoihna  ding foundation gina omthei lo ahih manin kua kua  in amakai zongin ahoih lo mah in hong kalsuan to zel ding hi.

MAKAI LAWHCING ICIH TE KUATE HIAM?
1. Anungta Pasian a zahtak leh akihta te makai hoih suak den hi.

2. Vision hoih nono aneite 

3. Dinmun kician aneite.

4. Upna tawh hangsan in amainawt ngamte.

5. Ahun zui in akiniam khiat theite.

6. Ahun zui in midang atelsiam theite.

7. Midang tawh akithuah siamte.

8. Midang te apahtawi siamte.

9. Ama muhna bek thuman asa lote.

10. Migen thei leh mihehpih huai te a it theite.

11. Lungkiatna anei pahpah lote.

12. Anuntakna tawh  action in asin pahpah thei te.

13. Ahun , atha leh aneihsa a sungkhia ngam te.

14. Kipawlna dang te khantohna a hoihteng a musiam te.

15. Pumpi siangthona  a neizo  te.

16. Migen siatna leh langbawlna  ah akha sia pahpah lo te.

17. Gualzawhna angah teh midangte apahtawi te.

18. A leitung nuntakna mahmah anun hoih te.

19. Kampau mukpau akidawm siam te.

20. Kipawlna i kalsuan zia leh deihna atel sinsen te.

21. Panmun sangin nasep athu sak zaw te.

22. Panmun neita kei leh   akipumpiak  zote.

MAKAI LAWHCING THEILO ICIHTE KUATE HIAM?

1. Pasian zahtak lo in amah leh mah cing akisa te.

2. Vision hoih neilo in midangte neih teng a langpan te.

3. Dinmun kician neilo in, akhuadaak kawikawite.

4. Hangsanna neilo in a meidawi khukhute.

5. A dinmun tawh kiniam khiat loin akipha sakte.

6. Midang te kuamah telsiam lo ama hihna a ultung sak dente.

7. Midang leh kipawlna dang tawh aki pawl theilote.

8. Midang te pahtawi ding bekbek a lam ente.

9. A nasep pihte mun dangah a gensiasia te.

10. Kamkhauh leh kam el azang zangte.

11. Lawhcinna mun bekah amin a kidawksak nuamte.

12. Lawhsapna mun ah theikha keng a ci pahpahte.

13. Nasepna khat peuhpeuh ah ngaklah lua in alungkia pahpahte.

14. Midang te kipawlna te athusim lote.

15. Pumpi siangthona akizo lote.

16. Ama aituam ding ahih kei leh nasem nuam lote.

17. A leitung nuntakna ah a muanhuai lote.

18. Sepna leh piakna ding ah akihel nuam lote.

19. Midangte ngaihsutna athei nuam lote.

20. Nasep sangin  panmun bekbek a utte.

21. Panmun angah nawnloh teh alangpan pahpahte.

Biakna ahizongin gamleh minam nasepna-ah kipawlna ahoih leh a lawhcinna dingin Makai hoih leh makai muanhuai akisam den ahi hi. Asiam pen bel Zeisu hi a, eite Zeisu etteh in a hanciam ding bek ihihi.

By: Sia Pau Khai.

Zomite' Doding Gaal Nam 4

Zomite' Doding Gaal Nam 4.


Zomite-in khalam gaal hitaleh minam gaal hitaleh kiuknalam gaal hitaleh sahkhualam gaal (spiritual foe, national foe, political foe, social foe) hih gaal 4-te kinei-a, khatbeek I-zawh om naailo thamlo-in I-do vet naailoh tamzaw-hi cih kei mimal muhlehsaanna ahihi.


Amasa-in minam khat hihna-tawh doding gaal, mimal hihna-tawh doding gaal, Khazihmi hihna-tawh doding gaal, innkuan hihna-tawh khua-khat hihna-tawh cih-a kipan gaal tuamtuam om-a, tuate I-theihloh man-in tampi kitukalhna-in Zomite hong nuakaai sak-in, hong tuantual sak-hi.


Gentehna-in, mimal gaaldona-ah akizanghthei mimal kinopmawhna-pen pawlpi-pih khuapih, party or organisation-pih hihna gaal akisak khaakden man-in mimal ki-elna tepawl tua kipawlna or khua huam-ah hongki tonpih lengleng ciang-in apiang ding-a kilawmlo leh akisam vetlo thusia-in hong toknawi den-hi.


Tua ahihman-in Zomite-in doding akisam leh akuul gaalte adeidei, adaldal-a theih masakding leh gaalte' munlehmual zil-a do siamding kisin talehang kiziakaai naailo-hi. Kipuahphatna-ah ziakaailua leh lap nawnlo cihbang om ngeilo-a, I-kipuah hunhun-in agah aki-at pahding ahihi.


Minam Gaal:


Minam akigen ciang-in "minam" hi-a, innkuan, beh, khua leh kual/kuam, awsuah kidang paulehhaan khatbek ahuam hilo ahihlam phawkthak kisam-hi. Zomi ngialbang-pen sisan gui-tawh akizom diudeute kihi-a, National level-a I-promote-nop, I-tawisaannop minam-pen tribe (behguipi khat) zah-a akinaai, akimat akizomte hisawnsawn I-hih man-in gaalte theician lehang buai nading peuhmah omlo-in innkuan vaaihawm-a akivaaihawmthei ahihi.


Bangzah-in kimat I-hiam cihleh Gualnam akici beh-pen awsuah kidang Dim, Saaizaang, Siyang, Teizaang, Paite sung-ah om-a, Samte akici beh-zong Siyang, Losau leh Zo sung-ah om-in, Guite-zong Paite-a kipan awsuah kidang tuamtuam thamlo-in Zomi ahihlam akithei nawnlo Falam lak-ahzong adiil-in om-a, Falam or Laizo kisa khinliang uhhi (Hih-pen sisan khat hinapi hang-in geographical distinction ziak-a akikheel awsuah leh ngeina pomna ahihi).


Hih Zomi I-cihcih minam-in adoding (minam khat hihna-tawh doding) gaalpen ei unau sung-a awsuah kidanna-peuh, akhua akuam kidanna-peuh, party vaai-peuh kisa khaden-a, naakpi-in kikhial-hi. Hih minam' doding gaal-pen "Minam Lian Khat" I-hihna hong vuknelhnuam thuneite hi-a, thauvuui thautang-tawh do sese lohsa-a pilna leh thukhun omsate-tawh doding ahihi. Minam' doding-pen kipawk khalo-in eisung kidanna kiaukiaute-peuh naakpi-in I-kidodo uh-a, tawtawng-a aki-om laai-a Tualgaal tanzil-ah kidiah kiik ding-in alawp mahmahbang omleh kilawm tazen hihang.


Minam khat hihna-tawh I-doding gaal-pen kihai thutuah ciang zong-tawh kikaaptuuk zolo ding-a, leitung buppi huam-a akikhung diimdiam thukhunpite leh thukhaam tuamtuamte, socialisation leh civilisation concept akici tualsung sahkhua khangkhaanna thuguipite naakpi-a sinna leh zatna bek-tawh aki kaaptuuk zo bekding ahihi. Gam khat saatsawm ngial lehang International level I-cih kangkang siamsinna gaalvan khauhpente hi-a, tuate nei naailo I-hih man-in tua gaalvante kitawmtawm talehang minam' maailam hizaw dinghi. Hih gaalvante I-neih mateng political party-peuh, awsuah kidanna-peuh cianglel-tawh akibuaibuai mahding ahihi. Gaalvan kaihkhop kipan ta-ni!


Khalam Gaal:


St. Paul-in Ephesian te' kiang-ah, "Eite' dogaal-in taksalam hilo khalam-hi" acih mahbang-in biakna lamsang pawlpi khempeuh-in adoding gaal atheih kuul-hi. Zomi pawlpi tuamtuamte-in agaal-uh thei kisa napi-in dolo uh-a, dolohding pawlpi dangte-peuh dodo lel, khalam gaaldona peuhmah kigen nawnlo, tuahphatna-peuh pulpit-ah suutsuut, mang-peuh suutsuut, meeltheih sungkuante khatpeuh mawk phatphat, amauleh-amau kiphatphat cihciang-tawh kalsuan-uh ahihman-in adoding-uh "pumpi deihna nialna" mangngilh uhhi. 


I' doding gaal I-mangngilh nungsang cikteh gualzo ngeiding I-hihiam! Khalam gaaldo ding kimlaai, taksa lamsang mawk dodo-in, minam lak khawng-ah mun-peuh tutphah-peuh va-iiplah tautau cihbang-in alehlam-ah akipaipai man-in Zomite' Khalam Gaaldona-pen kipawlnazil kizotna (organisational campaign)-peuh suaklel mawk-hi. Tua ahihman-in tua pawlpi-in adang pawlpi-tawh gii kikhung sitset-in, atoii mahmah political party kalsuan bang-in kalsuan kimphial-hi. Hihte' ziak-in Pasian' Maaipha kingah lo-a, khalam leh taksalam anihtuak-in kiamsukna kilawh-hi.


Tua ahihman-in biakna pawlpi ahihleh adoding gaal thei tahen. Ephesian 6:12 sung simkiik henla, Khalam Gaal, Pasian' Gaallum (armor of God: Ephesian 6:12 - 17) phawkthak henla zangh tahen. Tua hileh dogaal palbang kinangzo bekding-a, minam buppi-in thupha kisaanlawh zawding-hi. Pawlpi' doding-pen pawlpi dangte hilo-in Dawimaangpa hi-a, Dawimaangpa' gui-pen duhhopna, huaihamna, angsungtheihna, kiphatsakna, kiliatsakna, mi simmawhna, sumduhna, mindeihna, kikheemna, zuaugenna, meigong tagahte neumuhna leh simmawhna, tutna saangpen-a tutnopna, khutlam etna leh phuisamna, cbt ahihi. Hihte do lopi-in "Khalam Gaal" kizo ngeilo dinghi.


Kiuknalam Gaal:


Kiuknalam Gaal-pen Zomi hong-uk, hong thuneihkhum kiukna ahoihpen ding-a phuutna ahihi. Atom-in, democracy kiukna-tawh hong ki-uk theih nading, minam khat hihna-tawh self-determinition akici eile-ei kivaaipuakna, I' gam leitang tung-ah eima' thuneihna cihte hong-uk gamukte (government)  tung pan-in ngetkhiatna cihte kiuknalam gaal I-do dingte ahihi. Tua ahihman-in kiukna zil-a Minister kituhna, Member of Parliament kituhnate-in hih gaaldona-a pansan (thaukaap ciang-a muiituum I-khaak nading tutna, khuuk ngakna, thaulawng aliinglo ding-a bih zonna) kituhna ahihi.


Zomi sung-ah MP leh Minister kituhnate tua minam gaaldo nading-a pansan laakna ahi kimlaai tualam-ah pai meello-in khua, khawk, beh, pawlpi cihciang huam-a kidona-peuh hong-om litlit zawsop-a, tua kiuknalam gaaldo nading-a pansan laakna-pen khua khatle-khat, pawlpi khatle-khat, beh, awsuah cih nengneng kaap nading-peuh hongsuak thei-hi. 


Tua hi-a, kiukna lam-a pansan kituhna-ah akihel party makaai khempeuh-in amau' kaapding gaal theibek hilo-a akaap keileh minam sung-a buaina ciangbek-mah lawh leldinghi. 1947 kum-a kipan Zomi sung-ah kiukna lamsang gaal ado minam minsel-in omlo-a, a-om theih nading inzong Kawl Gamukte-in amaan kiteelna tungtawn-a pansante munpia lo-in, minam-in tuantual lawh-hi. Tu-in ahihleh Gamukte-in NLD' khut-ah kiukna apiak takpileh Zomite-zong kiukna gaaldona lam-ah pansan neihsunsun-tawh kikaap theiding lametna om-hi. 


Sahkhualam Gaal:


"Sahkhualam" cih kammal-pen  T. Zokhai (2009) "Sahkhuasiamzil (Sociology)" pan-a akipulaak kammal-thak ahihi. Sahkhua cihciang-in nisim nuntaakna, kalsuanna, innkuan, lawmlehgual, veenglehpaam-tawh kizopzia, tualsung leh tualleenphung (community and society) khuasakzia cihte ahuampi-a genna ahihi. Sahkhualam Gaal-pen: thuhoihte ahoih-a muhtheihna, asiate asia-a muhtheihna, thumaan lunggulhna, khatle-khat (ki-it taktak takeileh) kikhualna, kithuzaaktuahna, kizopna cihte asiasak ki-elna, kigaalneihna, taanglaaithu ziak-a ki-gaalbawlna, kilangbawlna, midang khat' sila suahna, mi khawituamna, khawituam mi suahna, amaan akhial khentel lo-a akimuam bangbang sihpih ngamna, gamtatluheek akilawm awlmawhlohna cihte ahihi.


Sahkhualam doding gaal-pen atanzil hongsaang simsim-a, Zomi sung-ah kimeeltheih naai khollo-hi, banghanghiam cihleh Sahkhuasiamzil lam-ah siamsinmi khutme-zahzong kipha naailo-a, apaizia, ahualpi luanzia kithei naailo-hi. Nuntaak khuasakna, nisim nuntaakna, veenglehpaam-tawh kizopna apiicing zawding, akhauh zawding, akinaai zawding, amuiibunh zawding cihte-a kipan khatle-khat kizopna khangkhaanna ahihi. Inntungte' omzia theihpih, akhasiatna veipih, alungdamna nuampih thei-a, innnuaipa' veinate-zong theihpih, awlmawhpihna cihte abulpi ahihi. Inntungpa innnuaipa cih nungsang innkuan khat sung-ah zii leh pasal, nulehpate leh tate' kaalthu-in sahkhuasiamzil bulpi ahihi. 


Hih innkuan kizopna acidam loh-in veenglehpaam-tawh kizopna cidam theilo-a, veenglehpaam-tawh kizopna acidam loh-in, pawlpi leh kipawlna kizopna cidam cihbang om ngeilo-hi. Tua ahihman-in kizopna acidam nading kal akisam bang-a suan siamding kisam-hi. Mimal kizopna acidam takciang-in tualsung hong cidam thei ding-a, tualsung acidam naakleh innnuaipa-in Tual Biakna azuui zong-in, inntungpa-in Milim Biakna azuui zong-in veenglehpaam hihna' ading-a akilawm kizopna kinei siam ahihman-in tua biakna-in hong nawngkaaisak nawnlo-hi. Kongpa-in Teizaang awsuah azangh zong-in, phaaitampa-in Zo awsuah azangh zong-in veenglehpaam hihna-tawh akilawm kizopna kinei siam peuhleh tua akidang awsuahte-in hong buaisak nawnlo dinghi.


Tu-in, I-do dingte thei-ta I-hih man-in dodingte nangawn do naailo pi-in dolohding tata dosawm nawnlo-in, dodingte do nading gaalvan kisam bangbang hahkat-in zong meengmeeng-a gaaldo kipatding hunta-hi. Kipan photphot lehang nuamsa kisa-in, "Nii-aw, na khawl laai-in, kha-aw, Aijalon kuam-ah nana dingcip laai-in, ka' gaalpa' khutsung pan-in ka' gamlei ka-ngah mateng," ci-in I-hunbang hawmthawh mahmahding hihang! 



Zomi Pasian' Thupha!


Zokhai


***********************************************                                  

T. Zokhai          ITNA-IN GUABANG HINNA-HI        
60 Narr-Maen Drive                                                            
Croydon Hills VIC 3136         
Melbourne, AU                   
Tel: +61 39723 0460                                      
Mob: +61 420 800 560                          

***********************************************

Tuhun leh mailam Zomi movement etkhakna

Tulaitak pen Zomite leitung mun tuamtuam ah i kithehthang hun ahi hi. Tu-in Zomi diaspora hun khat hong beita a, tu akipan Zomite kalsuanna thak tawh kalsuan ding kisam hi. Tua banah Kawlgam politics kikhelna hun zui-in Zogam politics zong hong kikhel ta ding ahi hi. Zogam mun tuamtuam ah khantohna i kisam pha mahmah hi. UN te pau leh ‘least developed’ gam le minam i ta hi. Tua dinmun pan Zogam khangthakte koici le’ng khangto thei ding hiam? Nung deuh in awging khatin, “Zomite la lamah khangto napi h’ang in thu lamah khangto zo nailo hi h’ang,” ci khat kiza hi. Zomite Pasian la, leitung la le zawlla tuamtuam ah leitung level phial in khangto mah h’ang a, lungdamhuai hi. Ahi zongin thu-le-la ah ‘thu’ lam zongh i khantoh ding ngaisut huai lai mahmah ding i kisam hi. 


Leitung mun tuamtuam a om Zomite le Kawlgam-Zogam ah om Zomite ii khuasakzia or ngeina le ngaisutzia (culture and mindset) i theiloh kalin hong kilamdang khin ta ahi hi. Tua ahi manin, gamdang leidang tung Zomi khangthakte in midang gamdangte ngeina hoilo te i cin’ khakloh ding hong thupi mahmah ding hi. 


Zongeina hoite i kepcing ding kisam hi. Tua bang hi kei leh gamdang pan khangkhia Zomi khangthakte le Zogam a om Zomi khangthakte mailam hunah thu-le-la ah hong kiothei nawnlo ding uh hi. Khat-le-khat ngaisutna kibang nawnlo ding uh hi. Tu mahmah in zongh gamdang tung khin khangnote ngaisutna pen a tunna gam khangnote' ngaisutna in tampi luah khinta ahi manin dahhuai mahmah thu ahi hi. Tua hi a, Zomite thu lamah ngaisutna, khantohna, pilna, siamna, cidamna 
etc. te ah liangko kikim in i kalsuan theina ding vaiawm siam kisam mahmah ta hi.


Gamdang tung Zomite' ngaisutna (mindset) khatin sum thalawh ding bek ahi hi. Mun khempeuh ah thaman niam pen tawh dollar i thalawh laitak hun ahi hi. Tua manin tuhun khangthakte in pilna siamna tawh sum thalawh ding sangin, a bai pen thatang suang in sum thalawh ding vive ngaisutna tam zaw hi. Khangthakte pilna tawh i pattah ding kisam mahmah ahi hi. Khantohna pen pilna pan hong kipan ding hi a, dollar hauhna pan hong kipan masa lo ding ahi hi. Khantohna din-gin piciang tehna infrastructure kici bulpatna? sungah cidamna (healthcare), pilna (education), lampi kizopna (transportation) cite kiel ahi manin, Khangthakte'n 
pilna hanciam in nu le pate in zong i pattah ding kisam le thupi mahmah ta hi. Tua bang mahin Kawlgam sungah Zomi khangthakte pilna/siamna lamah madawk ding kisam ahi hi. Gentehna in Zomite pen Kawlgam-ah English a siam pen minam in hong kigen hi napi-in, English tawh thu-le-la gennate ahi MITV [Myanmar International Television] broadcast sung khawngah thugen/ thupulak (Announcer) te lakah Zomite khat zong kielzo nailo mawk hi hang.


Zogam ading tulaitak in leitung mun tuamtuam pan sum-le-pai huhna hong pai banah India kumpi in zong motor lampi sawtlo-in hong bawlsak nuam hi ta ahi manin, Zomi khangthakte'n i maban ading kigingkhol in pilna,siamna le cidamna lamah i hanciam mahmah ding le nu le pate'n zong i pattah siam ding hun ta hi ci-in i kianthawn nuam hi. Cidam in pilna tawh akidim Zomi khangthak tampi i om ciang bekin Zogam hong pallun zo pan ding ahi hi. Zomite thu-le-la tawh khangto dingin i biak Pasian in lobang hong siam ta hen! Tongsan Kawlpi Nov.2015

Zomite' Dinmun ding

Guai,

E'n zong ngaihsut huai kasak khat, ASSK in interview a dotna a dawnna ah tu a mipi' telcing MPte pen "makai" cihding deih hetlo hi.

Ahih hang mipi in i phawk ding khat om veve a, i tangmi ding a i teel MPte pen ei' tang a ding ding, kampau ding a i muan a i teel ahi hi. Amau mahmah in ASSK genbang in "ko mipi' tangmi hi ung, mipi (note') nasem ding hi ung" ong ci phial uh ahi zong in mipi' "sawltak/ sila / sal " hilo hi... cih phawk gige huai hi.

Tua ahih leh bangci ding? Bangci bang a pangkhawm thei ding?

I MPte'n ee, mipi' deihna bangci septheih ding? Mipi in ee MPte bangci panpih thei ding? Democracy zia leh tong tawh kituak a mipi' deihna leh mipi' tha tawh nasepna ding ah pankhop zia ding i ngaihsut mahmah ding thu tampi om ding hi. Tuate' lak ah -

Mipi lam pan -


Nidang in i nette sung ah lai ki-at pawlkhat i etkik ciang, mi pawlkhat in amah kua hiam cih zong a kithei lo, kipawlna min tawh lah hilo in utteng khat at suk, kipawlna makaite'n ama' cih bangbang a sep lianlian loh ciang "mipi' thu manglo" ci a kopaat suk gawp cihbang dan simkha mun simsim hi hang. Amah leh amah/ ei leh ei mimal ihih lam mangngilh in mipi kisa kha thei hihang.

Makai lampan -

Makai pawlkhat leuleu ciang lah thuneihna khempeuh amau' thu, acih khempeuh uh mipi in akawi amam a zuipah ding, mangpah ding cihbang in lam-en leuleu a, amau' cihbang bang a kiman' lianlian loh ciang " ka thu ong mang kei le uhteh makai a nong teel uh bang ding hiam" cipah lanlan leuleu zong om thei zeuhzeuh hi.

Singapore ah -

Singapore pen suahtakna ngah a, gam khat a adin' 1965 a kipan PAP party khat bek in a uk suaksuak gamneu khat ahi hi. Tukum in kum 50 cin' Golden Jubilee bawl uh hi. Tuatan vei ukna za len party khat hi napi a Party makaite leh a MPte mahmah uh kiphasak hetlo mawk uh hi. Mipi' deihna sep ding thupi sak mahmah uh hi. Agam mipi thupi ngaihsut mahmah uh hi.

Tuni ciang dong mah MPte in amau' constituency sung a mipi tawh kizopna nakpi tak hanciam uh hi. A vengveng ah nitak sim, mi' nasep mankhit hun in pai kawikawi uh a "meet the people session" nei den uh hi. Mipi tawh kimu ngiat in, mipi' kisap theihkhiat sawm uh hi. Tua "meet the people" hun ah mimal vai a kipan veng vai, gambup vai dong in mipi in a ut bangbang uh gen, ngen, kuppih, ngaihsutna pulak thei uh hi.

MPte sun a zumkah lo, nasem lo hi hetlo a, mipi' nasep man khit ciang amau nasep kipan san lai uh hi. Na naksep mahmah uh hi. MP hikhin ahih ciang a, a ki mai-et ding khawng ngak a awmpho pheuphau a tu lenlan deksuai lo uh hi. MP asep ma zah nih in nasem uh hi.

Hihbang mipi tawh kizopna pen amau' mun leh mual tawh kituak a abawl uh hun geelzia ahi hi. Ei' gam ah bel hihbang lian hithei sam ke'n cia. Ahih hang i gennop bel MPte'n mipi a thupi simna leh mipi in MPte tawh a nasepkhop zia uh a gen nuam ihi hi.

Tu tadih ei' context tawh kituak in, mipi in i lunggulh khempeuh net leh email pan ahi zong in, facebook leh kizop kihona tuamtuam pan ahi zong in, lamdung leh niangtuisai ah ahi zong in, zum leh nasepna, lokhawh singpuakna ah ahi zong in, gen zelzul ding hang a, i MPte in tuateng khinkhai in masak ding leh nunun' ding ong haih ding uh a, amau' ngaihsutna tawh gawmkhawm in i gam leh i minam mailam ding a hoih pen ong sem, ong phuding uh... cihpen i lam-etna ahi hi.

Mipi in zong ei' cih peuhpeuh ong pian' zatzat kei leh MPte mawhsak gawp pah ding hi tuan samlo ding hi. Amau ei' sang ngaihsutna tampi zakhawm, theikhawm zaw ding uh a, ei sang zong na ngaihsun zaw tham ding uh hi.

Tua ahihman in i MPte mahmah in mipi' ading na khat peuhpeuh ong sep, ong vaihawm uh ciang mipi in ei' ngaihsutna tawh ki kelki phial taleh nuaksan hetlo ding hihang. I lungkim hetkei leh zong phunphun sa mah in a numg uh zui in panpih ding hihang. I lungkim zawhlohna gen kawmkawm sa mah in panpih ding, dinpih ding hihang. Ama phutna uh a tangtun theihna ding a ei' seppih theih a om leh phunphun sa mah in i hihtheih tawp tawh panpih, seppih veve ding hihang. Tua in i minam bup manawtna ah ong daupai sak ding, ong mazang sak ding hi.

Opps!..... Ong sau lua zel ei!

pks

Zomi/ZCD thu sung ding, kei hoih ka sak thu khun pawl khat I

Dear ZCD/Zomi pih te,



Zomi/ZCD thu sung ding, kei hoih ka sak thu khun pawl khat


Kei hoih sak dan. Deih nget zong a nget dan siam leng, hong pia ding te leh mipi/midang te muh na ah zong ki lawm zaw se hi.


1. State ai dang a Radio/TV program cih te pen tua state/division sung a om mipi a tam pen in a tel ding kampau/lai zat ding. Kumpi Radio/TV zopau hong pia un e cih sang, a mui bun zaw tam? Hong pia ding te a ding in zong hong piak dan nuam ding.


2. District Myo (Town) pen tua district sung a om mipi te ading a senpi pen/deih pen Town a koih ding. A ki sap leh tua distruct sung a teng mipi ten vote/mee pia ding. Hi pen democracy dan hi a, hong pia ding te a ding in zong hong piak dan nuam ding.


3. State/Town khat sung a om na khat peuh peuh pen tua state or union government in nei ding. A kisai lo State/Division khat in gal vai hawm lo ding. (Genteh na: Chin state, Tedim gam leitang tung a om University pen Tedim University mah hi pah lel ding. Kalay University ci bang zang lo ding.)



4. Lampi a ki tam zat pen (motor a tam pai pen) te puah ma sak ding. Usapi(Priority) a puah/lam ding. Gangaw-Hakha (Hakha-Falam-Kale) sang Kale-Tedim-Rih motor tam pai zaw na pi in, lam ki puah lo zaw. U lian pi te Hakha bek ah teng uh a, a mau a ding a senpi ding bek ngaih sun lo a, mipi a tam thei thei hamphat na ding hong ngaih sut nang.


5. Kumpi zum/ head quarter te zong capital bek ah koih lo in, khua tuam tuam ah zong koih ding. (Eg. tun zong Naypidaw ah kumpi zum tampi a om hang, Ygn ah zong om lai ve ve) tua dan in a senpi na mun te ah a ki zat theih na ding. Eg. Tedim pen Chin State Commercial Capital. Hakha Politial Capital, tui lam khual zin na lam zumpi (Chin state water transportation head office) Paletwa ah ci dan e.


US ah Washing DC ah kumpi zum, New York ah UN Zum ci dan hi a, Australia bang hi leh Canberra a kumpi zum, Melbourne pen sport capital leh Sydney pen Commercial capital ci dan in ki zang lel hi. Na khem peuh capital a koih kul se lo. Australia PR bang a siau(apply) ding hi leng, Asia lam teng Syndey zum ah, Africa lam teng Adelaide lam ci dang in zum/na sep khen bawl uh hi. Ei zong Chin state zumpi khem peuh Hakha ah om kul khin se se lo.


Chin state ah khua kim a khang toh na ding, a hun hun in parliament meeting te zong a kua a kua ah bawl ding. Kei up mawh na ah, hi bang in gen leng Hakha lo teng in hong thu kim pih lel ding a, ei a ding hamphat na khat hong hi pah ding hi.


6. Budget tam pi nei lo pi pi Nyipidaw/Hakha ah u lian te a ding special medical care (athukuh) lam na ding sum tampi bei ma sa sak lo ding. khua neu khua ta te a ding basic medical care a ding zang masa ding. U lian khat pek 1, mizawng meigong khat pek 1. Mi 100 om na khua pi ah pek 100 a ki zat leh mi 10 om na khua ta ah pek 10 zang ding. mi khat pek 1 tawh pai theih na ding.


7. Khangto na lam sum/budget pen a khangto nai lo mun/gam te pia masa (usapi) ding. (eg. Chin State,  - kawlgam bup ah lai thei lo a tam pen 2 na hong ki ci - Tedim)


Muh dan ki bang lo/ muh dan tuam tuam te zong za nuam hang ei. Hong at tek vo.


Lai at,

Mungsen

Laaitui leh Khuangleeng Kilemna tungtaang

Laaitui leh Khuangleeng Kilemna tungtaang akicianlo thuthang leh akhial thuthang kikhah ngeingai-a, kilawm salo leh amaan thu akitheihding deihna-tawh kahong sungkhia-hi.


"Laaitui leh Khuangleeng Kilemna" ci-a minpuak sak-pen thuhoih ahihi. Ahizong-in ataktak-in tualgaal hunlaai-a Laaitui Hausapite-in Khuangleengte athah tamlua-a, khangthakte-in mulkimhuai kisa lawmlawm ahihman-in "Khutkhialh Luutna" (Luut: zubeel tung-in maaisakna ngen) akibawl ahihi.


Khuangleeng-tawh akido om kawmkawm-a, Sukte hitaleh Kaapteel hitaleh ana-kido zeuhzeuh ahihi. Ahizong-in tutung-a Laaitui tate-in Khutkhialh Luutna abawl-uhpen Sukte-a kipan khuadang min-tawh akiluut hilo-in, Pu Pau Suang-in athahlup Khuangleeng khuamite' sisan tung-ah mawhmaaina akibawl ahihlam mikim-in hong theihpih tahen.


Athu-ah, 1870s -in Pum Lawng Lamka-ah Khuangleeng gaalbengte leh Laaitui gaalbengte kituah-in kikaap uh-a, Laaituite 7 bek hi-in Khuangleengte 40 vaal uh-a, atawpna-ah Laaituite khat gelsim vingveng-in khua-ah sihtaai-hi. 5 si khin uh-a, khatpa thalsing phung-ah aphei te-nih thau-in kaapliam ahihman-in sihding ngaak-in tu-a, athau thunthun-hi. Khuangleeng gaalbeng makaaipa athagol mahmah, agamh mahmahpa nuui liahliah kawm-in miliampa' kiang zuan-hi. Nitui Ai nei akisa-mahmah ahihman-in thau-in akha theilo ahihi. 

Laaitui ngalliam-in athau puansia ding-in azii' niindap zangh-a thau-thun aman ciang-in ngiim-hi. Khuangleeng gaalmaangpa-in laulo-lua ahihman-in a-awmpi dawh-in, "hong kaap" ci-hi. Lamenlo pipi-a akaapleh gaalmaangpa tuukpah-a, si-hi. Tua ciang-in adangteng-in amaangpa-uh pua-in taai lehtaai mang uhhi.


Pu Pau Suang: Laaitui Khuasaat Hausapipa-in azaak ciang-in amahbek kuanto-a, Khuangleeng akhua mahmah-ah va buluh-hi. Nitui Ai nei ahihman-in thau-in kha lo-a, pasal amuh khempeuh nausau-tawh that-hi. Nupite khenkhat-in atate-uh gamsung-ah taaipih/bukpih uh-a, tuatengbek suakta kici-hi. Khuangleeng gaal-pen Mualbeem Innpite hitaleh Kaapteelte hitaleh kido zeuhzeuh uh-a, ahizong-in Laaitui-tawh kidona taktak hih thu-nihbek ci-in kiciamteh-hi. Ka' Pi-in honggenna-ah, Khuangleeng gaalkaapte-in Pu Pau Suang' Nitui Ai neihlam thei ahihman-in hongpelhden uh-a, Sialthah gaal-a Nuam Khua-ah Laamzaangte pasal tingteng 7 leh numei khat Khuangleengte-in hong buluh inzong Laaitui hongpelh uhhi" ci-hi. Tua pasal sagihte angawntan uh-a, alutang khempeuh tua numei puasak-in, numei-zong sila ding-in man-uh azaak ciang-in Pu Pau Suang-in kamkhaak ziau-in hong ciahsak kiik-uh cihzong honggen-hi.


Bangbang ahizong-in, 1800-1900 kaal-a Laaitui Hausapite' khut pan-a sisan luanna ziak-in Khutkhial Luutna-tawh thupha akidawh hi-a, Sukte leh adangdangte-tawh kipaaikaan lo ahihman-in ko Laaitui Vontawite-in Pasian' Maaipha Zonna-in Ankuang aluui ka-hi uhhi. Thuumna cihbang saansaan-zong hilo-a, liausum piakna cihbang maimai-zong hilo-hi. Thupha Kong Honna ding-a ka' vaaihawm-uh Ankuang ahihi. Kuamah dangte-in buaipih leh kinialpih nading omlo-hi.
Hih Itna Ankuang' hang-in Pasian-in Ama' Maaipha ziingnii bang-in hong taanvaak tahen!

Zokhai

Zomi Siamsin Kipawlna Kum 50 Cin Kham Jubilee

A (9) Veina Siamsin Seminar le Zomi Siamsin Kipawlna Kum 50 Cin Kham Jubilee Lungdam Pihna Laipi

Zomi Siamsin Kipawlna- Universities Myanmar a IX veina Seminar Pawipi le Kum 50 cin Golden Jubilee Pawipi picing gualzo tak in Heilei khua Zogam ah i bawlzawhna thu kong lungdampih mahmah uhi cih amasa in kong pulak nuam uhi. Abei sa hunte ah Galkap kiukna hunhaksa sungah Siamsinte in akhang akhang in Gam le Nam ading pilvang tak le bucing tak in i zawhna tan pan mapangna kipiakkhiatnate gen zawhloh thu tampi mah sut khop om ahimanin etteh tak Zomi Siamsin te ading mipi in kipak in ki-angtang mahmah den ding hi cih zong kong thapia nuam uhi.

Khamtung nuntak haksatna tampi bek hilo in, tukum Zogam guahpi le mencip-pi in hong thuapnelh sukna hang tawh annek tuidawn nuntak khuasak nading lungkham kibehlap in vangik tampi om beh banah 2015 Gambup Kitelpi hangin zong Zomite sungah Party tuamtuam kidemna hangin khat le khat kikal khangthakte in ei tuah ngei loh thu hoih thu sia tampi hong piang khia sawnsawn ahimanin tuabang kawmkal ah khangthak Zomi Siamsinte in kithuhual tak in Seminar le Jubilee Pawi aki bawlzawh pen kong lungdam pih phadiak uhi. 

Seminar Motto om mah bangin Zomite khat le khat kikal Piang kilamdang Pil le Theih kilamdang Deih kilamdang bek hilo Nuntak khuasak kilamdang in Mualkawm Kenkawm Lui le Gunte bek in hong hal hi nawnlo, Gamgite'n hong hal in Tuipi tampi te in hong halna sungmah ah ei nuntakna tek ah Phualva mah bangin Citak tek in, Thumanna tawh nungta in, Ki-itna Kithutuakna tawh nungta tek a, Meitei guntui bangin i luang khawm hialhial ding hi cih i phawktek den nading in khat le khat i kizawn tek nuam hi. 

Kitelpi khit khuahun thak ah zong Mipitelna zahtak in Democracy khaici apung suakna ding a kipan Galkap ki-ukna abul pan lok khia in Pu le Pate khekhap ahi Panlong maban Democracy Federal gam lungtup taktak ngah zawhna dingin ei mimal kim vaipuak ahi hi.

Zogam le Kawlgam ading nasepna mabante ah zong ZSYO in ZSK UM tawh khut kilen in In-formal le Non-formal Education lam pilsinna akipan, Gam le Nam ading khangtohna tuamtuam mapang nasepnate ah thuman tak le bucing tak in mapang khop theihnate ah pang khawm nuam hihang cih cialna Topa Pasian min tawh kong zawn uhi ci kawm in a (9) veina Siamsin Seminar le Kham Jubilee Pawipi Lungdampihna Laipi kong khak uhi. 

Zomi Student and Youth Organization
27 November 2015

Tulai Kawlgam khua hun

Tulaitak kawlgam ah mipi' lunglutpen thu in "ASSK kumpi asuak takpi thei diam? " cih thu ahi hi. Bang hang in hizah in ki lunglut tektek hiam cih leh;

Tukha 19 ni in Than Shwe' tupa Hpoo La Pyae (Khaliik Pu)/ Nay Shwe Twe Aung in a facebook ah "Tu nitak pen tangthu ah asuut tham cing nitak hi" ci'n asuahsak ciang in "Hihte putu leh ASSK kimu uh hi ngelngel ding hi" cih upmawh thu nasia tak in hong gingkhia hi.

Asawt lo in ASSK leh RFA Radio kihona ah ASSK in "Kimu mah ung" ci hi. Ahizong in bang teng kigen cihpen genbeh lo hi.

Media pawl khat in agenna ah ASSK leh Hpoo La Pyae akimuhna vuah HLP in amau' nuntak khuasakna ah bitna a omna ding in ASSK' tung ah kamciam ngen aa ASSK in zong kamciam pia ci hi. Cihnopna ah galkap kumpi' hun lai aa agamtatnate tung vuah phuu lakik nawnlo ding cihna hi.

Tuaban ah tukha 26 ni in Hpoo La Pyae in a facebook pan ASSK' tung ah lungdam kohna agen ban ah gam leh lei ading in ka pantheih bang in pang ning ci hi.

ASSK kumpi asuah theihlohna ding aa adal/akhak tan ahi Article 59 (F) pen USDP  in laih ding ahanciam lai un kawl galkap te'n khak tan ahih man in laih zolo uh hi.

Ahizong in tu'n kawl galkap te' pupi Than Shwe in thukimna neita hi leh kilawm hi. A sawt lo in ASSK leh kawl galkap mang Ming Aung Hlaing te hong kimu lai ding uh ahih man in Lametna tampi omta hi.

Hih kumpite' hun beima in Article 59 (F) kilaih thei ding dinmun hita ahih man in ASSK kumpi asuak thei mahmah ding ong suak hi.

DVB TV te' debate khat ah NLD makai khat ahi Monywa Aung Shin in "Ko NLD te'n kawlgam kumpi ding in ASSK mah tin/propose nung" ci lailai ahih man in kip tektek hi.

Tua debate mah ah Salai Lian Hmung Sakhong in "Tu'n no bang mah thuneihna aneilo Vice President mun bek ko mualmite piakding aa ngaihsun mawk. No kawl te'n kawlgam kum 60 val na uk khin tave vua leh. Ko zong hong uksak ve vua. Uk thei mahmah lelding hive ung" ci hi.

Bangbang aizong mipi' neihsa teng adeih bang aa azeek, a ut anuam aa om Phoo La Pyae' ii kamsung ah kawlgam vai akingak pen khasiat huai veve hi.

Kiukhat Pan:

Mung Laan Thang/ Pu Thang
Zangkong

Thanksgiving Day cih hong pian khiatzia

Thanksgiving Day cih hong pian khiatzia

Amasa in America gam panin hong piang khia ahih manin America gam hong pian khiatzia leh USA cih hong pian khiatzia ban-ah sum aneih zia uhleh thanksgiving pianzia tawh gen masa ding hihang. Tua zawhteh Thanksgiving hong pianzia tawh zom suk ding hihang.

America cih min hong piandan hih bang ahihi. German mi Christopher Columbus in 1492-1502 kumsung in tulaitak South America gamlam hong zinkhia hi. Kum 7 khitciangin, a lawm hoih mahmah ahi Amerigo Vespucci (Eng. Americus Vesputius) in zong tulaitak America gam lam tembaw 4 tawh hong zin a, Asia tawh a kizom khalo gam lian mahmah om hi ci in New World cih min vawh hi. Hih New World cih min a vawh pen laigelh siam mahmah Martin Waldseemuller in news paper ah Vespucci min tapsak in America cih lai hong hawmkhia in 1499, 1502, 1507 kumte ah Europe gam sungah hih thu kizel khinta hi. America gam min pen Amerigo Vespucci (Eng. Americus Vesputius min pan ih ngah ahi hi kici thei hi.

USA cih min hong piandan leh suahtakna a ngah dan uh hih bang ahihi. The Great Britain khut nuai pan America gamke 13 te in 1765-1783 suahtakna dingin na do uh a "The American Revolution" kici hi. July 4th, 1776 ni in British khut nuai pan in suahtakna (Independence Day) ngah ni in kiciamteh hi. Gamke 13 kipawl khawm in a dokhawm ih hih ciang ci in, United Sates of America cih kammal hong gelhkhia masa taktak pen Thomas Jefferson hidingin kigen hi, representatives khem-peuh in zong thukim in, United States of America cih min kizang suak a, State 13 tawh kipan hi in, tu in State 50 bang kiphata hi. Street minte ah Jefferson cih min na muh sim in United States cih kammal hong zangkhia masa pen cih phawk huai hi.

Sum a neih masak zia uh tawm gen beh leng. USA sum (laidal) khem peuh lakpan a kibawl masa penpen One Dollar ahi hi. 1795 kum in a US min tawh sumtang "the Long Hair Dollar "cih kibawl khia masa penpen hi. Sumtang a neihma un Spanish Dollar kici sumtang na zang toto phot uh hi. Siktang pan laidal ciang ah a zattoh uh thu tawm ih kikum dinga, 1957 kum pan tu ciangciang numei naupangin zong Dollar dawla..cih in i gentheihna tua dan ahihi.

Georg Washington in gualzawh a ngahpihteh Topa tungah a lungdamkohna a pulak na pen (1).Almighty God, (2).Human Right cih tawh hong piangsak Pasian ahihna pulak masa in lungdamko khia hi.

Zomi Thanksgiving i cihcih hong pianna dingin USA kumpi masa pen ahi George Washington in November 26, 1789 ni pen USA gambup Lungdamkohna Ni (USA Thanksgiving Day) a zat dingin pulak khia hi. Hi mahleh a nungah USA kumpi sem Thomas Jefferson, lej Andrew Jackson ten thukimpihlo uhihi. Tua banah USA tualgal (Civil War) bei khit October 3, 1863 ni-in USA kumpi 16 na ahi Abraham Lincoln in America mi khempeuh dong kik-a, November nipi nunung (The last week of November) pen National Holiday dingin kipsak uhhi. 1939 kum ciangin USA kumpi Franklin D. Roosevelt in zum nasemte leh vanzuak vanleite in Christmas hun dan mahin van khat peuhpeuh a taem manzaw leh a Tex omlo ding pawl khat hong piannang pulak khia hi. Tuni dongin USA gam sungah Thanksgiving ni pen kumpizum kikhak ban-ah van pawlkhat ki mantak in ki zuak hi.

USA Thanksgiving Day kibawl ciangin USA gam tualsuak miten a zatzia uh pen Sai Aksa le Vaimim Zohuan uhhi. Tua Sai Ak Zohuan(Tuihuan) le vaimim a deihna bulpi pen abeisa hun khat lai-a khualzin (pilgrims) a pu, a pate phawkna ahi hi. Aksa Zohuan cihte Mikangten Zohuan panin hong theih khiat uh hi thei dingin ka um phial hi. Khuado pawi leh pawi tuamtuam Zomi ten i bawl ciangin ki Zohuan tangtang zaw hi. Tua banah Sai Ak, Zo Ak, Vaimim leh Singgah lim(picture) tuamtuamte inn zepna in nei uha, letsong in zong kipia uhi. Khristian Khualzinte tangthu (The Pilgrim Story) pen USA tangthu sungah abeisa 17th, 18th, 19th, 20th, 21st Century leh mailam hun sawtpi ah a mang ngei nawnlo dingin kiciamteh hi. Tua bekthamloin Pilgrimte phawkna dingin, Pilgrim Hall Meseum, American Meseum of Pilgrim Possesions kici No. 25 Court Street, Plymouth, MA, USA ah Inn lianpi khat kilam hi. Tua innpi sungah "Tanglai Pate upna’’ cih laimal kigelh asimkha a mu kha khempeuh in a pu apa te uh phawkna khang semsem sak hi.

USA gam panin hong ki pan khia ahi Thanksgiving tawh ki sai tuhun ciangin USA gam sungaom Zomite bek hilo mun tuamtuam aom Zomite tung na lengah ki lawh in a munmun ah USA gam mite zat bangin November nipi kal nunung, a ni 4 na simin ki zangh kawikawita hi.

Hihthu tawh ki sai Zomi Pentecostal, Nashville Tn USA, Zion Tangko hawm 3,4 na pan leh Wikipedia panin hong laksawn ahihi.

Thang Thawn Tuang Guite
Nashville TN USA
Nov 26, 2015

Pu Thang Lian Pau ZRO tawh Interview na

ZogamOnline in Zomite' sungah mi thupi leh siamna tungtuang zawdeuh pawl khat holimpihna (Interviwe) nei zel uh hi. Tutung in Zomi makai khat ahi  Pu Thang Lian Pau, Guite (ZRO President) tawh holimna nei kik thei uh hi. Zogamonline min deihna hi loin, mun tuamtuam a om Zomite in i gam i lei ading makaite thu le pianzia akipan nasemte a kician zaw a theihna ding deihna bulpi tawh holimna a neihpih uh ahi hi.

Hih holimna tungtawn in Zomite in namthu (Political) lamah khuamuhbehna leh kipumkhatna a khan zawkna ding lametna kinei hi. Holimpihna (Interview) tungtang ah hong panpih a kua maciat leh  Sia Pau (ZRO ) tungah Zogamonline in lungdamna lianpi kinei hi.






ZOL:  Chibai! Pu Pau. Nang toh ZogamOnline i houlim theih kipak ung. A patna dingin ZRO tanchin tomkin - ki-vaipuak dan leh sepaih phazah khong non hilh masa thei diam?

Sia Pau: ZRO kivai puakna pen fel hun tawk in ka thei. Democratic tak in aki pai a, zalen tak leh lauhthawnna om lo a ngaihdan (idea) gen theihna Pawlpi ahi hi. Gam le nam humbit ut nam it tuailaite chik lai hun peuh in ki ‘welcome’ den hi.

ZOL. Tuni tanin India ah nam bangzah in Zomi nomenclature a pom thei ua? ZC nuai a unau Gangte-te lutta chih tak simthu mah hia? Kawlgam lamin Zomi a pom thei vek uhia?
Sia Pau: I hihna Zomi ahi. Pom leh pom louh ah aki nga kei. Zomi identity a chiang nai lo pawl khat ki om lai in ka mu. Zomi Council nuai a omteng kia Zomi ahi zenzen kei.

ZOL: Nang huai chi, Kawlgam ah Tedim pau zangte in amau kia Zomi danin leh India ah Paite kampaute’n amau kia Zomi chih dana a ngaihtheih dingin Zomi kammal zang kha nak sek  uhi. Hiai in thil tampi nawngkai sak thei leh kilawm nasa hia?
Sia Pau: Mi dam lo khat minor operation ngai pen major operation kibawl leh a dam lo pen a sih loh tawp in gim mahmah ding hi. Tua bangmah in major operation ngai pen minor operation kibawl leh hoih het lo ding hi. Tua tawh kitawn in minor leh major a khen dan i siam a hun mahmah ta.

ZOL: Mipi lamin khensiam hunta chidan maw.. Ahihleh Pawlpi tup-le-ngim tomkim in non hilh thei diam?
Sia Pau: Re-unification of the Zomi.

ZOL: India gam sunga Tripura leh Assam state khong a Zosuante toh kizopna hoihsem omna di’n pawlpi in panlakna a nei hia?
Sia Pau: Panlak theih dandan in kila!

ZOL: Mipi theihdan in, ZRO objective lak ah “geographical, political and social re-unification of the Zomi” chih ahi. Pawlpi tuppi pen Re-unification ahihna ah, tuni tanin bangtan a lohchinna om ahia?
Sia Pau: Tuhun chiangchiang in Zomi nam sung ah emotional/mental re-unification naktak in a om ta.

ZOL: Khenkhat in international boundary khenkham a Zomi teng huamkim zou Geographical Re-Unification baih lou diing ahihmanin Zomi-te omna mun chiat ah Political Re-Unification mah pibawl zaw in, administrative unit khat nuai ah omsak sawm chiat zaw le chi uhi. Nang bang  ngaihdan na nei a, pawlpi’ tup-le-ngim apat kiakniamna ahi diam?
Sia Pau: Christiante khangthu a revolution thupi penpen bang hiam i chih leh Jesu hong pian ahi. Pasal naupang kum 2 nuai lam teng in sih loh! Revolution pen aman (price) tam mahmah. Tua ding a iki man a poimoh. Banah, Super Power tawi USSR kichi pen 1991 a pan om nawn lo. Politics ah a piang theilo a om kei a, a piang nai kei chih man ahi.


ZOL: Tuma lam deuh akipan in, Manipur a Singtangmi teng huam, Indian Constitution nuai a 6th Schedule Provision a om ding chih thu a ging a. Hiai thu ah ZRO dinna bang ahia leh?
Sia Pau: 6th Schedule Provision pen gam neih na khat chu a hi ve.

ZOL: Manipur leh Mizoram a Zomi pomte luahna mun teng UT a ki etkolna dia panlak ding gen pawl om thei zauh zel abang. Hiai pen ZRO tup-le-ngim toh akikalh kha diam?
Sia Pau: Dawnna 2na en kik nawn mah dih. Mizoram a teng Zo suante ngen ahi uh.

ZOL: Cultural or Social Re-Unification toh kisai ah, ZRO panlakna a om hia, a omleh a tomkim in non hilh thei diam?
Sia Pau: Cultural/social in Zomite a hon khen ngei nai kei. I tawndan/chiindan a kibang a, tua in minam khat i hihna hon sulang hi lo hiam.. Hiai tawh kisai in East leh West Germante ettawn tham a ching kasa. Tuni hun chiang in “Germany” chi in ah kituak tak in a om khawm ta uh.

ZOL: Aleh, tutan ah, overall a etin ZRO tup-le-ngimte bangzah mualsuah ahita a?
Sia Pau: Hunpaisa tawh et-in tu hun chiang in Zomi nam sung ah kipumkhatna a hoih mahmah ta.

ZOL: Zosuan pih – Mizo, Kuki, Chin chihte toh ZRO relationship bang ahia? Kitheihsiamna a om hia? Adiakin unau Kuki bang toh melhaih hun a ana kidou kha i hihna ah…
Sia Pau: Kinei mah ei. Kamsung a ‘lei-leh-ha’ zong kipet kha thei.

ZOL: ZORO, CNA, KIF chihte UN a Indigeneous People Forum khonga member hikhin vekta uh ahi hia? Huailam ah Zomi min a vai sai a om hia?
Sia Pau: ZORO pen Zo Re-unification Organisation chi in sim le chin na hon dotna a hon hilh chian mai diam maw….

ZOL: UPF tungtang ah lut sin le. A Chairman hi’n ko’n thei ua, UPF bang deihna a kiphut khia ahia?
Sia Pau: Zo suante Kipumkhatna leh Political Autonomy.

ZOL: KNO leh UPF kibatlouhna bang ahia? A mite a kibang, kipumkhat theilou a min khat pu theilou lel chih di a diam?
Sia Pau: UPF in issue based in kikal suan a KNO in nomenclature based kal suan in ka thei. Himahleh minam khat Zo suante ngen ihi.

ZOL:  Aleh unau Kuki te’n Kuki State gen uh, UPF in huai mah sen hia ahihkeileh demand tuam nei?
Sia Pau: Political autonomy.

ZOL: India sorkal leh Nagate kihouna toh SoO in kisai khakna a nei diam?
Sia Pau: Nei lo.

ZOL: Video clip khonga i na muh danin Pu Chidambaram in Muvanlai Camp a veh lai in kithahna leh galbawlna tawpsan ding chih khawng leltak a gen abanga, political goal khong houlim kha mah ni u teh maw?
Sia Pau: A “leltak” kia a hi kei a Political solution a hi zaw.

ZOL: SoO pen Indian Army leh Nam Galkapte kikal thukhun chile, Indian Home Minister hilhial in hongveh ahihna ah nautang theih dia genkhiak tuak omlou hia?
Sia Pau: Home Minister hilhial in Zomite Camp hong veh ahih leh Zomi identity ah chiang in kipumkhatna suk hat sem sawm ni.

ZOL: Indian print media ah SoO pen Indian Government leh Kuki underground outfits ngen a kichi a, hiai ah Zomite le Kuki chihdan a ngaih ding a diam?
Sia Pau: UPF leh KNO nuai a om tengteng Zo suante ngen ahi.

ZOL: aleh UPF nuai a om pawlkhatin KNO zom uh chih bang a om zela. UPF nuai ah kuateng omlai ahia? Pawlpi lemsakna mah a va zom uh a diam?
Sia Pau: Koi pawl koi pawl ah om ta le, a mi kibang, tup-le-ngim kibang ngen ihi.

ZOL: UPF sung a pawl khat HPC(D) leh Mizoram Govt. in‘hiamkhamna thukhun’ bawl UPF in a theihpih mah hia?
Sia Pau: Kitheikha mah ei.

ZOL: Zosuante email group/website tuamtuam khawng a minam vai discussions a mimal in ngaihdan tuamtuam a gelhte uh sim kha thou ding hi u china, huaite bang ngaihdan na neia?
Sia Pau: Minam itna leh awlmawhna ziak a ngaihdan tuamtuam gelhte’n i minam hoihna ding in hon gelh zelzel un. Constructive leh destructive kikal bel a kua a kua in khen siam leng a hoih ding.

ZOL: ZRO hi media lam a hatlou a ngohna a om a, akhenin lah bangmah sep neilou ahih chiang ua media lama tangkou ding neilou uh ahi a chi uh. Mipite’n a nasep uh theilou, nam sepaihte’n bang sem a bang buaipih a ding uam chi a lungkiat kampau zak ding omom hi. Bang gennop na nei  diam ah?
Sia Pau: “Paper Tiger” leh “Real Tiger” koi a hoih zaw dia…. ZRO in sun-mang (Day dream) kigengen khawllo a, zohna sa chiang bel kitak lang zel.

ZOL: Leitung paizia leng ahi dinga, kuapeuh materialistic gawp in sum-le-pai deihna lian ahihmanin tuni in kuama’n politics taktak le don nawnlou, pawlpi heutute leh nam sepaihte bangle minam politics sanga mahni lawkna ding ngaihtuah zaw uh ahi chih ngaihdan nei pawl a om. Bang a na comment?
Sia pau: Gilkial ngoihngoih kawm a nasep haksa ei ve.

ZOL: Tunai zekin UNO Khawmpi, Geneva ah Pu Kenneth makaih a vatel om  chih a kiza a. Bang vai ahia, mipite adia mavanna leh kinepna om thei hia?
Sia Pau: Pu Calvin makaih in Geneva Call Seminar ah ki hoh mah hi. Childs & Women Rights tawh kisai a hi a zinna uh.

ZOL: India Zomite Meiteite hakkol apat a suahtak masiah uh khangtou ngeilou ding chih mi tampite ngaihdan ahi. ZRO in bang ngaihdan a nei a le?
Sia Pau: I hakkol puak i theih mah bang in, a sutkhiatna di’n khut kilen in kal suan khawm diamdiam thei le ut huai lua.


ZOL: Singtang dawna i mipihte nektawm zong leh khosak haksa petmah tampi om hi. Government a lah bangmah lamen phalou ahihman un pawlpi lam apan a lamet ding uh pawlpi in bang policy a nei ua, chimawk le.?Sia Pau: A hun leh a din mun et in pan kila.

ZOL: ZNC toh ZRO in bang chi sepkhawm ahia?
Sia pau: A mun tuak uah nam a di’n nasem. Kikalhna bang mah om lo.

ZOL: Burma leh India kikal gamgi venbitna toh kisai in Salphate panlakna phathuai mahmah chih kigen a om a; genbeh ding na nei kha zenzen hiam?
Sia Pau: Zogam vengbit kihi zaw lim ei ve.

ZOL: Tulai politics huihnun dan in Indian Government in Manipur a tribal-te Naga leh Kuki chihlouh mindang vuahlou abatna chiang om hileh a kilawm ton a om hi. Eipawl’ government in hon theiphalou chihna ahi diam?
Sia Pau: Dawnna 19na en kik mah dih.

ZOL: Meiteite hakkol apat suahtakna ngah mateng suakta taktak leh mahni kivaihawmna omthei ngeilou ding chih mitam takte ngaihdan ahi. ZRO in bang paidan a nei a le?
Sia Pau: No comment.

ZOL: Ahihleh, CoPTAM te’n Boundary overlapping thu ah Pawlpi’ dinna bang ahia, non hilh thei diam?
Sia Pau: Zomi/Zosuante luahna gam ZRO in theih tawp suah in a humbit ding.

ZOL: SoO Ground Rules  ah “The constituents of UPF and KNO will abide by the Constitutions of India, the laws of the land and the territorial integrity of Manipur” chih a om. Politics a Zomi-te survive na di lampi omsun Sixth Schedule ahihkeh Article 244A nuai a ki-etkolna chihna hi mai lou maw? Hiai tungtang ah pawlpi ngaihdan/dinna na hon hilh thei diam?
Sia Pau: 6th schedule within Article 244 a huntawk nasa hia?

ZOL: SoO agreement/suai akikaih masak pen in Govt. of Manipur in theihpihlou, akichi. Tu’n tripartite talk akichi nawn a, GoM leng a tel-ta. Hiai tungtang ah kup behnop na nei hia?
Sia Pau: No comment.

ZOL: ZRO electoral politics (MLA/MP/MDC election) ah ki golh lua chi-a  tamtakte hoihsaklouh thu akiza. Hiai tungtang ah gennop na nei hia?
Sia Pau: Gam-le-Nam a dia sem “Palai” tampi neih selo ei ve maw...

ZOL: Kawlgam politics dinmun leh future na muhdan?
Sia Pau: Democracy hoihtak a omna din zaw a gamla lai maithei.

ZOL: Kawlgam Zomite maban, Pu Cin Sian Thang-te ZNC  bangtan tung thei dingin na ngaihsun a?
Sia Pau: No comment.

ZOL: Mimal thil ki dong sin le. Na hun-awl bang chin na zanga? Laisim leh laigelh khong na lunglut hia?
Sia Pau: Ka hun awl a manpha thei pen in ka zang gige.

ZOL: Kawlgam democracy Hong hileh bang na paikik nawn diam?
Sia Pau: ZRO policy ah Kawlgam/Vaigam a om kei. Zogam a om in kaki ngaihsun hi. Kawlgam Democracy ahih loh man a Pawlpi leh Nam a nasem ka hi kei.

ZOL: Mailam ah ZRO Presidenship tuh na sawm lai diam?
Sia Pau: ZRO President ka tuh ngei kei, President hihna kei liangko a hong kinga ahi zaw.

ZOL: ZRO heutu masate toh na ki thuzak zel uhia?
Sia Pau: Kithuzak tham e.

ZOL: Dot khaklouh mipite kianga gennop, vaikhaknop na nei hia?
Sia Pau: I minam hoihzawkna ding a hih peuh leh lauh nei lo in na ngaihdan hoih taktakte uh zalentak in hon gelh/gen/sung zelzel un.

ZOL: Na hun manpha na hon piak manin kipak ung. Hong damsawt inla, pawlpi le hong lamzang semsem hen aw.

Sia Pau: Kei le ka kipak.

Aana' huai lua ding hi hang

Aana' huai lua ding hi hang

I tapidaw suah zawh kum bangzah hi khinzo cih tuat toto le'ng, kikhel hun mahmah ta hi. A taktak in ci l'eng, a pianthak ding(a kikhel ding)in Tapidaw(Christian) a kisuak hi lo a, i pianthak khit( i kikhel khit) ciangin Tapidaw(Christian) a kisuak hizaw hi.

Lam khat panin, piangthak nailo a Tapidaw(Christian)suak ihih leh, Tapidaw i suah khit ciang piangthak le'ng bel hoih mahmah a, ahi zongin a pianthak sawm lah hi khol lo napi'n, tapidaw sungah i omom mawk pen a khiatna mahmah om hetlo a, a hai vai pi khat hi gige hi.

Tua ahih manin, Tapidaw(Christian) i hihna ii a deihna bulpi taktak bang hiam, cih i tel ding kisam lua hi. Eite' adingin a thupi tampite' lakah a thupipenpen in, ka sih nung ciang(Hell maw Vantunggam)koi-ah pai zaw ding ka hiam cih ahi hi. Na tawntung mun ding za-ah-za na kitel takpi hiam?

I theihsa hi. Tapidaw(Christian) ihih manin, vantunggam kitung lo dinga, Jesu i neihna hang bek tawh vantunggam kitung thei bek ding hi. Tu laitak i cih pen, eite' adingin i hun hoihpen hi den hi. Ngaihsun in. Lim takin ngaihsun pha kik in. Tapidaw(Christian)khat hi buang sam a, Vantunggam i tun' loh zawzen ding pen bel, aana'  huai lua ding hi hang. A telsiam dingin Topa'n thupha hong pia ta hen. Amen!

Khazih sungah, David Tuang

Chin State Teelcing NLD leh ZCD

Sanggam Ngaihteng,


Kiteelna result Chin State-ah NLD leh ZCD hong madawk ziak-in naakpi-in mipi kilungdam ciat-hi. Tua kawm-in "C" Party kimelhcip ahihna-zong kilangh-a, tua tung-ah Zomi khenkhat pau-nuam simsim hihang. Tua' tung-ah ngaihsut ding-a kilawm om khading cih mimal muhlehsaanna themcik hong pulaak leuleu-ing. Makaaite thuhilh-nuam cihbang hilo-in mimal muhna pulaak theihna Zaleenna I'lungdeih ahih-tawh kituak-a Freedom of Speech zatsinna ahihi.


Chin State-ah "C Party" te-in mun angahlohna aziak om-a, C khempeuh-in NLD buak-huan, bawhhuan-uh cihna ahihi. Amaute-pen Kawlgam nai-ngan-ye ah kileesak (lulee-seem) mahmahte hi uh-a, Chin State Palaaipi ding-in DASSK-in Pu Chin Sian Thang akoih khaakleh manpower-tawh akhaaktan nading-a ageelkhol hikha mawhlo dinghi. Democracy hong paulam ding-a, meé mah-tawh, mipi tamzaw' thukimna mah-tawh kutna hongbawl khading-hi. 


U Nu-in PM hongngah ciang-in constitution sung-ah, "PM-in State  Palaaipi sehziau thei-hi" cih om-a, Capt, Mang Tung Nung-in mipi' teelna angaak man-in Mindat-te Sing Thang' kiang-ah, "Ka' party-ah hong luut-in, State Palaaipi hongpia-ning" ci-in ama' thu-in koih ziau-hi. Myanma-Nii Myanma-Haan Democracy ahihman-in hithei-hi. Tu-a kiteelna pan-a thuneihna kipiak nading-ah 2008 Constitution dik-in khial taleh zuihding honghi photphot ding-hi, tualo-in thuneihna kipia khollo dinghi, banghanghiam cihleh Gen. Min Aung Hlaing-a kipan gaalkaap ulianpiteng leh national party khenkhat-in "no one is above the Law" cidenta uh-a, "Law" acih-uhpen 2008 C-mah hilel-hi.


Thuneihna kisaankhiat nading zungpi-pen 2008 C-tawh kituak-a sepsuahding cih-tawh kalding mitmuh hi-a, tua thukimna limkaih masiah thuneihna kipiakhia khollo dinghi. Thuneihna NLD-in angah masak loh-in Constitution puah/laih theilo dinghi. Hih kaalthu biilbialte baan-a, NLD makaaipi DASSK' thu bek-tawh Chin State Palaaipi ding hong sehkip zenzenleh NLD gun asilhziau C te-in naakpi-in hong kitom ding-a, democracy lamzing maan hongkal deep dinghi. "Bangmah lawhzo kenteh" cihding hikhin loding-a, thu-pen thu mah-tawh vaanveng hong kisam veve khading-hi.


Zomite-pen thu khatpeuhpeuh-ah hi kisa baihlua pahpah, tagah nawi-muh pahpah thei hang-a, bangmahpi ahilo agentehna mawkmawk-in naute-in saanginn khawng pan-a hongngah "participation award" cianglel nangawn "award" thupi-keei bang-a ataangko gawppaat, citizenship certificate-khawng kawmtung-a asuang leulau, cert 1, 2, 3 khawng asuang lenlan phadiakte kihi sese-a, masuan khatpeuh aliim avaang, agimnam nangawn I' diik ma-in I-uangtat zeel man-in I-tawntun ma-in thusia-in honglawh theizeel-hi.


Zomi-pen Nampi ahih nading-in amihingte-in nampi lungsim-tawh kampau gamtat aneih siamding ahihi. Thu omzia, thu paizia, khuahun kiheizia lungngai thei-a, nampite' kidop bang-in tapkual-a ciakciak-a hi kisakna ciangbek-tawh hilo, minam zil-a hong langpan mite' geelna bang-om cihte kansiam-a theih akuul ahihi. Tua ziak-in gamliante-in intelligent koikoi-ah akoih diimdiam-uh ahihi. I' langte-in bang geel, I' gaalte-in bang ngiim cihte theilo-a kipummuanna-in minam cimh sakding ahihman-in thukan akikoih ahihi. Zomi sung ahzong Zomi-mah ahihkeileh Zopau asiam mahmah Laimite' thukan om luading-a, amau' lak-ah ei' khah thukan I-neih I-neihloh cihte naakpi-in thupi dinghi.


Kiteelna-ah C adawkloh-pen Laimite patauhtuak vetlo lel-a, thu khat hongpiangleh alampi ding-uh muhtuak mahmah lel-hi. Tua ahihman-in C hong dawkloh ziak-in kipummuan gawpding hilo zaw-a, kidop mahmahding hoihzaw khading cih mimal muhna ahihi. Mualmi thautawi kipawlna pan-in aki-khawlsak pakna khawngzong amau patau hetlo-a, amau' Kawlngian mah-tawh bangciang phuding cihte lamzing nei kisa mahmah khalel dinghi. Nguncunglian nangawn tuni dongmah Naypyitaw-ah innteek laai lel-a, ei' kipummuan gawpding sang-in hihbang mite etcik siam kisam zawtham cihna ahihi.


Zomi-pen kambek-tawh "Pasian" cih kipaksak mahmah-a, Pasian' deih zialehtongte kisin nuamlo zaw-in, Pasian' muhdah mahmah duhhopna, angsungtheihna, kiphatsakna, kiliatsakna, meigong tagah daaipaamte thu-a simlohna, zuaugenna cihte-tawh tualbial zihziah laai hihang. Minam vaai hitaleh, biakna vaai hitaleh kiukna vaai hitaleh thumaan cihtakna taktak-tawh thukhual-a thugen lasak siamding, kiimlehpaam-ah khuadaak zek-a, thugen lasak kidop siamding naakpi-in kisam-hi.


Zomi leh Zomi sung-ah ahihleh suakta tak-a lungdeih kisun/kigen ziahziah poilo-hi, thuhoih-hi, ahizong-in namdangte' muhna/zaakna-ah gending sakding giikhun siam-in, kimuanding akisap mahbang-in kidopding athupiitna phawk-a kalsuan theihding lunggulhna-tawh I-gelh ahihi. "Buiipi leikeii inzong khua ngaisung" paunaak phawkthak nihang! Deihdaan akituak keileh akituak theiding-in haanciam ciat-ni!


Zomi Pasian' Thupha!


Zokhai

Tawmging Beh Khang Tangthu Hawm Nih Na

THU MASA

Tawmging beh pu leh pate in beh laibu neih zawh nadingin 1951 kum a kipan kimuhkhopna nanei zel zel uh hi.1958 kumin Tedim leh Leilum a om Tawmging beh teng in kikupna na nei uh hi. Tedim PartyUnit zumpi panin lai nambat 230/3/U, 23-3-1969 tawh Zomi khempeuh in i piankhiatna beh leh phung tangthu leh kizop ki nainate kaikhawm a Tedim Party Unit zumpi ah puak ciat dingin na ngen hi.Tua hun lai a i beh makai Pa Pau Za Gin leh Pa Khai Za Kham makai-in beh sung thu kikupna na bawlzel uh hi. Beh kikhop nunung pen 1971 kumin Saizang khua ah na bawl uh hi. Tua ki khopna pancommittee teel in kum thum sung thu leh la na kaikhawm uh a, 1973 May 16 ni-in a khatveina Tawmging beh laibu hong bawl khia zo uh hi.Hih 1973 beh laibu pen tu in kum 30 val hong sawt to ta hi.

　

Khang thak min kikhum nailo zongtampi hong om ta hi. Hih beh laibu dapphah in khangthakte in tangthu nakpi takin hong kan khia uh a,thumaan pawl khat muh beh in guan beh ding zong tampi mu uh hi. Tua hi aa 1973 beh laibu sung pana maan lo thute puah pha in, a kisam teng behlap in, a tamluate khiam in, a sauluate a kitomlak ahi hi.Ta upa khanggui bek hi nawn lo-in ta numeite, i makte i mote a beh min tawh a kikhum, a cing zawlaibu hong kibawl ta hi.

　

Pupi Tawm Ging ta pasal gukte sung pan u zaw nau zaw vai, hausa vai, pupi’min Tawm Ging a dik zaw a hihna a kipan thu thak tampi zong kibehlap hi.Beh laibu bawlna a hangin u sung nau sung kinai zia kizop zia theih nading hi a beh dangte tawhkitelkhialhna a piang sak thei ding, gal thahna, gal matna, gal-aihna te leh tua tawh kisai la kiphuaktea hi thei zah in kong guang nawn kei uh hi. Beh sung thu piangte zong thu maan theih nading ciang bekin a tomno in kong gelh uh hi.

Lo khawh singpuakna, samat sa-aihna tawh kizom gawh leh luptekong guang uh hi. Galkap sung ulian, kumpi nasem ulian, pilna lam degree ngahte leh gual tung atuangte hong kiguang hi. Zomite piancilna, sakhi Tawmging hong pianna leh behsung tulpigui lehtultawi thute tutung beh laibu pan kihemkhia kik hi. Mailam hun ah thumaan pen kiselcip thei lo hi, ahi mah hi i cih theih kim hun ciangin suah sak theih dingin kikem phot hi.Zomite i lai ui-in hong nek sak (Jew lai Sen kumpi-in hong sukmang sak) a kipan Zo tangthu pen lai tawh kiciamteh hi nawnlo a, a khang a khangin kam tawh kigen sawn a hih manin ciapteh dan,theih dan kibang lo tampi om ding hi.

　

Hih laibu sunga thute zong zakhat ah zakhat (100%) maansinsen ding kici thei lo hi. Pansan kician takin tu a sanga tangthu a maan zaw a thei i om leh mailamhunah puah pha toto ding hi hang.Khanggui hi taleh degree ngahte a kipan thu tuamtuam hong kipuak teng bek kisuaksak hi.Hong kipuak lo, a suakkha lo mi tampi ki om lai ding hi. Hong kipuakte zong laibu bawl hunsawtpi hia behlap ding tampi om khin ding hi. Tu a nihvei bawlna behlaibu in Kawlgam sung bek ahuam zo pan ahi hi. Mailam hunah sim leh mal, leitung bup a huam behlaibupi khat i bawl zawh nadingi lunggulh mah mah hi. Laibu khat bawl khiat nading haksa mahmah a, mawhna zon ding leh gensiatding lamsang bel baih mahmah ahih manin kicinlahna khempeuh hong theisiam a, nong mai sak nadingunzahtakna lianpi tawh kong thum uh hi.

　

Laibu bawl CommitteeTawmging beh laibuMarch 2008.

Tawmging Beh Khang Laibu a Nihna by Zomi National