Tedim X-ray vai dawnkikna

X-ray Vai: Kumpi te'n hong dawng kik
Tedim zatopi a X-ray vai pen X-ray kizaih nuamte ava pai ciangin omlo lemlo niloh ahihmanin mipi in X-ray set ngiat omlo sa uh a tua thu ki nak genmun mahmah hi.
Tu'n Tedim zatopi a X-ray lam a len Niang It Nuam kahi a kici khat in X-ray pen amang hilo a, a sia hi ci hi.
Sia cici pongin sum piasimte zaih sak uh hiam? 
Sia takpi mah hiam? 

A sia ahih leh zong X-ray kizaih ding kisamte kiangah banghun ciang hoih ding cih a hilhcian uh hiam?
cih thu bel bangmah kithei nailo hi.
Facebook mipi mai ah i luikhiat a, thunei te'n hibang a hong dawng kik uh zong phatuam mahmah khin cih ding hi.
Mipi bel nidang sangin hong zahtak zawdeuh ta uh cih ding hi.
Siema nu i hong dawng kikna anuai a bang hi.
A min bel Kawl ngapik lai tawh gelh viaivuai se ven. ေညာင္ အစ္ ႏြမ္း ci.
.---------------------------------------------------------------------------------------------------------------
" Kei ka min Niang It Nuam hi. Tedim Zatopi ah ဒု ဦးစီး ရာထူး tawh ဓာတ္မွန္ ဌာန ah ျပည္သူ႔ဝန္ထမ္း ka sep laitak hi. Tedim Zatopi X-ray set mang a cihpen thuzuau hi. X-ray setpi om mah in,tulaitak a kizangh theilo,a kisiat laitak hi. X-ray machine cih te pen,a ki tuah kawikawi thei dinga van neu a hih loh lam mipawl khat in a theih uh hangin, pawlkhat in theician lo a hih man in,vaipuak nei khat ka hihna tawh kong dawng kik hi.
Hih dan lai khah khia te tungah kong thum nop khat om in, tua in thu leh la te na khahkhiat maa un hoihtak kantel masa un. Khuaknei pawlkhat in, hih thu hithei in teh,hithei kenteh cih a ngaihsut theih uh hangin,khuak neilo,khuak zangh meel lo pawlkhat om i hih manin,a kigen peuhpeuh a um pawlkhat om i hih man in,hih dan lai nong khahkhiat uh ciang ong telcian phot un. A maan i genkik hangin, a thu manlo a simkha khempeuh in, a thuman kigen kik pen na za kha lo thei a hih man hi.
.
A hih theih dingleh hih na lai khah khiat pen zong a thumam hilo ahih teh nong phiat kik sak ding ong thum ingh. Lungdam.
(A telcian in na theih nop leh/gen huai na hih leh/ ong dawngkik dingin kigingsa in om ingh.)
-----------------------------------------------------------------------------------------------
Mipi dongkholhsak thei kumpi zumte leh nasemte vai a om leh pholak khia pahpah ni.
Bilnuai sak zeel leng hong pil ding uh hi.

Zomi Media Council Formation Committee

Zomi Media Council Formation committee kiphuan

2016 March 1 & 2 sung ZCLS zum Kalaymyo ah Zomi media nasemte pawlkhat kimuhna kinei hi. Apai khempeuh in Kipawlna neih ding hoih kisa ahih manin Zomi Media Council ဇိုမီးမီဒီယာေကာင္စီ formation committee (ယာယီေကာ္မီတီ) kiguang hi. 

President - Rev Dr Khen Za Sian (Zo Aw)
President 1- Rev Hau Khen Kham (ZCLS)
President 2 - RevThangVanLian(Tedim Post)
Secy   - Rev Dr Lang Khan Khai(Zomi Times)
Secy 1 - Sia CinSuan Mang (Zo  Aw)
Secy2-Sia Khen NgaihKhup(Zomi Post) 
Treasurer - Pa Khual Za Nang (ZCD/Zo Aw)
Finance Secy - Sia Kham Do Dal (ZYA)
Member - RevCinNgaihThang(ZACC/ZBCM)
Member - Paupi (Tongsan)
Member - Rev. Dr. Nang Lian Kap
Member - Sia Mung Kim Sing (ZNCM Secy)
leh Zomi media khat ciat panin member kila kik ding hi. 

Zomi Media Council in Myanmar Press Council ah Registration kipuak ding hi. Constituion & bylaws abawl dingin Rev Hau Khen Kham; RevDr Lang Khan Khai leh Rev Cin Ngaih Thang kiseh a; March kha sungin hong zosiang ding hi.

Dr. Lang Khan Khai

Political Science ngah Lungdampihna

Zomi minam vai ah mimuan huai gige khat ahi Pu Tual Khan Suan Tongciin khuami in a teenna Tennessee ah Political Science tawh Middle Tennessee State University pan hong Graduated a hih manin lungdampihna kong tangko hi.

Pu Tual Khan Suan (Suanpi) pen Tennessee Zomi sungah makai hong semsem zel aa, tu laitak Zomi Innkuan USA gam sungah Vice President a sem laitak ahih ban-ah Zomi Innkuan Tennessee ah Secretary a sep laitak zong ahihi. Kawlgam ah B.A zo khin hiam khat in ka thei aa(a hih keileh ngaidam), Lailam ki va mahmah khat leh mi ci taktak mahmah ahihna a sang kahpih Rev.Ciin Sian Khai Th.D in USA ah hong pai lai-in hong gen ngei hi.

Galkap ki-ukna pan suahtakna dingin:

(i) All Burma Students' Democratic Front (ABSDF) kipawlna leh,

(ii) Network for Democracy and Development (NDD) sungah kipum piak in Kawlgam a ding na sem tinten hi.

Political lam ah Zomite thahat semsem in Zogam Zomi hong khangcing sak ding Pasian in a tate Tha hong dim kikta hen. A lungdampih...

Thawn Tuang
Nashville TN USA
Dec 27,2015

KHITUI GOSPEL SILVER JUBILEE Pawipi Nuamtak in kizo thei

Pasian phatna a kineih khit ciangin Rev. Thang Go Khup in hun apna thungen hi. Amah pen Sia Do Khup Tedim gam sung a vak theih nadingin PHALNA LAI a piapa ahi hi.

Rev. Hau Go Kham in Silver Jubilee KONGPI honna nei a, mutpuak leng khahkhiatna zong nei hi. Mutpuak lengte a mu kha penpenin Jubilee thupha a san theih nadingin sum bangzah hiam ciat tawh kilengsak hi.

“Dawn un Jesu min vangliatna” cih la a kisak kawmkawmin Evan. Langh Do Khup in a pianthak tunglai, a zawn mahmah laitak a, Singgial khua khung a, a phuh uh Singlamteh Sesing gil pua hi. Evan. Thang Khan Khen in Khitui Gospel Dialkhaipi tawi a, Singlamteh tawh a kikimin pai masa uh hi.

A nungthuapin Khitui Gospel pan mahin Evan. Lian Min Thang leh Evan. Cin Khaw Lian in Jubilee ZAM zawng uh hi.


A nungah Church Pastor Rev. Hau Go Kham leh Pastor 25 (Tuiphum, ZBCM, AG, RC leh pawlpi tuamtuam pan) in zui uh a, Pastorte nungah Khitui Gospel Innkuante, mipite in zui uh hi.

Singlamteh leh Dialkhaipi pulpit langkhat tuak ah kiphut a, pulpit mai ah ZAM puate ding uh hi. Pastor 25te in ZAM khatvei ciat tum uh hi. Tualaitakin pulpit mai a, meivak 25 a banban kitangsak diamdiam hi.

Pasian’ mizat ahi dingin Topa in Khitui Gospel tungtawnin sathau a nilh Evan. Nang Do Kap (Sia Naa Kap hong nusia khin) Evan. Tuan Kim Thang, Evan. Thang Khan Thawn, Rev. Langh Za Kapte sung panin Rev. Langh Za Kap leh Evan. Thang Khan Thawn in Khitui Gospelte Pasian in a zatna thu gen uh hi.

“Tuan a sinthu sut leng maw” cih la a kisak laitakin Khanlawhna lianpi khat tung ahih manin Evan. Langh Do Khup kapin leilakah bok hi. Pastorte pawlkhat zong pulpit kah to uh a, Khitui Gospelte thupha pia-in Singlamteh pua uh hi. Mi tampi kapin Topa tungah lungdam ko ciat uh hi.

Evan. Langh Do Khupte nupa kiten zawh kum 30 cinna hun tomno khat lungkim huai takin kizang hi.

Topa tungah lungdam kohna Bawng 5 leh Vok 5 kigo a, pawisim mipi 1000 valin ankuang um thei hi. Pastor teng Ngalsa tawh kituam vak ngiat hi.

Khitui Gospel Media

Dr. Cing Pum Nem (a) Siamah Cingkok

Kum 50

1. Nu le pa' min: H. Suan Kam & Nu Thian Huai

2. Suah ni : Nov 15, 1965, Tedim Khuapi 

3. Pilsinna:
# 1986 Mandalay University 
# 1994 B.Th, Eastern Theological College, India
# 1997 B.D, Eastern Theological College, India
# 2001 M.Th, Kolkata
# 2010 Ph.D in Development Education, Central Luzon State University, Philippines

4. LbBC ah Christian Social Service Department 2010 pan 2014 dong makaih. 

5. 2014 pan STBA Women Department le CE Christian Education ah makai sem.

6. Tuni dong STBA , WD, CE ah director sem

7. TTBYU ah secretary sem ngei
8. TTWF ah mapang
9. Tedim Local GZA ah secretary sep laitak

10. Pianpih sanggamte:
1) Rev. Nang Khen Khup
2) Ning Khan Vung
3) Cingh Khan Niang
4) Sian Zuan Cing
5) Lian Khan Pau
6) Dr. Cing Pum Nem
7) Nang Gin Hau
8) Sian Dim
Src:TedimPost

ZRA N.Thawn Kho Gin in hong nusia

ZRA first batch lak a dam lai om sun N.Thawnkhogin @ SirJudson in hong nusiatsan ta.

Dec.18, 2015: Zomi Revolutionary Army (ZRA) Chief of Army Staff len ngei, N.Thawnkhogin @ Judson, Pearsonmun khua a om in hun bang tan hiam kalna a thuak khit nung in tu ni in RIIMS zato inn, Imphal ah hong sihsan ta hi. ZRO/ZRA a kiphuatkhiat nung adingin training masa pente lakah tukum tan in N.Thawnkhogin bek dam lai hi ki ci a, Mizoram leh Burma gamgi a om Tuisa dung ah 1993 in ZRA dingin first batch ten training nei uh hi ci'n ZRA Town commander in PhualvaTimes kiang ah tuni takin gen hi.

ZRA adingin a Senior pen Judson in pawlpi adingin a sep sungin hun haksa tampi palsuak hi ci'n kigen a, kikaptuahna ah a bil thautang in kapkha in, a liamma pawn zong muh theih in om lai hi kici hi.

Tu kum sungin ZRA makai poimawh mi 3 kiim in dam lohna hangin hong sihsan ta uh hi. RIMS Hospital a kipanin Sir Judson' luang puakkhiak in om a, a zi-le-tate tawh a tenna Pearsonmun ah kipuak hi. Tu nitak in mipi ten siluang zan hah pih ding uh a, zing ciang in Pearsonmun Hanmual ah kivui ding hi.

Apaisa June 16, 2015 in Thang Len Piang @ Siapiang s/o Cin Za Khup & Ngai Khan Mang of Tonzang, Chin State, Burma in hong nusiatsan a, aman ZRO Ministry of Information & Public Relation ah Director za len a, Shija Hospital ah sinna in si hi. Tua khit a sawt lo June 23, 2015 in ZRO Ministry of Information & Public Relation a Director len Ko Danny Mang Khan Khup (s/o Luah Thawng & Cing Za Lian, Tedim) in hong nusiatsan kik leuleu hi. Tu ni in ZRA first batch lak ah tuni dong pawlpi adinga sem om sun Judson in hong nusiatsak kik hi. 

Topa Pasian in a kha na tawldamsak ta hen la, hehnem siam Kha Siangtho in i dahna leh i kahnate hong hehnem tek ta hen!

Thang Khan Lian