Kiteelna result Chin State-ah NLD leh ZCD hong madawk ziak-in naakpi-in mipi kilungdam ciat-hi. Tua kawm-in "C" Party kimelhcip ahihna-zong kilangh-a, tua tung-ah Zomi khenkhat pau-nuam simsim hihang. Tua' tung-ah ngaihsut ding-a kilawm om khading cih mimal muhlehsaanna themcik hong pulaak leuleu-ing. Makaaite thuhilh-nuam cihbang hilo-in mimal muhna pulaak theihna Zaleenna I'lungdeih ahih-tawh kituak-a Freedom of Speech zatsinna ahihi.
Chin State-ah "C Party" te-in mun angahlohna aziak om-a, C khempeuh-in NLD buak-huan, bawhhuan-uh cihna ahihi. Amaute-pen Kawlgam nai-ngan-ye ah kileesak (lulee-seem) mahmahte hi uh-a, Chin State Palaaipi ding-in DASSK-in Pu Chin Sian Thang akoih khaakleh manpower-tawh akhaaktan nading-a ageelkhol hikha mawhlo dinghi. Democracy hong paulam ding-a, meé mah-tawh, mipi tamzaw' thukimna mah-tawh kutna hongbawl khading-hi.
U Nu-in PM hongngah ciang-in constitution sung-ah, "PM-in State Palaaipi sehziau thei-hi" cih om-a, Capt, Mang Tung Nung-in mipi' teelna angaak man-in Mindat-te Sing Thang' kiang-ah, "Ka' party-ah hong luut-in, State Palaaipi hongpia-ning" ci-in ama' thu-in koih ziau-hi. Myanma-Nii Myanma-Haan Democracy ahihman-in hithei-hi. Tu-a kiteelna pan-a thuneihna kipiak nading-ah 2008 Constitution dik-in khial taleh zuihding honghi photphot ding-hi, tualo-in thuneihna kipia khollo dinghi, banghanghiam cihleh Gen. Min Aung Hlaing-a kipan gaalkaap ulianpiteng leh national party khenkhat-in "no one is above the Law" cidenta uh-a, "Law" acih-uhpen 2008 C-mah hilel-hi.
Thuneihna kisaankhiat nading zungpi-pen 2008 C-tawh kituak-a sepsuahding cih-tawh kalding mitmuh hi-a, tua thukimna limkaih masiah thuneihna kipiakhia khollo dinghi. Thuneihna NLD-in angah masak loh-in Constitution puah/laih theilo dinghi. Hih kaalthu biilbialte baan-a, NLD makaaipi DASSK' thu bek-tawh Chin State Palaaipi ding hong sehkip zenzenleh NLD gun asilhziau C te-in naakpi-in hong kitom ding-a, democracy lamzing maan hongkal deep dinghi. "Bangmah lawhzo kenteh" cihding hikhin loding-a, thu-pen thu mah-tawh vaanveng hong kisam veve khading-hi.
Zomite-pen thu khatpeuhpeuh-ah hi kisa baihlua pahpah, tagah nawi-muh pahpah thei hang-a, bangmahpi ahilo agentehna mawkmawk-in naute-in saanginn khawng pan-a hongngah "participation award" cianglel nangawn "award" thupi-keei bang-a ataangko gawppaat, citizenship certificate-khawng kawmtung-a asuang leulau, cert 1, 2, 3 khawng asuang lenlan phadiakte kihi sese-a, masuan khatpeuh aliim avaang, agimnam nangawn I' diik ma-in I-uangtat zeel man-in I-tawntun ma-in thusia-in honglawh theizeel-hi.
Zomi-pen Nampi ahih nading-in amihingte-in nampi lungsim-tawh kampau gamtat aneih siamding ahihi. Thu omzia, thu paizia, khuahun kiheizia lungngai thei-a, nampite' kidop bang-in tapkual-a ciakciak-a hi kisakna ciangbek-tawh hilo, minam zil-a hong langpan mite' geelna bang-om cihte kansiam-a theih akuul ahihi. Tua ziak-in gamliante-in intelligent koikoi-ah akoih diimdiam-uh ahihi. I' langte-in bang geel, I' gaalte-in bang ngiim cihte theilo-a kipummuanna-in minam cimh sakding ahihman-in thukan akikoih ahihi. Zomi sung ahzong Zomi-mah ahihkeileh Zopau asiam mahmah Laimite' thukan om luading-a, amau' lak-ah ei' khah thukan I-neih I-neihloh cihte naakpi-in thupi dinghi.
Kiteelna-ah C adawkloh-pen Laimite patauhtuak vetlo lel-a, thu khat hongpiangleh alampi ding-uh muhtuak mahmah lel-hi. Tua ahihman-in C hong dawkloh ziak-in kipummuan gawpding hilo zaw-a, kidop mahmahding hoihzaw khading cih mimal muhna ahihi. Mualmi thautawi kipawlna pan-in aki-khawlsak pakna khawngzong amau patau hetlo-a, amau' Kawlngian mah-tawh bangciang phuding cihte lamzing nei kisa mahmah khalel dinghi. Nguncunglian nangawn tuni dongmah Naypyitaw-ah innteek laai lel-a, ei' kipummuan gawpding sang-in hihbang mite etcik siam kisam zawtham cihna ahihi.
Zomi-pen kambek-tawh "Pasian" cih kipaksak mahmah-a, Pasian' deih zialehtongte kisin nuamlo zaw-in, Pasian' muhdah mahmah duhhopna, angsungtheihna, kiphatsakna, kiliatsakna, meigong tagah daaipaamte thu-a simlohna, zuaugenna cihte-tawh tualbial zihziah laai hihang. Minam vaai hitaleh, biakna vaai hitaleh kiukna vaai hitaleh thumaan cihtakna taktak-tawh thukhual-a thugen lasak siamding, kiimlehpaam-ah khuadaak zek-a, thugen lasak kidop siamding naakpi-in kisam-hi.
Zomi leh Zomi sung-ah ahihleh suakta tak-a lungdeih kisun/kigen ziahziah poilo-hi, thuhoih-hi, ahizong-in namdangte' muhna/zaakna-ah gending sakding giikhun siam-in, kimuanding akisap mahbang-in kidopding athupiitna phawk-a kalsuan theihding lunggulhna-tawh I-gelh ahihi. "Buiipi leikeii inzong khua ngaisung" paunaak phawkthak nihang! Deihdaan akituak keileh akituak theiding-in haanciam ciat-ni!
Zomi Pasian' Thupha!
Zokhai
0 Komentar