Bangzahta a hih Singapore phuanpa kizahtak hiam? Banghanga hihzahta a kithupi bawl, kiphawk, kikin hiam?
Aman Singapore a niam mahmah a kihhuai leh buan nam likliak duum lak panin leitunga khuapi siangtho pen leh a tee kelkel inn golpipi kilamna gam, pak hoih nono a pak sitsetna khuapi suaksak hi. From Third World to First ciin a hanciamna laibu tawh gelh in hawmkhia hi.
1. NDP 2012 Zangkhawm: Kum 2012 kumin Singapore National Day a cih uh August 9 niin ko nupa zong ND Parade et theihna dingin ticket ka ngah uh hi. Cingpi tawh nitak pai baih in ka tutna ding uh tutphah kihawmsa ah ka tu uh hi. Nitak nai 4pm ciangin thakhat thu in mipi hong awng veva in, khut kibeng ziahziah a, ka mai vua TV screen golpi ka et uh leh Lee Kuan Yew NDP ah hong tung lian a khut lam a mipi a maitai laitak ka mu uh hi. Koh zong dingto pah in ka khut uh bengin ka awnggawp pong uh hi. Mihing 22,000 kiim khawng kiawng ziazua hipong a, a gualnuam theithei in a kiom nuam hipong hi. Ahi zongin hih Singapore phuanpa gam suahtak ni hunbawlna ah hong kihel cih pen mipi khempeuh in a lungdam uh leh a angtang mahmah uh khat ahi hi. Banghang hiam cih leh aman Singapore a bulpan panin hih ciangah lam'to a, a gah khum mahmah a gammi khempeuh in ne ziahziah uh hi.
Ko tutna pan inn dung khat tan khawngin kinai mah leh a khut ka va len ban kei uh a, biakinn khat sunga kikhawm bangin ka mu thei uh hi. Kimu ban in ahi zongin kiho kha lo, kiho banlo, khut kilen kha lo ahi hi. Zomi khat tawh khut kilen kha lo in hong nusia ahi hi. A tapa Lee Hsien Loong (Hsien = etteh huai, illustrious; Loong = sente gulpi sam nei, dragon) tawh bel khut kilen, anne khawm, bawhlung lot khawng kimawl khawm kha khin ing.
2. A Gam A Lam Zia: Banghangin Lee Kuan Yew, a tomin LKY kici pa pen hizahta in a gam puahzo hiam cih leh a lup, a ihmut sung simloh a gam mailam ding, a gam khantohna ding bekbek ngaihsut in a nei khat ahih man hi kici hi. Prime Minister a sep sung, kum 31 sung khempeuh zingsang nai 3:30am in lum pan hi kici hi. Khuasung vak in lampi ah nahteh keu kia mu leh zong kunsuk in tawm a ninbawm ah pai hi. Lampi ah cialgiat (chewing gum) kipai khawng a muh zel man leh khuasung khuamtung, meileng sung khawngah kibelh mu zel ahih manin Singapore ah Chewing Gum khai phalloh cin kham bikbek hi. Leitungah hih gam bek a tuaci hi. Singapore adinga hoih khat a muh nak leh la in zanga, singkung, pak, khaugui nangawn Singapore ah suan leng etlawm inteh a cih peuhmah a khualzinna pan ciahpih in a gam zeem hi.
No corruption: Nekguk, golhguk sum la cih bang peuhmah a omlohna dingin hanciam a, kumpi sung siangtho sitset dingin hanciam hi. A nesim, golhguk la cih bang a om peuhmah leh khumcip, liausak, a kul leh sihna thuaksak lel hi. Tua zaha a hih manin a neupen pan a lianpen dongin thuman tawh gamtat ding bek hanciam uh hi.
Meritocracy: A pil a siam peuhmah lamto in a tuate mah in a haksate sem in khasum zong tam sangsak a, a niamzaw deuhte huhsak in domkang sak hi. A hau a zawng deidan lo in mimal siamna, mimal hihtheihna, mimal septheihna zah tawh kituak in thaman pia hi. Tua ahih manin a pil peuhmah a kum a naupang hangin nasep lian kiguan in a sem thei peuhmah nasep ding tam kipia hi. Mikim in amau sep theih ciat semin tua tawh kituak in thaman a ngah uh hi. Tua manin meltheih mana kideihsak cih bang om theilo a, kizopna hoih neih mana ulian suak pah cih zong om lo hi. Amau sep siam zia tawh kituak in thaman kipia himawk hi.
Open society: Minam neu leh milip tawm cih manin kuamah kideidanna omlo a, mi khempeuh a kibangin pilna zong thei, a biakna zui thei, nek zonna nei thei ahi hi. Minam lianzaw leh mihing tamzawte in a tawmzawte simmawh in nengcip cih bang omlo a, minam khempeuh kizahtak tuah diamdiam in a teng khawm uh hi. Minam khempeuh in amau pau, lai, ngeina, biakna suakta takin zuun, puah, lamsang, zang thei uh hi. Leitung mun tampi ah tua bang hamphatna kingahlo hi. Tua ahih manin Singapore pen pak huan sungah pak namkim kilawm takin a pak dimdiam tawh kibang hi. Minam khempeuh kizahtak tuah, eima minam ciat kipuah thei hi. Zomi 400 khawng a om teng bek zong a inntekte zah in ka kineisak phial uh a, gamdang pan Singapore kilut ciil hi cih lungsim kinei hetlo hi. Tua bang mikhual lungsim, milip tawm hi hang cih lungsim kinei vetlo in inntek lungsim kinei sitset hi. USA tawh a kibatna tua hi, ka ci hi.
3. Nopbawl Uang Zatlo Hi: Mihau hi ing cilo, kumpi hi ing cilo in a kisamlo ahih leh nopbawlna cihte uangbawl vetlo hi. A nu leh pa hun laia a sing inn mah vuah a sih dong teeng a, kumpi inn Istana om napi a tate tua ah tenpih lo hi. A tate in nopbawlna uangbawl kha leh cih a lauh manin leh kingeksak kha unteh, ulian ta ahih na uh kiphatsakpih kha inteh, mi lak ah kitungnungsak nuam kha unteh cih a khualna tawh amau inn mah ah a tenpih hi. A sih dongin a annekna tutphah singpek tawh kibawl hi a, a laisimna dawhkan zong singpek tawh kibawl hi in a tungah limlang khat phah ziau a, vangil, puan, van manpha cih khawng tam zat vetlo hi. A annek zong inn ah kihuan tawm ne ziau in hotel minthang ah sum tampi bei in ne ut lo hi. A neu tung pan a sih dongin a nek ngei namte bek mah ne lel in nop nek deuh, limbawl deuh cih zong om tuanlo hi. A nuntakna dingin ne lel a nopbawlna in zanglo hi.
Puansilh zong tam neilo in puantungsilh bang a kek leh khui, phopsak in a silh theih laiteng silh toto lel hi. A khedap a vang leh khuisak a, a pheituam a kek leh khui kik phot in a zat theih laiteng a thak leina in sum mawk zatlo hi. Mite in a ciil sa kha thei ding hi. A ciil hilo in a kisamlo vante ah sum a beisak ding kul a salo hizaw hi.
Khatvei a Minister Sidek Saniff China gam ah khualzin dingin sawl hi. China gam pen khuavot ahih manin puanlum ken ding kisam hi. Tua minister kiangah:
"Puanlum na nei hiam?"
"Neilo, ka lei kul inteh," ci hi.
"Lei kul kei, Ahmad Matter kiang pan kawm lel in."
"Tua leh khedap na nei hiam?"
"Neilo"
"Tua leh Goh Chok Tong in nei hi, ama a kawm lel in," ci leuleu hi. A kisam lo ah sum bei kullo hi cih a ngaihsutna ahi hi.
4. Kha Pet Teta: Singapore pen amah guak in a om khat hi in Japan te in mikangte tung pan a suhsak khit ciangin mikangte in suhsak leuleu a, Malaysia tawh a tuam tuak in om uh hi. Singapore pen ngasa matna khuata no khat ahih lel manin Malaysia tawh a kizop a gam khat a suah kei leh neulua mahmah ahih manin cihthamlo ding hi cih thei hi. Tua manin Kumpinu gamkek ukna in a nusiat ding ciangin Malaysia tawh kigawm ding a lunggulh hi. Malaysia tawh kigawm leh gam golpi khat suak dinga bit ding cih a thei hi. Kigawm takpi a, ahi zongin sawt omkhawm lo uh hi.
Malaysia Prime Minister Tunku Abdul Rahman in Kuala Lumpur khuapi a Parliament ah a thugen, Malay pau in, a zak ciangin hihpa ni khat ni ciang PM hong suak dinga hih gam golpi zong hong uk ding hi cih thei ahih manin a manlang thei penin Singapore pen Malaysia pan a hawlkhia hi. A mikangpau a genna ah 'khuaipheng banga atkhia' (hived out) ci hi. Malaysia pan a kihawlkhiat ciangin hih khuaneu, dumlak, thokang leh namsia tamna gam, ngasa mante giahpakna buk leh thosi thovai munpi pen bang suakta ding cih a ngaihsut ciangin haksa sa lua mahmah in, a khasiat suak a, a kihawlkhiat pen na sa lua mahmah ahih manin a khitui luangin thuthak kante mai ah a khitui nul in a kap khia hi. Ka nuntak sung tawntung ka lam Singapore hih banga hong kibawl ciin na sa mahmah hi. Tua pen August 9, 1965 ahi hi.
Duum lak, buan lak ah Singapore om likliak a, Malaysia in huhlo bek thamlo Indonesia ah galkap huhna a nget uh leh tua kumpite in kapzan dingin na vau lailai uh hi. A sawtlo in Kumpinu galkapte in zong Singapore nusia ding ahih manin 2 infantry regiment bek hunlo lua ahih manin a lungkham mahmah hi. Ahi zongin a gam sung tangval kum 18 tungsiah peuhmah kum nih sung galkap sem ding ciin thukhun a bawl ciangin damdam in a gam hong bit semsem pan hi.
5. Pasal Hi: A tate, a tute tungah leitung ah na nuntak sung un na hoih tampi na sem thei uh hi. Na tenna leitung uh a nop dingin na khel thei uh hi. Na hoih na bawl ding uh ciangin kisuanna om hetlo in na sem thei uh hi. Na hoih sepna dingin zuau gen kullo, khem kullo, guk kullo. Kamsiam kul tuanlo, zol bawl kul tuanlo, phat gawp zong kul tuanlo hi. A thupilo a ginalo a gamtatnate tawh sep kullo a, a diklo a maanlo tawh sem zong kul tuanlo hi. Thudik, thuman tawh citak in sem peuh leng nahoih kisem theilua hi. Nuntakpih khat nei ding, a zahtak-huai a gamta ding, ci lel hi. A nuntak sung tawntung a lungsim tawnga om ngaihsutna - hoih inteh a cih a up, a ngaihsutna gen ngamlo in omlo a, hoih inteh a cih zong a sem ngamlo in omlo hi kici hi.
Hang tak, citak tak, kuhkal takin a kalsuan ngam pasal ahi hi.
1980 kumin Singapore Airlines (SIA) vanlenghawlte tawh kimuktu kha uh hi. Vanlenghawlte in a khasum uh 30% a khan ding ngen uh hi. A kipiak loh ciangin nuak uh a, nasem nuamlo in om uh hi. Aman ama mun ah sam a, "Hih Singapore gam pen ka nuntakna khempeuh kham a ka lamtoh ahi. Tuni in nasep na kuan nop kei uhleh SIA phiat in a dang bawl ding hi ing; noh teng zong na vekpi in hong tawpsak ding hi ung' ciin gen a, a zing ciangin vanlenghawlte in bangmah gen nawnlo in nasep kuan kik diamdiam uh hi. Tua mah bangin 2003 kum in zong kinawk leuleu uh a, tua hun in zong 'nasep na kuan kei uh leh 'lusum' in hong bawl ding hi ing" acih ciangin kuan kik diamdiam uh hi, kici hi.
Khatvei a sa nek a gawl ah taang in a cingte in lakkhiatsak uh hi. A lak khiat khit uh ciang a sa mual khin man ci uh hi. A zi tawh a sangkahna uh Cambridge University ah a omlai un Shakespeare tenna inn lui ah na 'kiguk teen' uh hi. A laisim sung un a zi laisiam zaw a, law firm a hon uh ciangin zong siam mahmah hi. Nuntak sung pen a sau mahmah ahih sangin a manpha mahmah ahih ding thupisa zaw a, sihna pen i pelh theihloh ahih mah bangin manlang tak, natna thuak manlo a sihtheih hileh hoihpen cih a ngaihsutna hi.
A gam a it dan, a innkuan a it dan, a hoih ding khat peuh a muh ciang semlo in a om theihloh dan ka ngaihsut ciang mi thupi ahihna kitel kasa hi. Mi thupi bek hilo in mi picing mahmah khat ahihna leh etteh tak ahihna kilang hi. Leitungbup ah milian lawm a hauhdan pan mi mawkmawklo ahihna kidawk hi. Thudik thuman tawh gamta ding a hanciam dan leh a cihtakna, a hoihzaw ding a hanciam tintenna pen ama thu a thei peuhmah in a etteh dingte ahi hi.
Hau Za Cin
Phuitong Liim
0 Komentar