Kum 15 a kikhumcip sung in a pua lam tawh kizopna khempeuh kisutat a, nung Ninoni hong kikhah khiat ciangin mite in mobile phone tawh amaan la nuam uh ahih manin lamdang sa in a kibu liang hi. Mobile a khatvei muhna hi! A lim bel mu ngei a, Nov 13, 2010 niin a taktak in muta hi. Mi khat in a tapa Kim, Bangkok a omtawh kihosak a, a pauna ding theilo, a ngaihna ding theilo, lamdang sa kawm, a theih ciang, "zat theih mahmah hi," ci hi. Kum 21 sung leitung thupiang peuhmah a taka theihna neilo a, a gal zak, mi kamleng a zak khawng hi lel a, ahi zongin a kikhahkhiat ni in maitai leh nuihmai tawh mipite mai ah thugen hiathiat hi.
Amah kua hi hiam cih na tel hiam, themkhat suut ni.
1945 June 19 ni in suak a, apa min Aung San pan "Aung San" la in, a pi min pan "Suu" la a, a nu Daw Khin Kyi min pan "Kyi" la in "Aung San Suu Kyi" kiphuak hi. U pasal nih nei a, a upa pen San Diego, California, USA ah om in US citizen suak a, a laita pen a neulaiin tui kia in si hi. A suah zawh kum 2 ciang a pa Aung San kithat hi.
1960 kumin a nu Burma Ambassador to India in kisawl a, amah Lady Sri Ram College, Delhi ah sangkah hi.
1964-67 sung Oxford University nuai a St. Hugh's College ah B.A. in philosophy, politics and economics sin a, tua mun ah nu leh pa taangin in a zat (local guardian) pen Lord Gore-Booth, nidanga British ambassador to Burma and High Commissioner in India ahi hi. Hihte inn ah a pasal ding Michael Aris tawh kimu uh hi. A pasal in Tibetan civilisation thu a sin ahi hi.
1969-71 sung New York ah sangkah zom dingin pai a, ahi zongin sangkah zomlo in U Thant UNO Secy General a hih laiin UN office ah Asst. Secy. of Advisory Committee on Administrative and Budgetary Questions sem a, nitak ciangin Hospital ah cina te kem in volunteer pai zel hi.
1972 January 1 in Marries Michael Aris tawh kiteng a, anih uh Bhutan ah Bhutan kumpi laihilh ding leh lai teisak dingin pai uh hi. A pasal nasep a huh kawm in amah Research Officer in the Royal Ministry of Foreign Affairs kisemsak hi.
1973 kumin tapa khatna Alexander, London ah piang a, a nihna Kim pen 1977 kum in suak a, a nau kep kawmin a pa tangthu kanin laigelh a, Leaders of Asia series ah suaksak zel hi. A laigelh leh thukan mah zomto den a, apa thu ban ah Burma thu lim kan diak in, a pasal sepna Bhutan thu zong ahih theih bangin huh zel hi.
1988 kum March 31 niin a nu stroke ngah cih a zak ciang a zingsang vanleng masa pen delh in Yangon tung a, Hospital pan amau inn Inya Lake gei University Avenue ah a kem hi. July 23 ciang General Ne Win kumpi kum 1962 pan a sep pen tawp a, gamsungah mipi deihna tawh kitel kumpi neihna ding lungphona nasia tektek hi.
1988 August 8 niin (8888 ci a kiciamteh pen) gambup ah mipi lungphona piangsak a, mipi khamna in galkapte in thaulawng mipi lam ngat ahih manin tampi si hi. Aug 15 niin Suu Kyi in ama nuntakna ah politics a khoihkhak masakna pen dingin kumpi tungah laikhak a, kitelna a om theihna ding gen hi. Aug 26 niin Shwe Dagon Pagoda mai ah mipi tul tampi mai ah , "Democacy Kumpi" a omna ding thugen a, a pasal Aris leh atapate nih zong om hi. Sept 24 niin National League for Democracy (NLD) phuan a, aman General-Secy sem in, "non-violence and civil disobedience" bulphuh uh hi. [Mahatma Gandhi policy tawh kibang hi]. Khualzin ding kikham taleh gam sung mun tuamtuam zin kawikawi in amau policy a tangko kawikawi hi. Dec 27 niin a nu Daw Khin Kyi in a nusia hi.
1989 Jan 2 niin a nu kivui a, mipi mai ah, 'ka nu leh pa in Burma ading a sih dong un sem uh hi, kei zong ka sih dongin ka sem ding hi' ci hi. Gamsung zin kawikawi in amau policy tangko kawikawi a, a kiphallo ahih hangin hih teitei hi. April 5 niin Irrawady Delta Incident ci a kiciamteh ah a paina ding ah galkapte in phallo in thaulawng ngat uh a, amah laulo in pai teitei ahih manin kap ngam tuanlo uh hi. Tua manin July 20 ciang kiman a, kikhumcip in aman anne nuamlo hi. A pasal in England pan delh a, a tate in ompih hi.
1990 May 27 ni a gambup kitelna ah ama pawl National League for Democracy (NLD) in 82% tawh zo a, ahi zongin kumpi kisemsaklo hi. October kha ciang Rafto Human Rights Prize kipia hi.
1991 October 14 ni in Nobel Peace Prize ngah ding ciin kipulak a, Dec 10 niin a tapa te gel Alexander leh Kim in va laksak a, amah kikhumcip lai hi. Ama thugen "Freedom from Fear" kici laibu in Penguin in published sak hi.
1995 kum ciang a kikhumcipna pan kikhah a, ahi zongin vaksuk vaktoh phallo uh hi.
1999 March 27 niin a pasal Michael Aris in London ah sihsan hi. A pasal in a sihma in khatvei Burma hawh nuam lai in ciin ngen a visa ngahlo hi. A zi tawh a kimuh nunung uh 1995 Christmas ahi hi.
2000 kum pan kipan a kikhumcip suaksuak hita a, 2007 kumin khatvei mipi te mai ah hong kilang pak hi. Tua hun a Buddhist monk te lamzuihna a hopih pak ahi hi.
2010 kum November 13 niin a kikhumcipna pan kikhahkhia a, mipi tampi in na dawn in a zingciang NLD office ah mipi mai ah thugen a, BBC News tawh interview nei hi.
A kikhumcip sung bang hih? Laibu sim, thahatna ding exercise la, piano tum ban ah French pau leh Japan pau a siam mahmah nading kisin hi. A pasal si ding lupna tung ngak in a om laitak kumpi te in "va veh in" ciin sawl uh a, amah pai nuamlo hi. A ciahkik theihloh ding lau ahih manin.
2007 kuma BBC interview na ah Burma democracy movement nakpi in ki sumit den ahihna thu a kidot ciangin, "Burma ah democracy si nailo hi. Kua mah in mipi khaktan suakzo cih omlo ding a, suahtakna zong kikhaktan zuak ding cih om theilo hi, ko hun hong tung ding hi," ciin British thuthak saipa John Pilger dotna dawng hi.
(In a rare interview in 2007 during the uprising that was brutally put down by the military, she said democracy was "not finished in Burma".
"No matter the regime's physical power, in the end they can't stop the people; they can't stop freedom," she told British journalist John Pilger. "We shall have our time." http://www.bbc.co.uk/news/world-asia-pacific-11685977).
Mi tampi lungsim ah lametna lianpi a neisak numei khat ahi hi. Amin i zak mun mahmah hangin amah kua hiam cih i mangngilh khak leh ci a... i theihsa vive ahi phial zongin...
Hau Za Cin
Phuitong Liim
Nov 16,2010
0 Komentar