Miim bang pianna Zogam lei leh sim leitungbup sim le mal aa kikhen Zosuantate khempeuh tungah i biak Pasian min tawh na khut uh hong len-in kong hopih masa hi. Leitung mi khempeuh mawhna sihna pan a tankhia dingin Pasian kimlai mi bang aa hong piang i Topa Jesuh hong suah lungdamna note khempeuh tungah athakin hong tungin, tua lungdamna leh daihna tawh hong tung ding Kum Thak 2016 cidam lungnuam takin na na dawnkim zawh nading-un thupha kong paih masa hi.
GZA min tawh tu le tu-in kong hopih nop hangin kei mahmah pumpi ginat lohna leh damlohna hangin kong hopih mengmeng zo kei-a, ka kisuang mahmah hi. Tu Nipi sungin i minam sungah dahna lianpi khat hong tunga tua pen i muan i suan leh mailam-ah i lam-et ahi Dr. Cing Pum Neam (Dr. Cingkok) hong nusiatna hang ahi hi. Zomite adingin mailam-a a taang i aksi khat pulhkhia ahih manin supna leh dahna lianpi i nei hi. Ei’ deih bang hilo, i biak Pasian’ vaihawmna ahih manin Pasian mah ap-in anusiat anu leh a sanggamte khempeuh adingin thungetsak ciat ni.
GZA pen Zomi khempeuh mapang khawm-a, i vaihawm khopna kipawlna ahi hi. I phuat khiat zawh 2010 kum panin makai honpi kikhopna (2) vei i nei khin hi. A masa pen 2011 kumin Kalaymyo khua-ah nei-in a nihveina 2014 kumin Tedim khuapi ah i nei hi. I minam it tek i hih manin, amasa anunung-in mi (300) sang a tamzaw i kikhawm-a, Zomite’ mailam ding tampi i geel khawm hi. Tu-in zong a Thumveina Kikhoppi neih kik ding hun hong tungta ahih manin anuai-a banga neih dingin kigeel-a, leitungbup aa om Zomi khempeuh in kigingkhol-in i paikim ciat nading hong hanthawn-in kong samkhol nuam hi.
Amun: Yangon khuapi
Ani: 2016 kum, November kha (24-27)
Hih Khawmpi dinga geelnate ahunhun-in hong kizasak toto ding hi. Yangon Local Committee-te’ geelna ah ahi thei bangbangin tunna ding leh anneek tuidawn tavuan lak dingin khensat uh hi. Gamdang aa om hong pai thei dingte a hang tuamtuam tawh mihon tawh tunkhawm ding haksatna a omleh, no’ sum bei-in hotel zong kitung thei dinga, Local Committee panin reservation hong bawlsak thei ding uh hi. Local Committee-te’ lam-etna ah mi (400) ciang peuhmah hong kihel thei dingin lam-en uh hi. Mihon vaihawmna suak ahih manin a hong pai thei ding peuhmah in 2016 September kha pawl bangin Local Committee-te tungah theikholsak zo le uh cin cih amau lunggulhna hi-a, theihkholhsak nading address zong hong hawmkhia kik ding uh hi.
I minam bup hong huai khawm leh mai hong nawtsak khawm kipawlna GZA ahih manin a kua mapeuh in hih thu na zak phet mah-un kihel ding lunggulh-in nong hanciam ding uh kong hanthawn phapha hi. Pai nading lamsap sumbei (Travel Expense) bel i minam i itna leh i khualna tawh eimah tekmah kisik himai ding hi.
Tung Pasian in Zosuan tate khempeuh thupha hong piakim henla, kum 2015 nuamtak khum-in 2016 hong mualsuahpih tek hen, ci-in thungetsak-in na khut uh kong len hi.
Note hong it,
Sd/-
Rev. S. Pau Khan En
Makaipi
GZA
0 Komentar