Sakhi in a tat nading Kuam kua Khual

  Hih Thului pen ZBCM khutnuai a om, Lailam kipawlnapi ZACC in kumsim in lailam tawh kisai in, laigelhsiam kidemna neisak den uh hi. Tua laigelh kidemna sungah Zomi khempeuh a ki hel thei ahi hi. Laigelhna ah a khatna pan a thumna ciang pahtawipiakna om den hi.

ZACC Laigelh Kidemna: ZACC in “Sakhi in a tat nading kuam kua khual” cih thulu tawh 2012 kum sunga a bawl Laigelh Kidemna ah a nuai-ate’n pahtawina ngah uh hi.

1. Akhatna : Tg. Dal Khan Kap (Tuimang, CTBA)
 (Agape Mission Church, USA in Ks. 100,000 hong piaksak hi.)

2. Anihna : Tg. Thang Sawm Lian (Tahan, KVBA)
 (Rev. Pau Khan Khai-te innkuan in Ks. 70,000 hong piaksak hi.)

3. Athumna: Tg. Dai Khan Pau (Zaangtui, HBA)
 (Pa Gin Gawh Thang-te innkuan in Ks. 50,000 hong piaksa



Thumasa:


Hih bangin ZACC makaihna tawh a kumsim phialin, thulu hoih nono tawh Zomi Zotate lailam le theihna lam ah namdangte tawh tanbang i kim theih nadingin, vaihawmkhia theizel ihih manin angtanhuai sa ing. Tutunga i thulu ahi,  Sakhi in a tat nading kuam kua khual  cih thulu pen ka thangah mahmah khat le tulaitaka Zotate in a theihhuai thu khat ahih manin hih thulu ka gelh ding, lawp mahmah ing. I thulu ah   KHUAL  cih kammal pen a thupi mahmah kammal khat hi a, khangthak Zotate n hih thulu i a deihna theisiam hi le ng i Zogam kipuahnuam semsem dingin ka lamen hi. Khangham zawdeuhte n i gam itdan le kepdan i theih ha ng khangthakte a thei ngei nai khollo kitam thei ding ahih manin i gam it a, khualna i neih theih nadingin i Zogam pian khiatna thu tawmkhat gen masa ni.

Khawlpi pan Ciimnuai ah:
I pu sawnsawnte Sengam panin hong pai toto uh a, AD 800 kiim pawlin Kawlzang hong tung uh hi. Tua mun ah Shan-te in ukna aana nei-in kulhpi a cian hun tawh na kituak hi. Tua ahih manin Kawlzang panin Pu Song Thu makai in, Pu Song Kipte tawh inn 40 kiim, Kawlpi pan na lal toin Ciimnuai khua na satto uh hi. Zomite khamtung gam ah i ten masakna khua in Ciimnuai khua hong hi pah hi.  Zomi  cihpen i pu i pate in a khangkhanga a zat uh i minam min ahi hi.  Ciimnuai ta  pen Zo vontawi cih nopna hi. I pu i pate in haksatna na tuak toto uh a, i Zogam a tun uh ciang zong Meitei gal, Kawl gal cih bangin haksatna na tuak toto uh hi. Ahi zongin i Zogam leitang, mual le guam a nim dildial singkung lopate na it lua mahmah uh ahih manin sisan naisan luang in, lungkham sinkhamna tampi kawmkal sung pan khangsawnte ading ci-in tuu bang na ciing uh hi. Tua ahih manin i Zolei tuun nu in khangsawnte aw Zolei hong zun un ci-in luankhia tawh hong samsam lai hi.

I Zogam leitang puahin khualna nei ni:
Pasian in leitung a bawlkhit ciangin, tua leitang tungah singkung lopate na posak a, tuate amuh ciangin Pasian lungkim mahmah hi. Tua a hoih mahmah mual le guamte a cing ding le a kem dingin ei Zomite hong telkhiat minamte ihi hi. Pasian in Adam le Eve-te Eden huan sungah singgah nektheih teng a ne ding bek a, a koih hi loin tua huan a cing, a kem dinga a
koih na hizaw hi (Pian. 2:15). Tua mah bangin Pasian in ei Zomite zong a ma bawlsa mun le mualte a kem ding le a cing dinga hong bawl hi napi eite in nektheih teng ne-in i om a, ahih hang kikem nuam lo, kipuah nuam lo kisusiasia zawta hi. Bang zah takin a bawlpa a khasia tam? Zomi le Khristian Theology laibu sungah Rev. Dal Khan Mang in  phawk khak ngeiloh
mawhna lian  cih tawh thului (article) na gelh hi. Zomite i phawk khak loh mawhna a kinei na hi gige takpi mawk hi. Tua ahih manin, i Zogam leitang tunga, a om khempeuh, a puah, a zun ding le khualna a nei ding nang le kei hi hang.

Bangci danin khual ding?
Zogam leitang khual ding cih ciang muhdan, deihdan le kisam i
sakdan kibang lokha ding hi.
Kei deihdan ah-
(a) Singkung lopa kep siamna tawh
(b) Pilna tawh
(c) Kipumkhatna tawh ...... Hih bang teng tawh i
Zogam leitang puahin zunin khualna nei le ng a hoihpen dingin ka um hi.

(a) Singkung lopa kepsiamna tawh
I pu i pate in dawi le kau na bia uh a, ahih hangin tu le tate ading ci-in khualna lungsim na nei mahmah uh hi. Tuhun khangthak Zomitea nungta Pasian a bia vive kihi mangta; hi mahleh i biak Pasian bawlsa leitang le a nim dildial singkung lopate kisusia mangta hi. Ettehhuai khat ah sangmang F O Nelson-te nupa Tedim a om lai-un a inn kiimah singkung le lopa hoih nono suan uh hi. Tua bang mahin Israel-te in a gam uh leitang hoihlo ahih manin gamdang pan leitang hoihte lei-in a gam uh ah pua uh hi, kici hi. Eite in leitang a hoihsak ahi singteh a kia ding nangawn om zo nawn lo zahphialin i Zogam leitang mun citeng keu mangta hi. Khua hong khal ciang Zogam leitang teng meikhu tawh kidim den mawk hi. Khangthak Zotate i gam i lei en puahin en zun kei le ng, kuama n hong puahsak lo ding hi. John F Kenedy in USA president dingin kiciamna a neih 20.1.1961 niin,  I gam in kei  adingin bang hong sepsak ding hiam cih ngaihsun kei unla, i gam  adingin ke n bang semthei ding ka hi hiam, cih ngaihsun zaw un,  ci-in na gen hi. Tua mah bangin Zomi Zotate, i gam I lei en puahin en zun kei le ng namdangte n lah hong puah hong zunin, i tu i tate khang adingin hong khualsak lo ding, ahih manin en puahin zun ciat ni Rev. Dr. Do Sian Thang in,  Kiimlepam kepna tawh mission nasepna . cih article a gelh na sungah,  I huang sung mah panin leitung bup khuaneu khat ahihna lakkhia thei leng  ci-in na gelh hi. Zomite in Zogam leitang nam dangte hong et teh taak dingin i singkung lopate puahin zun ciat ni. Zogam sungah singkung lian teng kiphukmang khinta hi. Singkung lian teng om nawn lo ahih manin Zomite i kiciaptehna Phualvate i gam i lei ah kimu zo nawn lo hi. Kachinte n,  Zomite  kiciaptehna vaphualte ei gam ah hong tung mangta hi,  na ci uh hi. Bang hangin i ki ciaptehna Vaphualte i Zogam leitang ah kimu zo nawn lo hiam?
- A om nading mun le a bu sat nading singkung lopa
om nawn lo hi.
- I kiciaptehna hi napi mat ding le thah dingin ki-um
mang tazen hi.

Tua ahih manin i Zogam ah hong tualbual thei nawn lo hi. Zomi Zotate namdangte n hong zahko ta uh hi; zahkona i thuak nawn loh nadingin tuate i sapkik kul ding hi. Sia Dai Hang  laphuakna sungah:  Singkung hoih nonote bek tawh i samkik zo bek ding hi  ci-in na phuak hi. Khangthak Zomite in khatvei lungngai kik ni; singkung hoih nonote suan ni; singkung pen mihingte adingin zong a thupi mahmah khat le i nuntakna khat na hi hi. Singkung(forest) Acre khat in mihingte adingin a hoih lo, Carbondioxide pen nikhatin cubic ff-2000 hupkangin, mihingte le ganhingte  nuntaknapi ahih manin nu le pate in i tu i tate ading khualna tawh singkung hoih nono suansak ciat ni. A pa Jonathan hangin Mephibosheth in a dam sung teng kumpi inn ah an ne hi (2Samuel 9:6-13). Rev. Dr. J. M. Paupu in,  Khristian neihsa kem  cih article a gelhna ah  Nuntak sau manin na tam a kisem hi loin, hun neih khempeuh a zangsiamte in na tam semzaw uh hi  ci-in na gelh hi. Zomi nu le pate in i tu i tate ading
khual taak mahmah ta hi. I nuntakna a beiphial zongin i deihsakna le I khualna khaicite cikmah hunin bei ngei lo dinga, khangsawnte n nuntaknain na zang ding uh hi. Piancit-te in zu (leenggah zu) pen lei sungah phumin a tu khang ciangin a tute in dawn uh hi. Tua bangin a khangkhangin phum suksuk uh hi, ci-in kigen hi. Mihingte a pilpen, a haipen le a cidampen khat nangawn zong, a nungta tawntung ding ki-om lo hi. Tua ahih manin i dam sungin i gam sung singkung lopate kep siamna tawh i tu i tate ading khual in, gamh (heir) hoihpenin i nusiat zawh ding thupi hi.

(b) Pilna tawh
Ei Zomite zong pilna a thupisak mahmah minam khat ihi hi. Lai i neih ma-in i pute in Mawlaih le Falam ah lai sin dingin na pai uh hi, ci-in kiciamteh hi. Pasian in i Zogam thupha hong pia-in 1899 kumin Arthur le Laura Carsonte nupa Zogam ah hong tung uh hi. 1901 a kipanin Hakha, Tedim, Khuasak, Tonzang le Thantlang cih bangin Kawllai sin hong kipansak uh hi. A diakin ei Tedim kampau sungah 1902-03 kumin Sia Po Ko in Tedim ah, 1903-04 kumin Sia Shwe Zan in Khuasak ah, 1904-05 kumin Sia Po Ko mah in Tonzang ah cih bangin Kawllai hong sinsak uh a, tua siate pen Tazahaw Sia le Sangsia thuah khawm ahi uh hi. 1910 kumin Rev. J.H. Cope-te nupa Tedim hong tung uh a, 1913 kumin Zolai simbu hong bawlsak uh hi. Tua ahih manin 1924-25 kuma kipan Zolai tan 1-4th ciang kisin ta hi. Rev. J.H. Cope-te nupa in lai hong bawlsakin i Zogam ah pilna khaici hong tuhkhia uh hi. Hih bangteng tawh Zomite pilna lam le theihna lam ah i mit hong keuhkhia ta hi. Ei zong lai i neih a kipan omdan, gamtatdan, kampaudan ah kikhangto mahmah ta hi. Pasian thupha tawh I Zogam ah pilna a nei kitamsim ta a, degree sangpipi a ngah zong kitamsim ta hi. Ahih hangin a dahhuai khat ah mipil kitawmlai mahmah dingin lamen ing. Leitung i et ciang  pilnanei le mipil  cih nam nih kimuthei hi.

- Pilna nei   i cihte degree sangpipi ngahtamahleh, a gam, a lei a puah, a zun keileh,  mipil  kici thei lo-a pilna nei kici lel hi.
-  Mipil  i cihte in ama ading bek hi loin, midangte ading, a gam, a lei, a puah, a zunte bek mipil kici hi.

I gam ah mipil tampitak kisam mahmah lai hi hang. Gamsung gampua a, pilna siamna a sin, a zongte n i sin pilnate tawh i gam i lei le i pau puahin zun ciat ni. Rev. Khoi Lam Thang in Ciimnuai Khuavak No.11 sungah  kampau nungta i cihte pen a kipuahpuah, a kizunzunte ahi hi  ci-in na gelh hi. I minam le i kampau a nuntak nadingin nang le kei in i puah i zun ciang bekin a nungta ding ahi hi. Zomite i omna munmun panin i tate Zopau mah tawh hopih, Zolai mah sinsak, i Zo ngeina (Culture)te i tate hilhin theisak ni. Mun tuamtuam ah i om zongin i sisan in Zomi mah hi. I ngeina, i lai, i paute i omna munmun pan i puah i zun keileh Zomite, i tu i ta khang ah mi mangthangte i suakkha ding hi. I gam le i minam khantoh nadingin khat bek tha tawh hi zo lo ding hi. I pilna i siamna i sum le paaite tawh i pangkhop ciang bekin i gam hong khangto pan ding hi. A diakin I tate pilna lamah pantah ni. Eimite college kah kitam napi mark kiciangtana kahtheihna a sang lamah a kah zo kitawm mahmah lai hi. Gam khangtote n pilna mah na thupisakpen uh hi. Ei Zomite zong pilna tawh nuntak sawm ni. Tua ahih manin nu le pate in i tate pilna lamah pantah ni. I ta te n tu laitakin i deihsakna theikha lo ding hi. Tu laitak a, USAte  gamke ahi Alaska pen nidangin Russia-te  gam hi a, sum kisam ahih manin USAte zuak uh hi.


Tua laitak USAte gamdang Vuanzi (Minister of foreign affair) a sem William H. Seaword in kimansa lua ahih manin kuamah tawh vaihawm se loin 1867 kum March 30 ni-in US $ 7,200,200 tawh lei ziau hi. Tua lai huna Tadensa (newspaper) te in  Seaword haina (Seaword s Folly), Seaword vuukkhal kuang (Seaword s Icebox)  cih bangin selnoh ziahziah uh hi. 1887 kum ciangin (Seaword si zo ta) Alaska ah kham kimu a kicih ciangin Seaword zaha mailam thu mukhol kuamah om nai kei ci leuleu uh hi. Tua mah bangin Zomi nu le pate in i tu i tate adingin mailam saupi muhkholhsakna tawh pilna lam ah pantahin i tu i tate khualna nei ni.

(c) Kipumkhatna tawh Singkhuah khat bek kuang thei lo hi. Tua bang mahin khattang bek minthan nopna in gualzawhna hong pia zo lo a, lungsim kituaka kipumkhatna bek in gualzawhna hong pia thei bek hi. I pu i pate amau hunlai-in na kipumkhat mahmah uh a, do ding a omleh zong na dokhawm, sep ding a omleh zong na semkhawm uh a, nek ding a omleh zong na nekhawm uh hi. I Zo paunak ah,  nupa ilungtuak khua khat in zo lo; khua khat kilungtuak khua kua in zo lo  ci-in paunak kinei hi. A masa-in I gamsung i kipumkhat theih nading le i kithutuak theih nadingin i innkuan sung pan i pat kul ding hi. I innkuan ah kipumkhatna om keileh i pawlpi sung, i khua sung, i Zogam ah kipumkhatna om thei lo ding hi. Kipumkhatna a om lohna mun ah gualzawhna, matut zawhna kinei ngei lo a, minsiatna mindaina vive tawh kidim hi. Kipumkhatna a omna mun ah gualzawhna, matut zawhna, minphatna le khantohnate om bek hi. Zomite i khantoh hunta e, Sian in tualniam ding hong siam hi kei, namdangte mah tawh tanbang kim ding Sian in hong siam hi hang e. Tua ahih manin Zomi Zotate n i gamtat luhek, i kam pau mukpauna le i gimna i gelna a hoihlote paisanin a thak nuntakna ah i kipuahphat mahmah kul ding hi.

Msgr. Bishop Felix Lian Khen Thang in 2011 kum GZA khawmpi ah,  upna, pilna, kipumkhatna tawphah ni  cih sermon a piakna sung pan Zomite n i paisan ding thu pawlkhatte cih a genna sungah:
- Thadahna pan thalawpna ah,
- Zulhtatna pan thanuam cihtakna ah,
- Ki-elna pan kilawmtatna ah, Kimawhsakna pan kitelsiamna ah,
- Kimuhdahna pan ki-itna ah,
- Kideidanna pan kipumkhatna ah,
- Kikhenkhapna pan kilemna ah,
- Kilangpanna pan kipumkhat a, kithutuahna ah,
- Gamtat, ngongtatna pan lungnem thukhualna ah,
- Tangtat lungsim pan kithutuahna ah,
- Hazat, gitlohna pan Jesu sungah pumkhat hi hang,
ci-in na gen hi. Tua ahih manin hih a tunga thute bangin mun tuamtuam a, a
om Zotate n hih bang lungsim nei-in kipumkhatin a thak nuntakna ah i
kalsuan ciang bekin i gam hong khangto pan ding hi.

Thukhupna:
Tuhun ciang sumlepaai kideih lua mahmah ahih manin Zomite kikhualna kinei nawn loin,  Ei  cih sang  Kei  cih lungsim kinei zawta a, sikhat, sakhat, minam khat ihih hang kideihsakna tawm mahmah ta-in ei ading bek tawh kibuaizaw ta hi. Thu-um kitam semsem ei  angsung ding bek tawh kibuaizaw semsem ta, kipumkhatna le kithutuakna tawm semsem ta, ki-itna damdamin kiam tektek ta ahih manin khangthakte n mailam saupi khualna tawh gamtat kampau ding kisam mahmah ta hi. Zomite I kiciaptehna Phualva kopte, kilungtuakna le kipumkhatna zia khangthakte n khatvei lungngai kik ni; kipumkhat in, Pasian hong piaksa i gam, i lei, a keu le a tulmang khinsa i leitang puahin, zunin, Eden huanthak i Zogam nuam suaksak in,  Sakhi in a tat nading kuam kua khual  cih a om bangin khangthakte n i Zogam leitang khualna nei le ng; Pasian in ei Zomi Zotate lam hong lakin a thuphate ei Zomite ading hong suaksak taktak ding hi.

 Tua ciangin note lam kong lak tawntung ding a, na hoihte tawh kong lungkimsak ding hi. A cidam a thahatin kong omsak ding hi.

Tui tampi a ngah tawntung huan, a kang ngeilo ciktui tawh na kibang ding uh hi. Tanglai-in a kisia na munte uh na lamkik ding uh a, note pen a sia a puahkik, tenna dingin mun siate a ngei a bangsak kikte hong kici ding hi.  (Isai. 58:11-2) Etkak laibute;
1. Tedim BEHS NO.1 Golden Jubilee Magazine - 1998
2. Laigelhte  Laikung Pan   2007
3. Ciimnuai Khuavak No. 11   2008
 4. Zomi leh Khristian Theology - 2007
5. Zingsol Laihawm - Siamsin
6. The Fruit of Unspared Labor - 2004
7. Cope Topa leh Mission - 2010
(Hih thului pen ZBCM-ZACC Department i 2012 Laigelh kidemnat pan a khatna a ngah Tg. Dal Khan Kap (3rd Year, ZTS) i gelh erfhong kisuaksak ahi hi. Ed.)

Tg. Dal Khan Kap, Tuimang in 2012 ZACC laigelh kidemna ah a khatna hong ngahna hangin lungdampihna Tuimang tate ki thuzakna tungtawn in kong pulaak hi. Pa Kam Sian Thang leh Nu Dai Ngaih Ciin te tapa Tg. Dal Khan Kap @ Kapno pen Zomi Theological Seminary (ZTS) ah B.Th 3rd Year a zokhinsa hi a, hong tungding sang honciangin B.Th final year kipan ta ding hi. Nungkum in tan 10 zo a, University ah BA (Distance) tawh kum khatna a sinlaitak ahi hi.

Thupuak sawn

 Thawn Tuang
Zomi Angvaan( Pasian Angvaan Minam)
Ka Laikung panin::http://zomiland.com

Zomite minam nasepna tangthu tomkim

Minam khat in ka gam ka lei a cih ding gam khat neih ding pen baih het lo hi. A neisate in zong a gam a lei uh it in, gal leh sa lakah a khahsuah lohna dingin ahih theih zahun keem tek uh hi. Tua mah bangin I pu I pate in zong I gam I lei hu a, a khang a khanga gal leh sa a dona uh gen ding tampi om hi. Zogam la dinga British galkapte hong kuan lai taka I pu I pate in a hih zawh zahun Mikang galkapte nangin, a do mah bangun, Mikang ten Zogam hong lak khit ciangin zong Zogam pan Mikang galkapte nohkhiat kik sawmin hih theihnana pan do tawntung uh hi. Tua hanga Mikangte khut thuak minthang masa pen Pu Thuam Thawng leh a tapa Tg. Pau Dal, Pu Kai Tuah leh Pu Khai Kamte hi a, 1898 kuma Mikangte phualpi Thuamvum (Kennedy peak/ Fort White) a simna uh pan Mikang galkapte in man in, Pu Thuam Thawng leh tapa Pau Dal pen Kendat thongah puak uh a, hih thongah a pata-un si uh hi. Pu Kai Tuah leh Pu Khai Kam pen khantawn gotna kipia a, Pu Kai Tuah pen Myingyan thongah, Pu Khai Kam pen Andaman tuikulh (Island) pekah puak uh hi.


Leitung Galpi Khatna bei kuan 1917 kum ciangin Mikang kumpi in France gamah van nawn dingin Zomi galkap kaikhawmin innkuan khat pan pasal kum 20 tung siah khat ta tangkaih uh hi. France gam pen gamlapi leh theih ngei loh gam hi a, galgam ahih manin sih khitna dingin ngaihsunin Zomite kuamah ut loin langpang uh hi. Hih taka a makaipi Pu Ngul Bul pen Mikang ten mat bek tawh lungkim loin thatin, a luang pen a nennenin semin Tedim uksung inn simah hawmin Zomite vauna in zang uh hi. Hih bangin Mikangte in hong vau uh hangin phatuam tuan lo ahih manin a tawpna ciangin France gam paite pen kuli leh leisiah peng (h) dingin a zolbawl uh ciangin ngah zo pan hi. Hih France paite CHIN LABOUR CORPS kivawh a, Tedim gam pan mi 1000, Falam gam pan mi 500 leh Lusei gam pan mi 2000 pai hi. Hih Zo galkapte in France gam panin Pu Song Theu, Pu Kam Za Mang, Pu Khual Khen Thangte makaihna tawh buaina bawlbawl uh ahih manin Mikang kumpi in cihna ding thei loin 1918 kumin Zogamah puak kik uh hi.

France gam paite Zogam hong tun kik uh ciangin mi tampi tak mel muh ding om loin galgamah si uh ahih manin Zomite in Mikangte huatna nasia tektekin a koi a koi-ah Mikangte langpanna laang seemseem hi. Tua hangin Mikang kumpi in buaina phelhna dingin Ukpite leh hausate thuneihna piak behlapin mipite ukcipsak hi. Tua banga Mikangte ukna Zomi kithuaklah lua ahih manin lungkim lohna tawh 1932 kumin Falam khua-a Mikang thuneite kiangah Pu Suang Khaw Kam leh Pu Lian Mang makaihna tawh kiko hi. Bangmah phattuamna om lo ahih manin Magwe DC kiang manawh leuleu uh a, lawhcinna bangmah om tuan lo hi. Tua lai tak 1938 kumin makaipi Pu Suang Khaw Kam pen Magwe khuapi-ah hong si sawnsawn hi. Hih sihna pen gul tuk hang hi, a kicih pong hangin suamlup mah hi dingin kingaihsun veve hi. A luang Zogamah lak ding vai natawmah nakpi takin buaina piang lai hi.

Zogam sim lamah zong Mikangte huatna laang mahmah a, Mindat lam mi Vuamtu Mawng in zong Mikang galkap sungah Sabedar za a ngah kum 1925 in Mikangte lehdo dingin galkap pan taikhia in, kum 1928, February 20 ni-in CHIN NATIONAL UNION (CNU) pawl a makaihna tawh phut hi. CNU in 1933 kumin Rangoon-a Mikang kumpi tungah Zogamah Zo mite thuneihna a ngah kikna ding leh, Kawlgam in suahtakna a ngah cianga Zogam in zong a ngah pahna dingin deihna leh ngetna tun hi. Hih ngetnate Mikang kumpi in don cih thadah 1939 kumin CNU makaipi mi kuate baan mat zawsop in, Zogamah Japante hong khan 1942 kum dong thong sungah khumcip uh hi.


1942 kuma Leitung Galpi Nihna in Zogam hong phak ciangin Mikang kumpi in Japan gal a nang dingin Zomite kaikhawmin CHIN LEVY phuan hi. Ahi zongin Pu Pum Za Mang leh Pu Za Biakte in Japante tawh kizawl a, Mikangte ki-umkhia leh Zogam in suahtakna a ngah ding lametin Kawl makaite leh Japan galkapte tawh kizopna bawl uh a, Japante makaihna tawh Mikangte do dingin CHIN DEFENCE ARMY (CDA) galkap phuan uh hi. Ahi zongin, Japan ten Zogam hong op ciangin suahtakna hong piak sangsikin Zomite tungah Mikangte sangin hong tatsia zaw uh a, kithuaklah zaw seem hi. Tua ahih manin Mikangte hi ta leh, Japante hi ta leh a do dingin Pu Thawng Cin Thang, Pu Hau Za Lian leh Pu Lian Cin Thangte makaihna tawh SUKTE INDEPENDENT ARMY (SIA) kiphut biangbuang hi. SIA pen hih sawng maha a kiphut SIHZANG INDEPENDENT ARMY (SIA) tawh pangkhawm hi. SIA in kum 1944, June kha in CDA phualpi Kaptel khua sim uh a, CDA-te a vekin hing mat khin uh hi. Kum 1944, September 11 ni-in Meitei gun kantanin Mualbeem khua sim leuleu-in CDA makai Pu Za Biak natawm man uh hi.

Hih sawng mah, 1944 kumin Pu Vum Khaw Hau makaihna zong tawh CHIN LEADERS FREEDOM LEAGUE (CLFL) pawl a sim a thamin kiphut hi. Tua banga Japante zawna Mikangte do huan a kisawm lai takin, Zomi makaite in Japante tatsiatzia za nunawh uh ahih manin lang khat lamah Japan na'nna dingin FREE CHIN MOVEMENT (FCM) pawl 1944 kum mahin a sim a thamin phut kik saisai uh a, FCM pawl in a sawt loin CHIN INDEPENDENCE ARMY (CIA) ci-in a pawlin khel kik uh hi. Hih bangin kipawlna phutin lang khat lang khatah Mikang leh Japan gal nangin a ciangciang pan hih hun laia Zomite om khong man lo uh hi.

Zogamah Japante doin a kipan lai takin, Imphal kidona-ah Japan in Mikangte lel kik ahih manin 1945 kumin Mikang ten Zogam hong luak leuleu hi. Tua banga Mikangte hong lut kik ciangin tuma Mikangte a langpang ngei Zomi tampi takin mat leh bawlsiat thuakin, SIA makai Pu Lian Cin Thang zong Kawlgam in a suahtakna a ngah (1948) ciangin thong sung pan kikhah kik pan hi.

Leitung galpi nihna hong veng(h) ciangin Mikangte hawlkhiatna ding leh Zogam suahtakna dingin mipi tha tawh panlak kul cih phawk uh ahih manin mipite a pattah dingin political party kisam sa uh hi. Tua ahih manin 1946 kum laizang pawlin Tedim khuapi-a Pu Lang Khaw Thangte innah Pu Thang Khaw Kai, Pu Song Theu, Pu Thang Za Kai leh Pu Lang Khaw Thangte makaihna tawh KHAMTUNG SUAHTAK VAIHAWM PAWLPI (KSVP) kiphuankhia hi. Hih hun sawng teng mahin Tedim khuapi mahah Pu Vungh Za Kham, Pu Hau Za Lian leh Pu Tuah Langte makaihna tawh THUHOIH VAIHAWM PAWLPI (THVP) kiphuan lai hi.

Hun hong pai to zelin, Zogam suahtakna dingin 1948 kumin Capt. Mang Tung Nung in CHIN PEOPLE'S FREEDOM LEAGUE (CPFL) pawl hong phut a, CPFL pawl pen kum sawm khit 1957 kum ciangin CNU tawh kigawmin CHIN NATIONAL ORGANISATION (CNO) pawl cih min hong pua in, Capt. Mang Tung Nung mahin President lenin makaih hi.

Lushai gam lamah 1947 kuma hong piang Lushai Hills-a political party masa pen MIZO UNION in zong Zogam suahtakna ding leh Zo minam teng kigawmna ding mah lunggulhna thu His Majesty's Government of India kiangah memorandum na khia uh hi.


1960 kumin Lamka khuapi panin Pu T. Go Khen Pau leh Pu S. Vung Khomte makaihna tawh PAITE NATIONAL COUNCIL (PNC) in kum 1960, May 30 ni-in India Prime Minister Pu Pandit Jawaharal Nehru kiangah 'Re-unification of Chin People of India and Burma under one country' cih thulu zangin Zo minam khempeuh ading District hiam, Division hiam, Region hiam khat bawlsak a, tua sungah gawmkhawm dingin ngetna memorandum thupi mahmah khia uh hi.


1964 kumin Kawlgam thuneihna Gen. Ne Win in la a, parliament a phiatna hanga lungkim lohna leh mipite kiangah thuneihna ap kikna ding hanciamna tawh MP pawlkhat leh Zomi mitei pawl khat ten ANTI-COMMUNIST FREEDOM ORGANISATION (ACFO) pawl hong phut uh a, Col. Son Khaw Pau, Pu Dam Khaw Hau, Pu Mang Khan Pau, Pu Hrang Nawl, Pu Son Cin Lian leh Pu Tual Zen ten makaih hi. ACFO pawl pen Manipur-a Zomi makai Tun Khaw Pum tawh kikopin, amau makaihna tawh Zomi 30 taang ding ten galsiam sin dingin East Pakistan (tu-a Bangladesh) gam zuan uh a, Zo Kumpi- UNITED CHIN GOVERNMENT pawl phuan uh hi. Pu Tun Khaw Pum pen Prime Minister, Pu Col. Son Khaw Pau pen Defence Minister, Pu Hrang Nawl pen Foreign Minister cih bangin panmun kiguan uh hi.

Galsiam a sin khit uh ciangin, Zogam kap dingin galvan namkim tawh hong kileh kik uh a, khen nih kisuahin, Pu Hrang Nawl makaih galkap mi 86 ten Halkha leh Falam lam nawkin, Pu Tual Zen, Commandar-in-Chief makaih galkap mi 700 ten Tedim lam zuan uh hi. Pu Hrang Nawl makaih lam ten Kawl galkap platoon khat omna Rihkhawdar khua ciang baih takin buluh zo a, Halkha khua la man loin nungkik kik uh hi. Pu Tual Zen makaih lamte zong Kawl galkapte tawh Tedim leh Mualbeem khua kikalah nakpi takin kikap uh a, Tedim khua la man mahin kidok kik uh hi. Hih banga a kihep kikna uh khat pen Falam DC Pu Thawng Cin Thang' hanciamna hang zong hi kawm hi.


Hih banga UCG pawl pen gamtaangin thahat man hi napi, 1969 kuma India Prime Minister Lal Bahadur Shashtri leh Gen. Ne Win ten Rangoon-ah kihona nei uh a, tua takah India leh Burma gamgi dungah buaina a bawl leh bawl a sawm peuhpeuh kimatsak a, a gam kumpi tungah ki-aptuahna ding kilemna thukhun bawl uh hi. Hih thukhun hangin Zomite minam nasepna bin lawh a,a sawt loin India kumpi in Zo galkap makai Col. Son Khaw Pau, Pu Hrang Nawl, Pu Dam Khaw Hau, Pu Ro Thangte leh midang pawlkhat man takpi-in Kawlgam kumpi tungah ap hi. Kawl kumpi in hih Zo minam makaite thong sungah khumin kum nga tek kia uh ahih manin UCG pen gamtang thei nawn loin omcip hi.

MP lui Pu John Mang Tling leh nam it Zomi khangno pawlkhat ten Kawlgam Prime Minister lui U Nu pawl PARLIAMENT DEMOCRACY PARTY (PDP) zom dingin kum 1969, December 30 ni-in Bangkok zuan uh hi. Ahi zongin Bangkok a tun uh ciangin Pu William Sa Lian Zam, Pu Micheal Mang Kham leh Pu John Mang Tlingte makaihna tawh Zomite in CHIN DEMOCRACY PARTY (CDP) pawl phuh zawk ding hoihsa uh hi. Kum 1970, Febraury 20 ni-in Bangkok mahah CDP leh Pu Jimmy makaih ZOMI CHIN LIBERATION FRONT (ZCLF) pawl tawh kihona bawl leuleu uh a, tua takah CDP leh ZCLF lawng khata gin ding deihin UNITED ZOMI DEMOCRACY PARTY (UZDP) pawl phutin, tua sungah kisungkhawm uh hi. Ahi zongin, February 25 ni-in UZDP President Pu Jimmy a panmun pan tawp themthum kik ahih manin CDP mi leh sate in CHIN DEMOCRACY PARTY (CDP) min mah pua kik uh hi. Kum 1972, August 24 ni-in CDP in galkap dingin CHIN INDEPENDENT ARMY (CIA) bawl hi.

Hihmah leh, kum 1973, January 29 ni-in PDP President U NU a panmun pan tawp dih laizang a, tua hangin CDP innkuan sungah lungkiatna nakpi takin tung hi. CIA galkap natawm mi 150 pan mi 100-ah kiam sukin bah lawh gawp hi. Kum 1976, February 18 ni-in PDP pawl na tawm kiphiat lai sawnsawn hi.

Kum 1976, January 14 ni-in CDP Leh CIA ten CIA galkapte Zogam lutsak ding geelna bawl uh a, tua vaihawmna-ah a nuaia bangin khensatna bawl uh hi.

1. CHIN INDEPENDENT ARMY pen CHIN NATIONAL ARMY (CNA) ci-a khek ding.
2. Zogam hawhna ding KACHIN INDEPENDENT ORGANISATION (KIO) pawlte
kiangah huhna nget ding.
3. Zogam paite a zaa (rank) uh a zah-thum teka khan ding.
4. Zogam a tun uh ciangin ARAKAN INDEPENDENT ARTY (AIP)
Pawl makai Khai Mu Lin kiangah neek leh taak panpihna nget ding.

A tunga khensatna bulphuhin kum 1976, December kha in William Sa Lian Zam makaih CNA galkap mi 120 in a kiphualna uh Menapalaw nusia-in Shan gam leh Kachin gam tawnin kum 1977 tuuk guah tun lai takin Zogam lut uh hi. Tua lai takin Zogamah khua sia mahmah ahih manin khawhun thuaklahin cinat lawh ngeingai uh a, cimawh mahmah uh hi. Tedim uksung Phunom khua-ah a om lai takun, neek leh taak kaikhawma Thuklai khua-ah a pai mite tung panin Kawl kumpi thuneite in CNA-te om thu za hi. Kawlgam galkapte hong tung pah uh ahih manin Phunom leh Saizang khua kikalah nakpi takin kikap niloh pah uh hi. Khua hun thuaklahna, neek leh taak kiciat lohna, zatui zaha taangsapnate hangin Zo galkapte sawt pang zo loin Vangteh khua-a Mah-Sah-Lah (Burma Socialist Programme Party) thuneite kiangah mi 20 ki-surendar uh a, ahi zongin Kawl galkap makai Bo Lah Twin' sawlna tawh Bo Mawng Aye in lainatna nei het loin lam laizangah gualin a baan a baanin kaplum veve hi. A nung cianga a ki-sunrender mi 40-te zong tuamah bangin Kawl galkap ten hawi tuan loin kaplum khin uh hi. Mi 46 Kalemyo Jail-ah kipuak a, mi 4 nasia takin liam hi. Hih bang teng tawh CNA mabaan zop lohin om suak hi.

MIZO NATIONAL FRONT (MNF) pawl hong kiphut leuleu-in President Pu Laldenga makaihna tawh India, Burma leh Bangladesh cih gam thuma Zo minamte luah leitang teng gawmkhawm na'ng leh suahtak na'ng mah suangin hong kipan leuleu uh hi. Kum 1963, December kha in Laldenga, Lalnunmawia leh Sainghakate East Pakistan (tu-a Bangladesh) ah lutin a sim a thamin UNDERGROUND MIZO GOVERNMENT (UMG) pawl phut uh hi.

Kum 1966, March 1 ni-in MNF in Independent pulakna bawlin, tua panin India kumpawh kikap kipanin, India gamah om thei lo uh ahih manin East Pakistan zuan uh hi.Kum 1971 kuma Bangladesh in suahtakna hong ngah tak ciangin East Pakistan-ah MNF ten om khuan nei nawn lo uh a, India leh Arakan gam kilak teng manawhin kikhin leuleu uh hi.

h sawngin MNF pang belin ZOMI LIBERATION FRONT (ZLF) pawl zong dingin Pu Tial Khal (President), Pu Thawm Luai (Vice President) leh Pu Thawng Sai(ForeignSecretary) ten maikaih hi. 1972 kumin MNF leh ZLF thukimna tawh Pu Lalnunmawia pen India kumpite hopih dingin kisawl a, Pu Tial Khal leh Pu Sui Lingte pen Pu Brengseng (L), Finance Secretary, KACHIN INDEPENDENT ORGANISATION (KIO) heel dingin kuan uh hi. Hun sawtpi khit ciangin KIO-te thupha tawh lawhcing taka hong kileh kik uh a, ahih hangin ZLF in vai tuamtuam hang tawh mabaan zom thei loin om uh hi. MNF in kum 20 sung Independent a thapaihpih khit ciangin 1986 kumin India kumpi tawh kilemna hong bawlin Mizoram pen State suaksakin tawlngak bawl uh hi.

CHIN NATIONAL FRONT (CNF): Hun hong pai to zelin, Pu Tial Khal makaihna mahin ZLF makai lui teng kum 1988, March 15 ni-in Aizawl, Chaltlang vengah kimuhkhopna khat bawlna leuleu uh a, pawlmin kheka CHIN NATIONAL FRONT (CNF) phuh ding vaihawm leuleu uh hi. Pu Tial Khal in President panmun mah len leuleu in, Gen.Secretary dingin Pu Mang Khum, Finance Secretary dingin Pu Lian No Thang, Chief of Staff dingin Pu Roenga, Organiser dingin Pu Mang Uk kiseh hi.

Kum 1988, March leh August kha sunga Democracy deihna hanga Kawlgam buaina hangin Zomi khangno tampi tak Kawlgam panin India gamah tai uh a, India kumpi in Saiha leh Champhai-ah refugee camp nih bawlsak hi. Hih refugee camp a tung khangnote in BURMA DEMOCRACY FRONT (WESTERN) pawl phut uh a, sawt ding man loin CNF makaite tawh kihona hong neih uh ciangin BDF pen phiat kik pahin, CNF sungah kum 1989, January kha in kisungkhawm uh hi.

1988 kum mah, November kha sunga CNF kikhopna-ah Pu No Than Kap alias John Khaw Kim Thang pen Thailand gamgi-a om KAREN NATIONAL UNION (KNU) Headquarter Manepalaw-ah National Democratic Front (NDF) kizopna bawl dingin paisak uh hi. KNU-te phualpi pan hong kileh kik ciangin Pu No Than Kap in Pu Tial Khal kiangah CNF President hihna awn dingin ngen a, Pu Tial Khal in zong awnin Pu No Than Kap in CNF President panmun len to hi.

CNF mi leh sate galkap training dingin kum 1989, March kha in pawl khat Kachin gama KIO-te kiang mah manawh uh a, kum 1989, November kha in pawl khat Bangladesh gam zuan uh hi. Tua panin gam leh minam suantakna dinga galtum CHIN NATIONAL ARMY (CNA) pawl hong piang leuleu-in, hihte pen tudong SANGNAUPANGTE a ci zong om hi.


1989, October kha-a CNF sungah Pu No Than Kap pawl leh Pu Tial Khal pawl ci-in kikaihna hong piangin, Pu Tial Khal lamte pialkhia-in pawlmin tuamtuam pua uh a, tua lakah a gentaak pen CHIN LIBERATION COUNCIL (CLC) hi-in, hun sawtpi mah kalsuan uh hi. A nung ciangin CLC President panmun pan Pu Tial Khal tawp leuleu-in, Pu Ro Za Thang in President panmun zom to hi.

Kum 1991, December 9 ni-in CNF President Pu No Than Kap pen nawngkai kisa ahih manin CNF sung pan kiheemkhia in, a munah Pu Roger F. Biak Lian Thang kikoihin, CNF President panmun len to hi. Kum 1995, February 22 ni-a Pu Roger F. Biak Lian Thang in a cidam lohna paulamin CNF President panmun nusia leuleu in, tua panin tudong CNF President panmun pen Pu Thomas Thang No in leen to suak lai hi.
1997, June 9-16 sungin a nih veina CNF Party Conference kibawl a, tua takah CNF makai dingin a nuaia teng kiteelkhia hi:
Chairman : Thomas Thang No
Vice Chairman : Zing Cung
General Secretary : Benjamin Turing
Joint General Secretary : Khua Uk Lian
Member-te
Dr. Sui Khar
Capt. Thang Zen
Capt. That Ci
Lt. Ral Hnin
Lt. Paul Smith
Lt. Malsawmlian
Lt. Solomon
Lt. Sunny Ngun Awi
Lt. Kam Do Dal
Lt. Uk Lian Thang and
Salai Chan Hmung cih teng hi.
ZOMI RE-UNIFICATION ORGANISATION (ZRO): Zo minamte kigawmna ding leh suahtakna dinga mala dingin kum 1993, April 9 ni-in Kachin gam, Phupian khua-ah pawl khat hong piang leuleu a, tua pen ZOMI REUNIFICATION ORGANISATION (ZRO) hi in, Assam gam, Karbi Anglong khawka MLA (Member of Legislative Assembly) a seem ngei Pu Khai Za Song Guite alias K.Guite in President panmun lenin, makaih hi.

1997, July kha in Yangon khuapi-ah University kah Zomi khangnote in I gam leh I minam suahtak nadingin sisan leh nuntakna piakkhiat ding lungkimna tawh Zomi Siamsin khangno 20 val in "Zoheisa Unit" ci-in sisan tawh kiciamin phut uh a, ZRO tawh kizoma na sepkhop ding lungkimna neih khit zawh ciangin Yangon khuapi pan sangnaupang mi 12, Tedim pan mi 10 val khawng in Lamka lam zuan uh a, ZRO sungah lutin panmun tuamtuam lenin tu dong kalsuan lai uh hi.

Pu Khai Za Song Guite zawh ciangin Kawlgam galkap mangpi Lt. Col. Hang Khaw Lian (Capt. Mang Tung Nung' tapa) in ZRO President panmun tawm vei len pak cih loh, 1997 kuma Manipur Zomi leh Kuki buai panin ZRO Gen. Secretary Pu Thang Lian Pau (Tonzang MP) pen emergency-in ZRO President panmun kilensak a, tua panin tu dong kip suak lai hi. Tu lai taka ZRO makaite pen a nuaia bang ahi hi.

President : Pu Thang Lian Pau, MP (ZNC)
Vice President : Hang Sian Thang
Chief Secretary : D. Kam Suan Thang
Finance Secy. : Kenneth Muana
Denfence Secy. : D. Kam Suan Thang
Home Secy. : L. Kam Za Thang
External Secy. : Thang Suan Mang
I & PR Secy. : Gin Pian Khup
Treasurer : SB Vum Lian Thang
Patron : Pu Khai Za Song Guite cih teng hi.

ZO RE-UNIFICATION ORGANISATION (ZORO): Zo minam bup kigawmna ding, suahtakna ding lunggulhna mah tawh kum 1988, May 19-21 sungin Champhai khua-ah FIRST WORLD ZOMI CONVENTION ON RE-UNIFICATION khawmpi kibawlin, Kawlgam, Manipur, Mizoram leh mun tuamtuam pan mi tul tampi in siim hi. Hih khawmpi panin Zo minam bup kipawlna ding ZOMI RE-UNIFICATION ORGANISATION (ZORO) hong piang hi. Hih khawmpi leh kipawlna vai a hawm leh a thusapite pen 1972, January 21 nia Manipur, Daizang khua-a kiphuh, Pu T. Gougin leh Pu S. Thang Khan Gin ngaihte-te makaih ZOMI NATIONAL CONGRESS (ZNC) party leh Mizoramah a diakin Pu Brig. Thenphunga Sailo makaih PEOPLE'S CONFERENCE (PC) party ahihi.

1991 kum panin ZORO pen political party tawh kisawh nawn lo dingin kiheemkhia a, tua panin Leitung mun tuamtuamah leh UN Secretary General kiang khawngah Zo minam bup kigawmna ding, suahtakna ding deihna Memorandum khia kawikawi hi. 1999 kumin a khat veina dingin Geneva-ah UN vaihawm minam nautangte khawmpi-ah kihelin, ZORO min tawh 'British in a khenzaak Zo minamte kumpi khat nuai-ah gawmkhawm kik' cih thulu zangin thugenna hun ngah hi. Tua panin hih bang lamsang kikhopna tuamtuamte-ah thugenna nei dingin UN (WGIP) in ZORO cial thei zel a, tukum July - August kha in zong Geneva-ah UN vaihawm Meeting-ah va kah leuleu uh hi. Tua bek tham loin, Committee tuamtuam Asia level Kathmandu (Nepal), Seol (Korea) leh Leitung level Durban (South Africa) cihte-ah zong kihel to zel lai hi. Tulai takin ZORO pen Pu R. Thangmawia (Chairman) leh Pu Ro Za Thangte (Secretary General) makaihna tawh kalsuanin, Aizawl khuapi pen a phualpi-in zang hi.

Hun beisa leh tulai taka I minam nuntakna dinga pute pate' nasepte khangthak Zomite in I phawk ding deihna leh hih thute I pau I lai tawh ciapteh ding lunggulhna in 'Zomite minam nasepna taangthu' a tomin kong kaikhawm ahi hi. I pau I laite I it bawl kei leh mailamah gam I nei zongin I pau I lai kizang lo kha thei ding hi. A khawsuak minam leh a suakta gam phuh zaha nasep haksa leh thupi zaw dang om lo hi. Hih thute panin khangthak Zomite in I minam nuntakna dingin a nasia zawa nasep a kisapzia phawkna in zang ni.


(Hih Zomite Minam Nasepna Taangthu cih pen Zomi Nam Ni Golden Jubilee pawi,
February 20, 1998 nia Mizoram, Champhai khua-a bawlna-ah ka simkhiat pen behlapin kong puak ahi hi - 
J. Thang Lian Pau , editor Zolawkta)

NI KHAT NI CIANGIN~Khup Za Go

Gelh: Rev Khup Za Go

Rev Khup Za Go

Ni khatni ciangin:...
I beh min, i phung min, i gam min cih banga minam kilawh ahi zongin, mite in Lushai peuh, Kuki peuh, Chin peuh hong ci ta uh cia i kicih suk pah ahi zongin, eite lakah Laimi, Mizo, Zomi ci-a min tuamtuam i kicih pen mi hong muhna leh etna pan zumhuai a, ei kimuhna panin zong suphuai, haihuai ahih ciangin min khat puam khatin kilo thei le'ng i nahlawh pekzaw ding hi cih i phawk ni hong tung pelmawh ding hi.

Ni khatni ciangin:
I beh pau, i khua pau, i gam pau cih banga pau tuamtuam bul bawl ciat nei a, minam pau cih ding tang kam zat diak i neih nop het loh pen mite hong etna leh muhna panin neu huai a, ei a dingin zumhuai, haihuai, suphuai lua hi ci-a kampau nam khat bek zat ding a kulna i phawk ni hong tung pelmawh ding hi.

Ni khatni ciangin:
"Ko ngeina", "No ngeina", cia i bangkua, i khua, i beh ngeina, innluah, gamluah, man leh mual, khutkhialh bankhialh thu donga zatdan tatdan tuam ciat Kawlgam, Vaigam dongah i neih sangin ngeina khat zat khop ding hoih zaw, kilawm zaw hi cih i phawk ni hong tung pelmawh ding hi.

Ni khatni ciangin:
Biakna zuihna kibang, Lai Siangtho bu khat a len ciat mah ahi Khristiante in Baptist, Presbyterian, Methodist, Adventist, Pentecostalist, Catholic, Evangelical, Ecumenical leh min tuamtuama kivawhte i kimudah a, kitelkhial a, hi zaha saisa i bat sangin, khat leh khat ki-itin, zum khat nei khawmin, sumpi zek khawmin, biakna khatah gil kah khawm thei liailiai leng Jesuh nungzui i hihna kilang zaw ding a, i khuavak zong tangpha zaw ding hi cih i phawk ni hong tung pelmawh ding hi.

Ni khatni ciangin:
"Ni khatni ciangin" i cihcih niloh pen tu khang, tu kum, tu kha, tu ni, tu nai laitak mah hi pah lian hi ci-a i gam, i lei makaite, uliante, lai theite, a kipan tangpi tangta donga "Uimeikang" mah banga om khawng thei nawn lo zah-a thu i kikup khop pah pialpual ciangin Zo minam i hihna pen zumhuai liailuai, zumhuai niangnuang cih bang hi nawn lo ding a, "Tu ni ei sunni hi e," ci-in ki-angtangsak mahmahzaw thamin a hong bawl Pasian min i phat ding i phawk ni hong tung pelmawh ding hi.

-Sia Rev. Khup Za Go (Zoheisa Magazine 1988, Lamka, laimai 75)

KUM 2016 ZOMI NAM NI ETKIKNA

T. Sawm Lian

Kum sima Zomite in i thupingaihsut leh hun manpha mahmah a i ngaihsut khat ahi Zomi Nam Ni pen Manipur sunga singtangmite adinga hoih lo bill hanga misi a om manin Manipur gam sungah zat hi kei mah leh, haksatna lian lua om loin nuam takin kizo thei ahih manin lungdamhuai hi. Hih hun thupi zatna tawh kisaiin pawkhat nung etkik leng…

1.     Hih hun pen kidemna hun hi lo hi. Tai kidemna, a hatzaw leh a zo zawte gualtungtuanna leh thaman ngahna hi peuhmah lo hi. Chin leh Zomi (tai) kidemna zong hi zenzen lo hi. Tua hi a, hih hun pen ukpi khut sung pan mipi suahtakna hun phawkdenna kibawl hi a, ukpite ukna sangin ei sung mahmah i ki-ukcip hiam cih ngaihsuthuai hi. Zomi a deih mahmah pawlkhat Chin a deihte kiangah va kihel om ding a, Chin a deih mahmah lakah Zomite zatna hunah a kihel om ding hi. Kimawhsakhuai lo, kimawhsakna ding hun hi lo hi. Kidemna leh a zo zaw kituhna hi lo hi. A hang om a kihel ahih manun kammal kilawm lo leh mi lungsim natna ding zat kidophuai hi.

2.     Kawlpi ah “Zomi Nam Ni” cih ngiat in ZNCM in phalna a ngahna tungtawnin kamphen kul lo Zomite in ZBCM huang sungah zangkhawm hi. Hih tawh kisai ngaihsutzia leh telkhelhna thu tampi kimu a, Zomi min a zadah mahmah pawlkhat vot siduh bangin hong so litlit hi. Zomite in hih hun pen Zomi Nam Ni cih a zat hoih kisa ahih manin a buailuat nang uh om lo hi mah leh, ki-ukcip nopna lungsim, a sangzaw hih ding bek a sawm tinten, amau ngeina leh pau le ham bek a puah nuamte ahih manun heh luat ding zong hi lo a, ‘saipi pai in pau ngeungeu ding hi; ui honin hong naknak hang!’

3.     Hizah ta a Zomite in Zomi min ngiat tawh (Chin kihel loin) a kizatna hong kihatzatna leh hong kilangdona pen Zomi Congress for Democracy (ZCD) hang hi, zong kici thei ding hi. Bang hang hiam cih leh, haksatna tampi kawmkal panin ZNC makaite cihtakna, kuhkalna, kipiakzawhna leh hanciamna Pasian in thupha hong piaksakin, Chin state sunga tualsuak party lakah ZCD bekin MP hong ngah ahih manin Zomi a langdo/hua vilvelte in Zomite kalsuandan, lampi tot pen maan/dik hi, cih hong mu ahih manin, ahih kei leh minam picing khat hihna hong kidawk toto ahih manin Zomi sung buai ding a deih uh hi lel hi; patauh huai lo, buailuatna ding om lo hi.

4.     Mun pawlkhat ah, “Chin Phunpi Ni” ciin a zang om hi. Tuate zong maawhsak huai lua kei. Amau ‘phunpi’ ni a zang uh hi lel ahih manin va tot hiam, va buaisak hiam, va seel hiam kul tuan lo hi. Suakta taka a zat theih uh lungdampih ding hi lel hi. En ‘phunpi’ cih kammal nei lo lel i hih manin ei buai luatna ding om lo lel hi.

5.     Kawlgam khuahun hong kihong zawdeuh ta ahih manin gamkhangto a suakta taka Zomi Nam Ni a zang zelte mah bangin Zomi Nam Ni/Zomi National Day ciin kizang ziahziahta (a zang thei nai lo pawlkhat a om hang) ahih manin mail amah Zomi cih maizum lo, lungnuam leh suakta takin i zat zom zel theih ding lametna lianpi om hi.

Leitung gam tuamtuama Zomi Nam Ni zatna maan, video, leh zatzia kigelhte sim nuam, muh nuam, ngaih nuam mahmah hi. Leitung mun tuamtuam a om Zomite khempeuh Pasian in na omna ciat uh ah hong kithuahpih in, mai kum Zomi Nam Ni zang kik thei dingin Pasian in na sepna, na bawlna uh ah hong makaih hen.

~ T. Sawm Lian

Daihna Cabin || 25|2|2016

--

T. Sawm Lian
Daihna Cabin
http://sawmdaihnacabin.blogspot.in/


Note' phattuam nading bek ngaihsun kei unla, midangte' phattuam nading ngaihsutsak zaw un (Filippi 2:4)

Namkim Bu

Tedim Township Education Diretorate nuaiah ki vaihawm in TBA(tua hun lai) panin kikhen khia hi. Zolai malgawm zia, Zokam ah a kizang diak, kammal kihal, laimal kinai te ahi zing, Zolai pan Kawllai ah min gelhzia ahi zong, Zogam sung thu tampi theihhuaite kihel hi. Sim huai mahmah hi.

NAMKIM BU

Pupa Ngeina Zukholh

Pupa Ngeina Zukholh

Kawl huzaap Zomi te'n Pawi acih pen India lam Zomi te'n Lawm ci uh hi. Ahih hangin hite pen Zopau hilo hi. Zopau iin Ai kicizaw hi. Mimza ai, taangza ai, asamat ai, BA ai, kici hi. Ahih hangin Lawki-hunlai gal-ai , sa-ai cihpen zupi nungin dawibiak ngeina tawh na kizomlua ahihman, ai cihpen lawkivai-lua kisa kha ding hi. Zomite in gualzawhna leh matutna khatpeuh a om ciangin kipahtawi uh hi. Kasangnaupan lai-in kapa in lai ka-on simin aktawh hong aihsak tawntung hi. Innkuan iin kilungkim mahmah hi. Kalai onman kei aklu hong nesak hi. Thuneuno abat hangin hanciamnopna hong khangsak hi. Nu leh pa hong pahtawina pen ki-angtanpih mahmah hi. Ka uu pen saben uuk ahih ciangin lailam haatlo hi. Ahih hangin vakhu khat amat pen kapa'n aklui khat tawh aihsak hi. Vakhu pen khuttum-cia phalo hi. A aihna aklui pen innkuanmeh cing hi. Tua bang kipahtawina in lungsim cidamsak hi. Pute Tuukzuu Kholh Zomi lawkite in tuuktung masa anpalte zuu in sa uh hi. Puute zuu khol uh hi. Zucil kaimasa pen a puupi suah uh hi. Apuu in la-in mawkneeklo hi. A tute cidamna ding leh mimza tangza lazo ding, sumnu sumpa lamzawhna dingin thupha ngetsak uh hi. Zomi te ngeina-ah numeite in pianna nulehpa vakna ding thu ngahlo hi. Go leh gam kitomsak lo hi. Ahih hangin numei nualam pen kipuapaih tuanlo hi. Naupangte in puute zahtakpiakna leh pahtawina itna lahna ding ngeina hoihmahmah nabawl zel hi. Puute tuukzu-kholh pen numeilam pahtawina ahi hi. Puute leh lamphung kineekzolo cih paunak nei uh hi. Tua pen naupangte in nulam ahi puute pen simmawh loh ding deihna hi. Lungsim sungah ngeina kipmahmah aguansak ahi hi. Puute simmawhte damlo hi. Nuamsa lo hi. cin umsak hi. Gilsung damlote in gau-an la ci'n puute kiangah ankhing vasiim uh hi. A tute tungah khasia leh, napu ngoidok hing bang hang hong hici bawl na hiam? cithei uh hi. Ngoidok cihpen gilnathei cihna ahi hi. Tua ahih ciangin damlohna thu khatpeuh a omleh puute kiang taailoh phamawh ahihmanin puute kizahtak hi. Ki -iit mahmah hi. Thupha ngahna-naak ahi hi. Tanu-mokhak khempeuh kiciamkholin, a zu-kholhni kibangsak uh hi. Lawki-hunin omkhawlna munah aneek uh zuu hipen hi. Anlim sangin zuu pen thupiseh zaw uh hi.Puute pahtawina la vive sa uh hi. a. Kei kapuu te sen a kapuu te ningzuu bang khum thei naleng nuampeng phuhsak vang e b. Nuampeng phuhsak vang heisa bang paal thei naleng kapal losak vang e. a. Bualna ngei nuam bualna ngei nuam e, puvon siangsung bualna ngei nuam e, b. Laamna ngeinuam laamna ngei nuam e, puvon pahtang laamna ngei nuam e. a. Tualnuam e tualnuam e puute sumtual tualtung tualnuam e b. Gam nuam e gam nuam e pupa gamzang gamnem gamnuam e a. Pupa gamzang tangzang khat a, tangkhat suan zong simtheihloh piang e b. Tang khat suan zong simtheihloh piang a bangaa sunglawh bang kasam hiam aw. a. Theisen puvon ngalliam bel aw tusuanmel haihkha na cia. b. Gual sang tongdam neem zaw ding a, aduang mel hoih ding aw e. Dawhdan saknung leh dawhdan khangnung dimin zubeel kigual hi. Zubeel khat mikhat in tutpih hi. Sak leh khang abul leh adawn kidawngin lasa ziahziah hi. Pasalnote kikhelin alai-ah tawnsak keukeu hi. Khuangtumpan akhuang saankeuhkeuh iin hong tawp ciangin, suai..suai..suai suai cin, a tangtawnpa kai-in zuu teepsak hi. A puute a itmanin tawn(laam) hi ci'n pakta mahmah uh hi. Tuukzuu-akmat ci-in ak khattek namat uh hi.. Pawlkhat in sum mat uh hi. Pawlkhat in gangawh hi. Bang bang kimat taleh tukzu-akmat in sum tua zah hong pia ci uh hi. Tuhun Christian ten zong hih ngeina paikhia tuanlo hi. Zuu tangin cikhum bawngnawi peuh kikhol hi. Antak bungkhat bungnih vapuak thei hi. Pawlkhat in anlim-tuilim vaneekpih hi. Hih pen puute pahtawina pawi limci mahmah ahi hi.Ei Christian khangthak hunin zong puute pahtawina hunnuam limci-takin kibawl thei lel ding hi. NAU MIN PHUAK Nidanglai in naudom(midwife) kineilo hi. Numei nausuakte ki-ompih selo hi. Lokuan naseemlai khawng lukhumtawh tun in hong ciahthei hi. Lukhum mongteep hualin naulai hen hi. Heitang tutang peuhtawh naulai tan hi. Bangmah paulap omse lo hi. Pasian in theihna niamte nakpi takin hong donzaw hin ka-um hi. Unau pasal-4 leh numei-8 kapha uh-a, kum khat leh khagiat simin manmanin kanu nausuak den hi. Nau-suahhun atun ciangin patkhau ciptakin ahual khit ciangin gu alutlohna ding cin, khinking tawh zuut zawsop hi. Nau hong suak petmah hi. naulai pen temngilngolh khat la-in tan hi. Puantawh tunin lawhsungah asial khit ciangin anungzui ngakin baallei ek-awng gei-ah tawlkhat hong tu hi. Anungzui hong paikhia aa, sisan honpitawh hong tolkhia lialua hi. Sisantui teng awngvangah anilkhiat khit ciangin, tu khat la in, phaitamah anungzui(alamh) pen amahman vaphuum lel khong hi. Naumel kimuh khit ciang a thupipen minvawh ding ahi hi. Zomite in naumin deih peuhpeuh kiphuaklo hi. Pasallam leh numeilam kalhelhin kihawmsak ngiat hi. Khangsuutna in kinei hi. Anu apa in amaudeih bang min pialo hi. Naumin tangte kingak aa, amau deih thukimpih keileh kikhasia hi. Sukte vangphatlai in minngei lua kiphuak ngamlo hi. A phuak omleh, ademin koih ngiau ahihman, minngeih kiphuaklo hi. Naumin tangte ngakna-lamin nipi kalkhat sung bang min neilo iin omthei khong hi. Naumin phuahni ciangin, naumin tangte in vok, ak aneihsunsun hong kengin kine hi. Bangkua sunga khangham pen in, tuiphihin min-aapna kinei hi.Naumin-phuahna akgawh en in, naungek mavak ding leh mavakloh ding genkhol thei uh hi. Tuiphih apaileh ih nau cidam ding akhansung nuamsa ding hi, ci'n hilhkhol thei hi. Khangluite in naumin aphuah ciangin, abeisa hun-a a puu apate khan kilangsak hi. Vung Dah Ciin acihleh aheh adahte hi, ci'n kimupah hi. Tuang Hau acihleh minuamsate ahi ve, kicithei pah hi. Nidangin Zomite pen Lia leh Taang tawh buai ngeilo uh hi.Min kilawh phetin numei hiam pasal hiam cih kitel pah hi. Numei-min leh pasal-min sawhpawi ngeilo uh hi. Gentehna in, pasal-min Thang Za Cin ahihleh numei-min ciangin Thang Za Cing ci se hi. Akhiatna kibangin numei leh pasal kikhen sinsen hi. Tua zong pilna thuk mahmah hi. Tun khangthak ten khensatzo lo in email sung khawng-a khuttum nakilah vauvau uh, amau olsa mahmah lel hi. Lawki ten tuiphih lohin naumin phuaklo hi. Christian ihih buangin biakinn mahah apngiatngiat leng lungkim huai pen hi. Naumin-phuak ni pen ni-thupi khat ahi hi. Khankhat iin khatvei bek kinei thei hi.Naumin phuakte in khuangleh zam tat iin gamlumnuam lualo hi. Kam kinial nuamlo hi. Naukha lau kici hi. Salu suanni leh naumin-phuahni gamlum kikhaam hi. Naungeek kilatin cina thei hi. Zong sithei hi. NAUCING GUAI Khangluite pen lungdam kithukzo petmah hi. Ekciang tung zong kiguai, cih paunak om hi.Ahoih khat asep thuneuno nangawn kipahtawi thei uh hi. Lungdam kikokik ngekngek hi. Ei kiangah childcare center omlo hi. Bangkuapi-nu pen naucingin kizang-a innlak sanggam teng in naukhahon uh hi. Naucingte pen kizahtak mahmah hi. Anlim tuilim amuhsunsun uh amau neektang in ciamsak hamtang hi. Tuk-anlaak mankhit ciangin, naucing guai uh hi. Naucing guaihna pen vok tukli nuai kigo ngeilo hi. Kum khat tawntung nau-anpia, azun a eek kisiak ahihman nakpi iin zahtak hi. Tangngansih leh voksahul kinesak hi. Tua ni ciangin zuu leh sa kidiah pikpeekin kivak beklo iin, khuang leh zam tatin zanhak thei uh hi. Khangluite thukhualna pen guicing mahmah kuitung mahmah hi. SAZAAM Japan-galma hunin saneek kisangkhaat mahmah hi. Sa-sai omlo hi. Dangka-tang ngahna haksa lua hi. Akpi khat matkhat in kilei hi. Minvawh khat neilo-in akno khat zong kigongam lo hi. Sumtawng-thoih ahihkeh huanthoih cihkhat in zang hamtang uh hi. Saneekna tawmlua ahihmanin lampi zong uh hi. Inn-4 inn-5 kipawlin banpai-in vok go uh hi. Tua pen sazaam kici hi. Vok pen bangcia go dingcih ciangtan uh hi. Pawlkhat in nekhawm hi. Pawlkhat in a kikimin sehhawm uh hi. Sa khamtakin ne uh ahihman sazaam pen ahihzote ki-eng mahmah hi. Hih kipawlna pen a cithei zawdeuhte aa hi. Meigong daipamte kihel zolo hi. TUKVAK. Tanghamkin kici ankung leh kiak kikimin a omlaitak lokhawh kikin mahmah hi. Lo-lel ahihman thacial uh hi. Kialhuntawh kituak sawnsawn hi. Thacialte kivaitut zolo ahihman, tuktun(akhawhsa-tun) ciang kivaakpan hi. Tuktun ciangin thacialte kaikhawm iin zuu leh sa akhamtakin neekpih hi. Thacial-vaak tawh kibangnawnlo hi. Pawibawl banglel ahihman nuamsa mahmah hi. Hih ngeinate pen dawibiakna tawh kisai hilo hi. Amau-hun tawh kituak nuntak khuasakzia ahi hi. Tua banga kikaihkhopnate pen a kingai tengmah ahi hi. Kikholhna tamleh kingaihna leh kiphawkna zong khangpah hi.

Thang Siangh

Lai Simbu pan Pau Sinbu-ah~Sia Khoi Lam Thang

1913 kum-in Zolai Simbu a nei hi hang ci-in tangthu-ah kiciamteh hi. 1925 kum ciangin Mikang kumpi in Zogam-ah Zolai tawh pilna sin theih dingin (Vernacular Education) vaihawm hi. Mission sang khempeuh phial kumpi sang suak-a, Zolai tawh tanli ciang pilna kisin hi. Leitung thu, Cidamna thu, Ganan a kipan theihhuai tuamtuam kisin hi. Kawlgam suahtak hun 1948-a kipan Kawllai tawh pilna sin ding hong ki-uangsak leeuleeu-a, Zolai hong hingkiam hi. Zolai Simbu nangawn a mangthang phialphial din’mun ahi hi. Minam sung pan pilna lam makaite leh a lunghimawh mimalte’ hanciamna tawh Zolai Simbu tan li ciang nei liailiai lai hi hang. Kumpi sang pan Zolai kisin lo seemseem-a, Pawlpite in khuakhal sangkhak sung-in hanciam-in i sin hi.

Zolai i gelh theih i simtheih hangin i zatna tangzai lo hi. Laikhak gelh nading, Biakinn-a labu et nading leh Lai Siangtho sim nading ciangciang bek hi tazen hi. Bang hanghiam cih leh i Zolai Simbu in Zo kampau sim thei ding, gelh thei ding (reading and writing) ciang bek ahi hi. Tua ban-ah, khangnote in Zolai tawm zat deuhdeuh uh-a, Zokam tawm pau seemseem uh hi.

Zolai Simbu tan li ciang i neih pen a bulpi hi-a, tua tungsiah sin beh nading nei nai lo hi hang. Ph. D pa zong Zolai tan li, mi dang khempeuh zong Zolai tan li bek mah i hi hi. Tua pen ahi mah ding ahi hi. Zolai tanli nangawn a siam lo kitamzaw ta ahih manin dipkuat huai hi. 10 ong zo lo-te zong Zolai-ah tan li mah hi lel hi hang.

Zolai leh Zopau i puah i zuun ding Zo tate’ maban ahi hi. Kampau it-in i kep leh ninam it-a ngeina keemte i hi ding hi. Khuang leh zam, puandum leh puan laisan, salu saki-te sangin kampau sungah ngeina kim zaw hi. Kep i sawm nak leh, kuamah’n hong guuksak thei lo hi. Mei in kang ngei lo ding-a, ui in hong neeksak ngei lo ding hi. Ei’n i lung hihmawh kei leh hong lung himawh ding midang om lo hi.

Hih thu a phawk kha makaite in 1980 kum-in ZCLS na phuan uh-a, Linguistic Research Seminar bawl uh hi. Thu kizakna lai dingin (Quarterly news) a min "Zolai Zuunna" phuak ngiat uh hi. 1994-in ZOLUS kiphuan-a, Zolai leh Zopau lapsaan’ nading ahi hi. Lungdam huai mahmah hi. Hih bang kipawlnate in mailam-ah hong thupi seemseem ding-a, a sepkhiat sunsunte uh minam mualsuang hong suak ding hi.

ZCLS-ah 2005 thu kikupna (consultation) pan-in Zolai Simbu tan 10 dong neih theih ding nakpi takin kikupna om hi. Tua thu-ah tulai minam a it Zokam leh Zopau a puah nuam khempeuh mapan’ khop kul ding hi. Zolai sim thei-a gelh thei ciang bek tawh lungkim lo ding hi hang. Zokam kilam zia i sin kul ding hi. Zokammal thupite lai-in gelhin laibu-in i kep kul ding hi. Khang thakte tungah i hilhsawn kul ding hi. I lunghihmawhsak kul ding hi.

Tua ahih manin i Zolai sinna "Zolai Simbu" pan Zopau sinna "Zopau Simbu" ah kal thak suan huai ta hi. Zo kampau kantelna "Zopau Simbu" sungah a nuai-a thulute a kisam bangin hel dingin kisam ka sa hi. Hih thulute a dawldawl-in khen-in minvawh lehang, tan 10 ciang tung lua mahmah ding hi. Research bawl-in, degree piak dongin vaihawm huai hi.

Hel Huai Thulute:

1. Laimung (consonant) neihzah leh a kizatna 2. Awphei (vowel) neihzah leh a kizatna 3. Kammal pian’ na’ng awmalte kigawm zia (syllable structure) 4. Awphei lamban (vowel assimilation) 5. Awsang leh awniam (tone) 6. Laigelh zia (orthography) 7. Kammal kikhelte (Word alternation) 8. Lakam 9. Kammal tomlaakte (contraction)

10. Paunakte 11. Tehpih kamte 12. Kam kopte 13. Kammal thukte 14. Telgen kam kopte 15. A dang tampi omlai …

Thukhupna

Hih bangin thulu kaikhawm lehang kizomzom lai ding hi. Hih bang thulute a khiilkhiil-in khaikhawm-in, Zopau sinna Lai Simbu-ah a tantan in koih diimdiam le’ng; Pawlpi ciat-ah hih thu tangko-in khangnote sinsak le’ng; Hih thu a vaihawm phungpi neiin, galsin theih dingin (correspondence) zong vaihawm leeng; A masa peen-in Zolai tan 10 ciang certificate bawl-in, mai lam-ah gam kiukna suahtak hun ciang University-te-ah Zolai subject khat a kisin thei ding textbook ciang a mansa-in koih dimdiam le’ng; cih ka sunmang ahi hi. Zolai simbu pan Zopau sinbu-ah galkah sawm dih ni.

[Hih lai, 07 JUL 05 THU ni-in kingah hi

Zogam leh Zomite’ Khan’toh Nading a Ngaihsut Huai Thu Pawlkhat

Zogam leh Zomite’ Khan’toh Nading a Ngaihsut Huai Thu Pawlkhat

Pu Thang Za Dal

Kei, hih lai at pa pen, Zogam ka muh lo zawh kum 40 bang pha ta phial ding ahih man in hih ka gelh thute tu hun tawh zong ki tuak nawn lo kha ding hi. Tua bang ahih leh zong n’ong theih siam nading-un hong thum masa nuam ing. Hih lai pen Planning Paper (Simankein bawlna lai) hi lo ahih man-in ngaihsut huai ka sak teng sung pan nam thum bek a tom theithei in k’ong gelh ding hi.

Tu ni dong i Zogam leh i minam khan’toh lohna a hang tampi omte lak-ah eimau ii i khuamuh loh man leh i bawl theih loh man-a i khan’toh lohna thu bulpi thum (3) tawm bek k’ong gelh ding hi. Tuate pen bang hiam cih leh: 1. I inn lam dan 2. I an neek leh i tui dawn dan 3. I singpuak, i lo khawhna-ah i vanh zatte

Hih a tung-a thu teng pen eimau’ thatang leh eimau’ theihna zah (know-how) ciangciang tawh a kibawl thei, a kilaih zo ding ahi hi. Hih teng hoih takin bawl thei lehang a manpha mahmah ahi i thatang, i hun, i sum leh i paai, i singkung i logam-te tampi tak a nuamtuam ding bek tham lo, i nun’taak dan zong tu-a i nun’taak sangin tampi tak nuamtuam zaw ding hi ci-in ka mu hi.

I. I Inn Lamm Dan

Ei Zomite in inn i lam ciangin Mikangte (Nitumna lam mite) ii inn lamm dan ngaihsutnate (architectural concepts) nei lo i hih manin inn a gol pipi, a zai pipi i lamm hi. Tua bang ih lammna a hang tuamtuamte lak-ah

(1) mi dangte dem nading

(2)nop ni, dah ni mi hong hawh, hong tutpihte tut na’ng, kihei na’ng mun a kicing tak, nuam tak-a a om theih na’ng

(3) tuk an, khal an i khawhasa ante i koih na’ng

(4) a kuamah peuh ta ki hau ciat ahih manin i tate lup na’ng leh om na’ng mun a kicing tak-a kisapna hang, leh

i vanh zat tuamtuam te i koih nading cih bang te ahi hi.

Hih a tung-a a kigelh a hang tuamtuamte ngaihsutna tawh i lam hi ta mah leh i inn pen gol em-am (ahih kei leh) zai mahmah bek-in a kicing tak in kizangh thei tuan khol lo hi.

Mikangte’n inn a lam uh ciangin gual leh lawmte dem nadiing-a kiphatsakna tawh a lamm a hih kei nak leh functionality a kici geelna tawh a lamm uh hi. Hih functionality ii a khiatna bulpi pen bang hiam cih leh i lamm ding inn ii a golna ahi zong in, a zaina ahi zongin, a niamna/a saan’na pan -a ki pan a inn sung-ah khan (room)-te deih dan pan -a kipan a kisam lian ding teng bek ngaihsutna tawh lamm uh ahih manin om nuam, zat nuam bek dom lo-in kicing mahmah hi. A inn lammna-ah a zat uh vanh te zong a tuan a vaal om lo-in a kisam zah leh a kisam ding lian teng bek zangh uh ahih manin sum leh paai ahi zongin, thagui thatang ahi zongin, a hunte a hi zongin a tuan a vaal bei lo hi. Tua ahih manin a inn uh a pua lam pan en le’ng neu bang ahih hangin a sung lam pen kicing thei mahmah hi.

Tua hi-in i Zogam sungah mai lam-ah inn i lamm ciangin i ngaihsut ding thu tawmno khat k’ong gen nuam hi. Tuate pen bang hiam cih leh:

1. I inn khum (roof) ding pen sikkang khawng man ham pipi-a i lei-a gamla pi pan i puak sang-in i Gamgai/Limkhai suangpeek cih bangte i pu i pate’ hun lai-a zat bang-in i zat kik na’ng;

2. Tua suangpeek omna tawh a kigamlaatna mun te-ah innkhum ding pen singpeek thuap thum thuap li baang pen oksuang (brick) cian dan-in zat ding/ahih kei leh suangpeek mawkmawk te zong kizangh thei. (Gentehnain Switzerland gam sung pan Swiss Italian-te’ teen’na Tessin Canton leh Italy gam saklam sung bang-ah hih bang suangpeek mawkmawk te nak zat mahmah uh hi).

3. Ih gam pen a diakdiak-in phalbi sung vot mahmah ahih manin i pang (wall), i sual (floor) leh ceiling cih bangte singpeek tawh thuap nih (double-layer) bangin hih le’ng a

pua lam pan a vot hong lut zo khol lo ding-a a lum ding-a i zat sing khuul-te tampi tak nuamtuam ding hi. Tua ban-ah tua singte kum sial-a a tom i numeite ii a man pha lua thatang leh hunte zong nakpi takin nuamtuam ding hi.

II.. I An Neeek leh I Tui Dawn Dan

Nisial phiall-a i neek Zo ante - gentehna: vaimiim, kaithum (kawlkai), cih bangte pen Mangbuh vui (wheat flour) a kibawl Mivomte/Mikangte’ an neek uh Rothi/Plata leh Pongmoh (bread) cih bang tuamtuamte tawh 50 % bang beek laih zo le’ng ut huai hi. Tua bek tham lo-in sa (meat) leh i an meh huan dante zong Sente (Chinese)-te’ huan dan tawh i laih ding kisam ta hi. Ei’n sa khawng an teh khawngte i huan teh nai 2 nai 3 bang i huan tazen hi. Sente’n sa hi ta leh anteh hi ta leh a huan/a kan uh teh minute 20/30 kaan huan/kang lo uh hi. Amau’ huan dan tawh a ki huan ante pen vitamin pan-a kipan i si leh i sa’ aadiing a kisam vitamin tuamtuamte zong bei mang lo hi.

III. Ih Singpuak, Ih Lokhawhna-ah I Vanh Zatte
I lo khawhna-ah i vanh zatte en le’ng i pu i pate’ hun lai tangtawng pek pan-a a kizangh den vanh teng bek mah i zangh lai mawk hi. Tua vanh tuamtuamte a zat nop zaw dingin i bawlpha tuam (improve) peuhmah kei hi. Gentehna-in: i kawltu zatte bang a kung tom mahmah ahih manin lo i khawh, khai i tuh ciangin i kuun den kul ahih manin lokuante a kawng uh na bek dom lo-in a hun manpha tampi zong a mawk beipih hi. Tua bang kawltu khawngte pen a kung sau sak lehang kuun kuul het lo-a din’ lam-a zong lo a kikho thei ding kimlai. Tua teh an cii i pawi ciangin ei’n i kawltu mah tawh i to-a i tuh hi. Siik ka zum 3 hiam 4 hiam om khat tawh mi khat in a din’ lam-in lei khawh henla a dang khat in anciite a nungzui-in phum leh. I an ciin’te lak-ah po lopa (grass)-te bot khiat nading zong ei’n i kawltu mah i zangh hi. Hih nitumna lam-a te’˜n siik kawi 3 hiam, 4 hiam a om kawltu khat tawh a din’ lam-in botkhia ziuuziau uh ahih manin a kawng lah na lo, a nasep ding teng lah man baih uh hi.



A tung-a ngaihsutna (idea) tuamtuamte zangh thei le’ng i hunte, i thatang te leh i sum i paaite mawk bei nawn lo ding hi.

Thukhupna:

A tung-a ngaihsut tuak/huai thute (food for thought) a lunglut a om leh i biakna lam pawlpi tuamtuamte’n makai-in vaihawm leh piang thei dingin ka um hi. Tua bangin wellorganized movement khat mah in a makaih kei leh (initiative a laak kei leh) mimal sial (individual) in pan thei lo/pan nuam lo kha ding hi.. Hih teng ban-ah i Zogam sung

khan’toh na’ng khat peuhpeuh i bawl nop hangin a kizangh thei ding a kikaikhawmsa statistics/data om peuhmah nai lo ahih manin Planning pen kibawl thei vet lo hi. Gentehna ci mai ni: Khua khat sungah mihing om zah - nupi/pasal kum 70 val bangzah om; kum 60-70 pha bangzah om; kum 50-60 pha bang zah om, etc.; meigong tagah bangzah om; lo leh inn neih bangzah om; khuamite a cidam siang sitset bangzah om; etc., etc. Hih bang data/statistics a kicing tak in i kaihkhop kei leh i gambup aading gen loh khua khat bek zong i lap toh na’ng haksa kha ding hi.

Thang Za Dal pen Lophei khua pan hi-in kum 60 pha ta hi. 1978 pan kipan Germany-ah om hi. A zi pen Shan-te hi-in tanu khat nei uh hi. A tanu in Zo min bek nei-in tu laitak Hamburg University-ah lai a sin laitak hi.

[Hih lai, 15 AUG 05 MON ni-in kingah hi.]

Kawl leh Zo Kilamdan’na~Dr Vum Son

Kawl leh Zo Kilamdan’na

Dr. Vum Son

Mungpi tawh ka ki ho leh, "Kawlte pen Zote sangin kal suan khat a masawn zawkna pen bang hang hiam?" hong ci hi.

Kawl leh Zo pen mipilte (Linguists, Anthropologists, Historians) in Tibeto-Burman minam-te sungah hong koih khawm uh hi. Tua pen thu dang hang hi lo, Kawl leh Zo pen a paute uh kinaai-in, a daan uh zong kinaai hi, ci hi. Tua bek tham lo-in hong paikhiatna pen kibang pian-a, tu laitak Sen (Chinese)-te ii uk Tibetan Plateau pan hong paikhiate hi, ci hi. Hun khat lai-in, Tibeto-Burman minamte pen mun khat-ah om khawm-in, pau namkhat zangh khawm dingin kingaih sun hi. Unau zong hi kha ngei ding hi, cih upna zong om hi.

Tua ahih leh bang hangin Kawlte pen masawnin om hiam cih, en ni. Zomite pen Kawlgamah Zeisu’ suah zawh khum zakhat, kumzanih (First or second century AD) sungah tu-a Chindwin gun kiang hong tung suk hi-in mipilte in mu uh hi. Kawlte pen kum zasagihzagiat zawh ciang (seventh to eighth century AD)-ah Kawlgam hong tung suk ding-in mipilte in mu hi. Tua hun-in pen Kawlte in Kawlgam sunga kum tampi a omsa Pyu mihingte tawh Kyaukse a cihna khawngah hong kimu uh hi.

Pyu te pen Kawlgam-ah sawtpi om ta ahih manin, Kawlgam zaangtamna-ah bangci lo kho cih na thei ta uh hi. (Wet cultivation buh ciin’na cih bang.) Mual leh uuam gam Tibet leh Salween, Mekong, Irrawaddy, Chindwin, Brahmaputra gunpi-te’ kipatna pan hong tuakkhia a hih hang Kawlte in Pyu-te’ pilna teng luah thei pah ahih ciang in, amau te kal khat a suan-in hong makai ta hi.

Tua bek hi lo-in, tu laitak-a Kawl galkapte gilo si e, i cih mah bangin, midang tawh a kipeh uh ciang gilo gawp-in Kawl te Kawlgam dry zone a tun’ khit sawt lo-in Pyu mihingte mangthang uh hi. Pawlkhat in tulaitak-a om Pao te pen Pyu-te hi-in, Kawlte a thuak lah hanga, mualtung-ah taito hi ci-in upna nei hi. Bangbangh hi leh Kawlte’ giitlohna hangin, Pyu-te bei manghi. Tua a hih kei leh Kawlte in zawhthawh thu tawh Kawlte suak hiam cih zong muan’mawhna om hi. Tua hang-in zong Kawlmi hong tam toto hi kha ding hi. Tua pen a ma suanna bulpi khat hi.


(Kawl te giitlohna pen Thailand-a Ayuthia kumpi khua a siat sakna, a bawlsiatna uh, Mon-te a khuapi Bago (Pegu) pan a mangthan’na uh, Arakan (Rakhaing) kumpi te a bawlsiatna uh, Assamte bang in, bangci-a hih bang-a gilo lawmlawm hiam, a cihna uh, Meitei (Manipur) kum sagih Kawlte ii uk hun pen Meiteite in seven years of devastation (kum sagih sung mi mon’sak na ) ci-in ciamteh-in, Kawlte pen i kidop kei leh mi gilo lamdangte hi cih theih-in ciapteh ding thupi hi.)

Zo mite pen tu laitak-a Monywa sak lam khawng teng-ah hong teeng to uh-a, tua-ah pen midang om lo ahih ciangin, mual sangpi Tibet plateau khawng, gun golpite’ kipat na mualsang tung-a a teen’ lai uh-a, lo khawhna teng zang gam hong tun’ uh ciang tua tengmah zangh uh ahih ciangin, khan’tohna na om khol lo uh hi. Zaanggam om zo hi napi, leisangna teng mah-ah lo kho nuam zaw-in Kawlgam sung hi ta leh Kawlgam sak lam mualtung (tu laitak-a i gam khawng-ah nuam na sa zaw mai uh ahihciangin, khangto lo-in i ngeina teng ngeina sak mawk uh hi.

Kawl te zaanggam ah om-in, mitam ta uh ahih ciangin, migilo, zuauthugen, leh mikheem pen tampi hong nei ta uh hi. Tua banga mihoihlote pen a kitheih ciangin, khuadangah paikhia-in mangthang thei hi. Tua hangin Kawlte in mi a theih ngeilo khat pen um thei nawn lo ahih manin, bangci-in hih leng mi kheem thei ding ka hiam, mi’ na te bangci-in, ngah thei ding ka hiam cih hakkat -na hong nei ahih uh ciang, mikheemna pen pilna golpi khat suaksak uh hi. Tua ahih ciangin Kawlte in mikehem hong siam-a, a mikheem theih ding mite hong mu thei uh. Tua pen Mangkangte pau (English)-in ci leeng Urban society, mitamna khuasungthu hong suak hi.

Zo mite pen khua neuneu sungah teengin, khua sungah kua teng teeng hiam, tua bek domlo in, beh leh phung vive ahih uh ciang, guta, zuauthu, mikheem cih te pen piangthei lo mai hi. Mun dangah taai ding ci leeng lah khua dangte zong a beh a phung vive na hi mai uh ahih ciangin, khuadang kibeel thei lo-in, mihoih lote mangthang thei lo-in, mihoihte bangin, a khua uh-ah a om kenkan uh kul mawk ahih ciang, Zo mite pen mikheem thei lo, thuman gente, i suak mawk. Tua pen English-in ci leeng Village Society ci-in, Zo mite’ village society hong suak hi.

Europe khawng, America khawng-ah i om ciangin, amau zongh Village Society na hi nwn lo-in Urban society na hi uh hi. Kidawm kei leeng hih mipil i cihte’ gam-ah, mi’ bawlsiat na i thuak ding lauhuai mahmah hi. Tua hangin zong Kawl mite in British-te Kawlgam-ah hong pai ciangin, kiho thei lo-in British-te’ colony (British-te’ sal) hong suahna uh zong tua hang hi. Asia sung-ah mipil deuhte Thai-te bang ci leeng, British-te tawh thu kiho thei ahih ciangin, British leh Francete in uk nuam taleh zong, uk zo lo-in, Thaite in, hoih takin, thukimna bawl thei hi. Kawlte pen Zo mite sang kal khat masuan ahih uh hang Thaite sang kal khat nung khak zaw leeuleeu cihna hi.

Tu laitak Kawlgam leh a kiangkap-a gamte en leeng, Kawlte pen mihai mahmah mihing ahih hun lam i mu hi.

Kawl i cih pen Sing Kho Khai laibu sungah zangtam mi te cihna hi ci-in at a hih manin Zo History ka at lai-in, ama’ at ka zui hi. Tu’n Bangladesh-ah ka pai ciang, Bangladesh-a Zo mite in Bengali-te Korka ci uh hi, hong ci hi. Kor or Kawr cih pen zadang neu cihna hi. Mualtung mi pen a zadang uh gol-in Bengalite a zadang uh neu cihna hi. Tua hang zongin, ei zong in "Kawl" ci-in a min uh pia kha i hi tam, ka ci hi.

[Hih lai, 11 MAY 05 WED ni-in kingah hi.]

Zolai leh Zolai Simbu

Zolai leh Zolai Simbu

Tg. Kaptawng

Miami, Florida, USA

Thupatna:

Zomite in ‘lai’ i neih zawh kum 100 sung bang pha ta hi. I teen’na mun le mual zuiin, Zopau le Zolai a thei nawn lo tampi tak om khin hi. Zaanggam teeng Zomite in Zopau a pau theih teei uh hangin, khangno tampi takin ‘la-kam’ le ‘paunak’-te thei nawn lo uh-a, Zolai a gelh thei lo zongh tampi tak om ta hi. I pau le i laite pau thei, gelh thei, sim thei bek ciang hi lo- in, bangci bang in hong piang khia hiam cih zongh i theih ding, le i tu i tate i hilh ding kisam hi. A diakdiak-in nampi lian lakah a teeng gamdang tung Zomite in Zopau kitam zaak nawn lo-in, Zolai tawh lai sim ding om lo hi. Tua ahih man-in i pau le i lai bangci dan-in hong piang hiam cih thei ciat le’ng ‘pau’ itna, le ‘lai’ itna i neih theih ciat nadingin, i pau le i lai bangci bangin hong piangkhia hiam cih i theih ciat ding deih huai masa hi.

I. ZOLAI PIAN’NA

A. Zo Tuallai

Tedim gam Lailui khua Pu Pau Cin Hau in Zogam ah a piang masa peenpeen (lai) "Lai-pian" or "Pau Cin Hau’ lai", kum 1896-98 sungin na bawl hi. Sen (Chinese)-te’ lai tawh kibang pian-in laimal khat teh kammal khat ta a suak laimal 1050 tawh Zo Tuallai na bawl hi. Tua lai pen tan 6 ciang sin dingin kibawl

hi. Kum 1913 ciangin Pau Cin Hau’ lai tawh Mualtung thu hilhna ki khen hi. Tu ni ciang dongin Pu Pau Cin Hau ii bawl ‘Tual-lai’ or ‘Lai-pian’ pen Laipian Pawlpi (Biakna) mite in zangh lai uh-a, a dang Zomite in zatpih nawn lo uh hi.

B. Zo Manglai

Zo Manglai i cih ciangin tu hun-a a ki zangh Roman Script (a, b, c, …) cihna ahi hi. 1894 kum in Mikang mi Surgeon Major A. E. G. Newland (Indian Medical Service-a a seem) in Haka lai na bawlsak masa hi. Tua khit Rev. A. E. Carson te nupa Haka hong tun’ ciangin a kibawlsa Haka lai puahsak hi. 1908 kum-in Rev. J. H. Cope-te nupa Haka hong tung masa-in, 1910 kum-in Tedim-ah kituah uh-a, a kibawlsa Zolai gelh dante kan- in, Zomite zattaang theih dingin Roman Script tawh Zolai hong bawlsak-a tu ni dong kizangh hi. Roman Script tawh hong bawlsak man-in, Zomite in a tuam-in siktawh lai khetna, computer cih te bawl kul nawn lo-in, email i gelh ciangin zongh i Zolai teekteek tawh kikhak thei i hih man-in hih zah a zat nuam ding Zolai hong bawlsak Cope Topa tungah a lungdam huai lam i phawk seemseem hi.

C. Zopau/lai Taang-kam (common dialect)

1910 kum Cope Topa Tedim hong tun’ ciangin Tedim gam sungah (tu lai Tedim,


Tonzang, Cikha township) hong zin kawikawi-a, pau namneu tuamtuam a om lam hong thei hi; bang kamtawh lai gelh le’ng tangzai-in kizangh kim thei peen ding hiam cih hong kan hi. 1919 kum-in Tedim Vuandok zumah kampau zattaang ding tawh kisai kikupna nei uh hi. Cope Topa Khamtung hong tun’ ma 1891 kum-in Captain Rundall in Siyin lai bawlsak khin ahih manin, Siyin lai/kam zat ding zongh kikum uh hi. Hih kikupna Pu Ngul Langh’ ciaptehna-ah:

Hih thu kikupna sungah Sihzang kam zang ding a kicih ciangin, Hiangzang khua hausa Pu Zam Khaw Thang (Thahdo kam zang), Hangken hausa Pu Kam Pum (Thahdo kam zang), Phaitu khua hausa Mantuang nam Pu Khan Thawng (Zo kam zang), Salzang khua hausa Pu Zaang Khaw Lian ( Zo kam zang), Tuimui khua hausa Guite nam Pu Mang Za Thang (Paite kam zang) le Haiciin khua hausa Pu Tual Pum (Paite kam zang)-te in Sihzang kam tel kei ungh ci-in nial uh hi. A tel lo takpi mah uh hiam ci-in Sihzang kam tawh kihopih-a tel zo lo takpi uh hi. Tua thu kikupna sungah Tedim kam i cih a zangh diak khua a hi: Tedim, Ngennung, Haupi, Gawngmual, Leilum, Lezang, Tongsial, Lamzang, Lailui, Mangken, Kahgen, Taaklam, Tonzang, Tungtuang, Anlangh, Gamlai, Khuaimual le Seitual khua pan-a taangmi a pai hausa le upate a pau khat beek om vet lo-in, Sihzang pau zat ding lah nial lo, Tedim pau zat ding thu zong kamkupna neihpih tuan lo uh hi. Hih hunin Zogam kiukna pen Magwe khutnuai-ah om hi.

Hih bang teng hangin Tedim kam tawh Zolai simbu bawl ding thu khensatna hong om hi. Tedim pau pen taangkam/pau (common dialect) ding thukimna bek hi lo zaw-in, Tedim pau pen namneu te’ pau teng kigawm khawm a hihna tawh taangkam-a zat ding cihna hi zaw hi.

1980 kum-a kibawl Zomi magazineah Tg. Askeppee in a nuai-a bangin na gelh hi.

"Nidang lai-in Ciimnuai piang mite’ kampau nam guk a hi: Teizang kam, Saizang kam, Thahdo kam, Vaiphei kam, Guite kam le Zo kam paute na teeng khawm uh hi. Amaute in dawi biakna tual khat bek zangh uh hi. Hih bangh teen’ khopna panin pau nam tuam khat piangkhia-a, tua pen Tedim kam (Koine Tedim) kici tu lai-a Zolai Simbu kigelh pen ahi hi. Tedim pau ah pau namkim kigawm peen ahih man-in Tedim gambup (tu lai Tedim, Tonzang, Cikha gamte) ah taang kam hong suak hi." (Sihzang kam zongh…-- author)

Hih Tedim kam-pau Zomite pen tu lai Saizang khua gei-a Ciimnuai-ah teeng masa uh hi cih pen nialna ding omlo hi. I pu i pate Ciimnuai-ah a teen’ lai-un pau khat bek hi-a, hong kikhen-in mun tuamtuam-ah hong teen’ ciangin pau tuamtuam hong piang ahi hi. Ciimnuai-a a teen’ khop lai-un a pau zat uh (original dialect) pen Saizang pau hi kha ding hi. Bang hang hiam cih leh Saizang khua


tawh kinaai, tanglai Zo lapite-ah Saizang kam kihelna tam mahmah hi. Tua ban-ah tu hun-a Tedim khua tual-a teeng khangham lamte’ Tedim pau zat pen Saizang pau tawh kibangh khin phial hi.

II. ZOLAI SIMBU

1921 kum-in Burne Mangpa (Lt. Col. I. E. Burne, Deputy Commissioner and Battalion Commander) makai-in Falam khua ah sang vai kikupna thupi mahmah khat nei uh hi. Sang khempeuh-ah Zolai tawh laisin thei ding cih thu hi-a, hih thu a zaak ciangin Cope Topa zongh lungdam mahmah hi. Hih hun-in Zogam-ah tanli sang guk bang bek om pan-a Kawl lai tawh pilna sin uh hi. 1922 kum ciangin Maymyo khua-ah sang vai mah kikum kik uh-a, Laizo kam tawh pilna sin ding gelna a neih uh ciangin Cope Topa lungkim lo-in, Tedim kam le Laizo kam tawh laisin ding le Cope Topa’ bawl laigelh zia zuih ding kumpi tungah ngetna nei hi. 1924 kum May kha-in Burne Haka hong pai-in Cope Topa tawh kimu uh-a, Zogam ah Laizo kam le Tedim kam tawh laisin ding le laisim bu bawl ding, thukimna nei uh hi. 1925 kum-in Mikang kumpi vaihawmna tawh Zogam sang khempeuh kumpi khut sung tungin, Zolai tawh tanli ciang ki sin hi. Kumpite in Zogam-ah sang-uk mangpa a seem dingin Cope Topa sawl uh ahih manin tu ni dongin "Sangmangpa" kici hi. Zogam Sangmang te lak-ah Haka, Laizo, Teizang, Sihzang, Saizang le Tedim kam a pau thei pen Cope Topa bek ahi hi.

A. Cope Topa’ Bawl Zolai Simbute

Cope topa in Thuciam Thak Zolai tawh hong teisak ban-ah, thu kizakna tuamtuam le laisimna-a zat ding laibu tampi hong bawlsak hi. Tedim kam tawh Zolai simbu bawl ding khensatna a om khit ciangin Cope Topa in a nuaia sanglai simbute hong bawlsak hi.

1. Nate thubu bu 4, tan 1-4 2. Cidamna thubu bu 3, tan 2-4 3. Ganan bu bu 4, tan 1-4 4. Zolai simbu bu 4, tan 1-4

Cope Topa in lai simbu nam 15 hong bawlsak-a, 1924 June kha sanghon’-a kipan-in Zogam-ah zangh-in, kum 28 sung kheelna, puahna om lo-in kizangh suak hi. 1953 June kha sanghon’-a kipan-in Zolai simbu teng simloh a dang teng kizangh nawn loin, Kawllai tawh lai kisin hi. Zogam sang khempeuh-ah Zolai subject khat bek-in kisin ta hi.1924 pan 1971 dong, kum 47 sung puahphatna om lo-in Cope Topa’ bawl Zolai simbu kizangh hi. 1964 le 1976 kikaal kum 12 sung Zolai simbu bawl ding tavuan la om lo ahih manin Tan 2 pan Tan 4 dong Zolai simbu zat ding kinei lo hi.

B. Zolai Simbu Puahphatna

1970 December ciangin Tan-Lang Zolai simbu puahphatna kinei hi. 1975 kumin a nih veina Zolai Tan-Lang bu kipuahpha hi.1976 kum ciangin Tan Khat pan Tan Li dong puahphatna kinei-a, Cope Topa’ bawlna sung-ate, tu hun tawh a kituak nawn lo teng puahpha-in, a kisamte kibehlap hi. Cidamna lam, nate thu, thu tuamtuam le tangthu hoih nono (Mu Nei Thang Dal,


Cing Khup le Ngam Bawm, cihte) kiguan’ beh hi. Tu laitak-a a kizangh Zolai simbu pen Tedim Myone Council Zum nimit 10/7/1986, Zumlai No. 02/32 Tahtah-1 tawh a kipuah Zolai Simbu Kawmite-te in a sunga thute a gelh uh ahi hi.

C. Zolai Simbu Khetna (Publishing)

A tunga i gensa bangin Zokam, Zolai, Lai simbu hong pian’khiat nading, a baih hi lo hi. Lai simbu hong pian’khiat khit ciangin zongh laibu bawlna ding tha le ngal, sum le paai baih lo leeuleeu hi. Hih ih Zolai simbu pen Kumpi in hong vaihawmpih hi lo-in, ei le ei in i vaihawm ahi hi. Tavuan la nuam om kei leh Zolai simbu a ki nei nawn lo ding hi ziau mawk hi. A seem a bawlte zongh sum tawh kicial hi lo-a, deihsakna tawh sup thuak-a nasepna ahi hi. A beisa kum bangzah sung hiam Zogam sangte-ah kumpi in Zolai sinsak nawn lo cih thu kiza hi. Kidah mahmah-in a thu a kikankan teh, a kisinsak nawn lo hi loin, Zolai simbu bawlna ding sum om loin, kibawl zo nawn lo-a, laibu a om loh teh sin ding a om lo hi, cih thu Zolai simbu vai-sai-te in gen uh hi. Hih thu a kitheih ciangin Zogam-ah Zolai a kisinna ding deihsakna lianpi tawh Zomi Baptist Church, Florida, USA pawlpi in Tan Lang pan in Tan Li dong (bu tul 20 val) Zolai simbu khetna ding a bei teng vaihawmsak dingin khentatna nei uh hi. Tua bang hong vaihawm khiat uh ih minam aadingin nasep thupi le nasep hoih mahmah khat hi dingin ka um-a, angtan’ huai-in, lungdam huai mahmah hi.

Thu khupna le Thuumna:

Zogam it, minam veii a kuamah peuh in, a omsa i pau, i laite keem-in zuun-in, ma i pan’ khop ding deih huai mahmah hi. Kampau in minam keemcing-a, lai in kampau, ngeina le tangthu te keemcing ahih mah bangin, sang-ah Zolai kisin nawn kei-in, biakna labu, Lai Siagntho-te ei’ lai tawh hong om kei mawk leh i pau le i lai hong bei mawk ding hi. Ei gamdang om Zomite in nuatah ci-in i pau i lai mangngilh kei ni. I pau le i lai mangngilh le’ng i minam zongh a mangngilh, a bei hong suak ding hi. Tu laitakin minam neu i hih hangin hun hong paipai dinga, nikhat ni teh i suan i khakte hong tam-in minam lian i suak ding hi. Minam lian khat in pau le lai nei lo cih om thei lo hi. Sangmang J. H. Cope Topa in minam khat a i din’ theih nadingin pau le lai hong guan khin zo hi. Ei a pau nei, a lai nei-te in thupi sa kei mawk le’ng dah huai-in hai huai lua ding hi. Namdang te lak-ah i om zongin inn sungah Zopau mah zangh-in, i tu i tate Zolai mah sinsak tanghtangh ciat ni. Mailam-ah hih Zolai simbu sung-a hel ding thu hoih nono gelh-in, Zonote i sinsak zawh nading, sang kah zo lote zongh sum le paai tawh i pan’pih zawh ciat nadingin tha saan-in hanciam ciat ni. (ZCLS Silver Jubille laibu sung siksan-in k’ong gelh ahi hi)

[Hih lai, 19 JUL 05 TUE ni-in kingah hi.]

Vahui Magazine 2006 panin kong copy ahihi. Lungdam

Thawn Tuang